O le alii leoleo lea na maua o malaga ma ni ali’i pagota i se ta’avale a le falepuipui i Tafuna i le vaiaso na te’a nei, e aunoa ma se fa’atanaga fa’aletulafono, ua molia nei e le malo i moliaga mamafa e lua, o le fesoasoani e fa’asola se pagota, ma le fa’ataga o se pagota e sola i tua ma le toese, fa’apea ai ma le moliaga mama o lona fa’aleagaina lea o mea molimau a le malo.

O le taeao ananafi na tula’i ai le ali’i leoleo ia Fatu Enari i luma o le fa’amasinoga fa’aitumalo mo lana ulua’i iloiloga, ma ua toe tolopo nei lana mataupu e toe valaauina i le fa’aiuga o le vaiaso nei, ma fa’atulaga ai loa le aso o le isi ana iloiloga fa’apitoa.

O le mataupu lenei na tofu atu i le Ofisa o Leoleo i Fagatogo, ina ua maua e le Ofisa o Leoleo Suesue se fa’amatalaga e uiga i ni pagota se to’atolu, ua aveese mai i le toese i Tafuna e aunoa ma se poloaiga a le fa’amasinoga, ma tofia ai loa le ali’i leoleo su’esu’e ia Det. Poutoa I’amanu na te su’esu’eina lenei mataupu.

Pe tusa o le itula e 7:00 i le afiafi o le aso 7 Ianuari 2015 e pei ona taua i fa’amaumauga a le fa’amasinoga, na maua ai e le ta’ita’i o le CID ia Comdr. Lavata’i Ta’ase Sagapolutele se fa’amatalaga, o lo o paka le ta’avale a le TCF, numera PS-52 i luma o le fale o le ali’i pagota o Tolupo Hodges i Alofau.

I le mae’a ai ona fa’ailoa e le pule o le toese i Tafuna ia Fo’ifua i le taitai o le CID, e le i fa’atagaina le ta’avale a le falepuipui e alu i Alofau, na logo ai loa e Lavata’i le vaega a le CID e tusa ai o lenei mataupu.

Pe tusa o le itula e 8:00 i le afiafi o le aso lava lea ae taofia loa e leoleo o le CID le ta’avale a le TCF i se vaega o Fagaitua, ma vaaia ai le ali’i leoleo ua molia nei ia Enari o lo o ia aveina mai le ta’avale, fa’atasi ai ma ni ali’i pagota se to’atolu o lo o i totonu.

O ali’i pagota e to’atolu sa i totonu o le ta’avale e aofia ai Hodges, Matafua Mataipule ma Ioane Filipo.

E fia fa’ailoa atu e le Samoa News, o ali’i pagota e to’atolu sa i totonu o le ta’avale a le TCF, o lo o tuli ni a latou fa’asalaga ina ua ta’usala i latou i moliaga o le umia fa’asolitulafono lea o vaega o fualaau fa’asaina. O le ali’i leoleo o Enari, o lo o galue i le toese i Tafuna.

Ina ua fesiligia e leoleo ia Enari i le mafua’aga o le latou tuua o le toese, na taua ai e Enari e fa’apea, na te’i ina ua o atu ali’i pagota o Hodges ma Mataipule ia te ia i le toese ma fai atu, ua mae’a ona fa’ataga i laua e le ta’ita’i uati ia Lt. Fasi Ta’ase, la te o e fai le paipa o le sai pua’a a Hodges i Alofau.

Na taua e Enari i leoleo e fa’apea, sa ia fesiligia le ali’i leoleo ia Lt. Ta’ase e tusa ai o lea mataupu, lea fo’i na fa’amaonia mai e Lt. Ta’ase ia te ia, e alu e momoli ali’i pagota e fai le galuega i Alofau e pei ona ia fa’atonuina.

Ina ua mae’a ona fa’amaonia e Lt. Ta’ase ia Enari lana fa’atonuga, na o atu ai loa Enari ma ali’i pagota i le ta’avale, ma latou fa’ailoa fo’i i le ali’i lutena ia Lt. Tamau Sami le fa’atonuga a Lt. Ta’ase, ma fa’ataga ai loa le ta’avale e tuua le nofoaga o le toese i Tafuna.

Ina ua fesiligia e leoleo ia Lt. Ta’ase e tusa ai o lenei mataupu, sa ia matua teena lona fa’atagaina o Enari e alu e ave pagota e fai se galuega i Alofau.

E tusa ai ma fa’amaumauga a le fa’amasinoga, o Hodges o lo o taofia i le toese, ina ua ia le usitaia tuutuuga o lana nofovaavaaia, talu mai le mataupu na ta’usala ai o ia e le fa’amasinoga i le 2009.

O lo o taofia fo’i o ia i le toese e fa’atali ai le aso o lana fa’amasinoga, ona o  le mataupu fou lea na molia ai o ia i le 2013, i lona umia fa’asolitulafono lea o vaega o fualaau faasaina ma le fa’amoemoe e tulei pe fa’atau atu i isi tagata.

O Mataipule o lo o tuli sana fa’asalaga fa’afalepuipui, ina ua ta’usala o ia i lona umia fa’asolitulafono o vaega o le fualaau fa’asaina o le mariuana, e mafua mai i le mataupu lea na maua ai ni vaega o mariuana ia te ia i le nofoaga o le Pago Plaza, a o galue ai o se Leoleopo i le 2012.

O Filipo o lo o tuli sana fa’asalaga fa’afalepuipui, ina ua ta’usala o ia i lona umia o se vaega o le laau faasaina o le mariuana, e mafua mai i le mataupu lea na maua ai se sikaleti mariuana ia te ia, ina ua toe fo’i atu i totonu o le toese i le amataga o le tausaga na te’a nei, ao tuli ai sona fa’asalaga e 90 aso ina ua ta’usala o ia i le moliaga o le ave ta’avale ao se’i lona laisene.

E $15,000 lea ua fa’atulaga e le fa’amasinoga e totogi ona fa’atoa mafai lea ona tatala Enari i tua mai le toese.

Na taua e ni isi o leoleo o le toese i le Samoa News e fa’apea, na mafua ona fa’atino e Enari le gaioiga e pei ona tu’uaia ai o ia, ona sa usita’i i le fa’atonuga sa tu’uina atu ia te ia.

Na taua e se tasi o leoleo o le toese i le Samoa News e fa’apea, e le o se taimi muamua lenei ua fa’ataga ai ni pagota e tuua le toese ma toe fo’i atu i totonu, ae le iloa pe aisea ua mafua ai ona aafia le ali’i leoleo o Enari i lenei mataupu.

O ni isi o tuutuuga ua tu’uina atu ia Enari pe afai ae mafai ona tatala o ia i tua mai le toese, o le fa’asa lea ona ia taumafai e fa’afeso’ota’i molimau a le malo, aua fo’i ne’i ona toe solia se tulafono a le malo.