O le ali’i e 21 tausaga le matua lea sa galue o se teufale i le Fatu o Aiga, ua taofia nei i le toese i Tafuna, ona o tu’uaiga i lona faia lea o ni uiga mataga i se tama’ita’i e 14 tausaga le matua.

O tu’uaiga fa’asaga i le susuga a John Iosefo e aofia ai moliaga mamafa e lua o le faiaiga ma se tama’ita’i e i lalo o le 21 tausaga le matua; lua moliaga mamafa o lona tagofia o itutinosa o se tama’ita’i e le i fa’aipoipo i ai, ma le moliaga mama e tasi o lona faia lea o ni amioga e ono lamatia ai le saogalemu o fanau laiti.

O le mataupu lenei na tofu atu i le Ofisa o Leoleo i Fagatogo, ina ua talosagaina e le Ofisa o Tautua ma Auaunaga Lautele sa latou fesoasoani, e uiga i se tama’ita’i e 14 tausaga le matua na faia i ai e se tagata uiga mataga fa’afeusuaiga.

Na taua e le tama’ita’i na a’afia i leoleo e fa’apea, na avea lona ita i ona matua i le otegiaina o ia i le aso 11 Ianuari 2015 ma itu na ita ai loa i ona matua, ma ia fa’afesootaia ai loa lea o lana uo (le ua molia), la te fetaui i luma o le Daycare a le Hope House i le itula e 11:00 i le po o le aso lava lea.

Ina ua la fetaui ma le ua molia, sa la aga’i atu loa i se fale i le vaega lava o le Fatu o Aiga ma la fai’aiga ai loa.

I le aso na sosoo ai, na toe otegia ai fo’i le tama’ita’i na a’afia e lona tina ma tuli ese o ia ma le latou fale, ma fai i ai e aua ne’i toe alu i le aoga, ae sauni o lea ua uma ona fa’afeso’ota’i le ofisa o Tautua ma Auaunaga Lautele e o mai e piki atu o ia, ona o lona sola ese ma le latou aiga.

O le aso lava lea na momoli ai e lona tina ma lona uncle o ia i le Ofisa o Tautua ma Auaunaga Lautele i Utulei, ma su’esu’e ai loa e tama’ita’i faigaluega e tusa ai o le la mafutaga ma le ua molia, o le aso fo’i lea na logo ai loa le ofisa o leoleo e tusa ai o lenei mataupu.

Na fa’ailoa e le tama’ita’i na a’afia i leoleo e fa’apea, o le taimi muamua na la momoe ai ma le ua molia o le masina o Tesema 2014, o le ulua’i taimi fo’i lea ua ia faiaiga ai i se ali’i, soso’o ai loa ma le aso 11 Ianuari 2015, lea na la toe momoe ai i le nofoaga lava e tasi i se fale i totonu o le Fatu o Aiga.

Ina ua fesiligia e leoleo ia Iosefo e tusa ai o lenei mataupu, sa ia ioeina ai lona faia o uiga mataga i le tama’ita’i na a’afia. Na fa’amatala e Iosefo i leoleo e fa’apea, o le aso 28 Tesema 2014 le taimi muamua na la fai’aiga ai ma le tama’ita’i na a’afia, soso’o ai loa ma le aso 11 Ianuari 2015 i le nofoaga lava e tasi i le Fatu o Aiga.

Na taua fo’i e Iosefo i leoleo e fa’apea, o lona aso fanau i le aso 20 Tesema 2014 le ulua’i taimi na la fetaui ai ma le tama’ita’i na a’afia, lea na ia fesili ai pe mana’o la te uo, ae tali atu le tama’ita’i ia te ia ioe.

E $10,000 le vaega tupe lea ua fa’atulaga e totogi ona fa’atoa mafai lea ona tatala le ua molia i tua mai le toese i Tafuna.

Afai ae mafai ona tatala o ia i tua, ua poloaina o ia e le fa’amasinoga e aua nei ona toe taumafai e fa’afeso’ota’i le tama’ita’i o lo o a’afia i lenei mataupu po o ni isi fo’i o lona aiga, ua fa’asa foi ona ia toe solia se tulafono a le malo, a ia avea o ia ma tagatanu’u lelei e tausisi i so o se tulafono i taimi uma.