O le taeao ananafi na fa’atoa tula’i ai i luma o le fa’amasinoga fa’aitumalo se ali’i talavou, ua tu’uaia i le talepe fale ma le gaoi, atoa ai ma lona taliaina o ni oloa sa ave fa’agaoi ese isi tagata i le 2012.

E lua mataupu eseese lea ua molia ai e le malo le ali’i o Freddie Fa’aoso Viliamu.

O le mataupu muamua lea o lo o masalomia na tula’i mai i le aso 19 Ianuari 2012, o lo o tu’uaia ai o ia i moliaga mamafa e lua, o lona taliaina lea o ni oloa sa ave fa’agaoi e se isi tagata, ma e $10,000 le tupe lea ua poloaina e le fa’amasinoga e totogi, ona fa’atoa mafai lea ona tatala o ia i tua.

O le mataupu lona lua o lo o tu’uaia ai o ia i moliaga mamafa e lua, le moliaga o le talepe fale i le tulaga lua atoa ai ma le moliaga o le gaoi, ma o lo o taofia pea o ia i le toese i Tafuna, se’i vagana ua ia totogi le $20,000 ona fa’atoa mafai lea ona tatala o ia i tua.

E pei ona faatulaga e le faamasinoga e $30,000 le aofai o le tupe atoa e totogi ona mafai lea ona tatala i tua ia Viliamu.

MATAUPU MUAMUA

O le mataupu muamua e pei ona tu’uaia ai le ali’i o Vilimu, na tula’i mai i le aso 19 Ianuari 2012, ina ua logo e le pule aoga a le aoga maualuga a Leone le ofisa o leoleo mo se fesoasoani, ina ua maitauina le talepe e ni tagata o le ofisa a le aoga ae gaoi masini komipiuta sa i ai.

Ina ua fesiligia e leoleo ia Viliamu e tusa ai o lenei mataupu, sa ia ta’utino ai e fa’apea, i se taimi o le aso 10 Ianuari 2012, sa talanoa atu ai se ali’i e igoa ia Mu Matu’u ia te ia, pe mafai ona fesoasoani atu ia te ia i le fa’atauina atu o ni masini koipiuta, le ituaiga o le iMac computers o lo o ia te ia.

Na alu le ali’i ua molia ma saili ni tagata na te fa’atauina atu ai masini komipiuta ma i’u ai loa i lona fa’atauina atu o ia masini i le tau e $120 mo masini uma e lua, ma o ia masini ua toe maua e leoleo ma toe fa’afo’i atu i le aoga i Leone.

MATAUPU LONA LUA

O le mataupu lona lua e pei ona tu’uaia ai Viliamu, na tula’i mai i le vaveao o le aso 20 Ianuari 2012 ina ua logo e se fafine Asia le ofisa o leoleo mo se fesoasoani, i ni ali’i se to’alua na osofaia lona faleoloa i Leone, ae gaoi le $600 sa i totonu o le masini tupe.

Na fa’amatala e le fafine i leoleo e fa’apea, na fa’ateia o ia ina ua ulufale atu ni ali’i se to’alua e fusi uma foliga i totonu o le faleoloa, ma la taumafai loa e tatala le masini tupe, ae o le taimi lea o lo o tu ai i luma o le masini tupe ma si’i lana pepe.

Na mafai e le au ali’i talepe fale e to’alua na ulufale i le faleoloa ona fa’ataunu’u le la osofaiga, ma la gaoia ai le tupe e $600 mai totonu o le masini tupe ma sosola ese loa mai le faleoloa i le taimi lava lea.

O ni molimau sa mafai ona fesiligia e leoleo e uiga i lenei mataupu, sa taua ai e se molimau i leoleo lona iloaina lelei o ali’i e to’alua n osofaia le faleolo, e masani lelei ai fo’i i totonu o le atuu’u.

Na taua e le isi molimau e fa’apea, sa ia iloaina le taimi na ulufale ai ali’i e to’alua o lo o fusi foliga i totonu o le faleoloa, e lei umi ae ona vaaia loa le ie sa fusi ai foliga o le isi ali’i ua pau ese, ma ia iloa atu ai ona foliga, o ia o Freddie Fa’aoso Viliamu.

E to’alua isi molimau sa la matamata i ata sa pu’eina i le masini pu’eata a le faleoloa, ma la fa’ailoa ai i leoleo, o se tasi o ali’i o lo o i totonu o le masini pu’eata a le faleoloa, o Viliamu, la te masani lelei ai lava i ona uiga fa’apea ai lana savali.