Ua mae’a ona toe tatalaina i tua se ali’i faipisinisi e 46 tausaga lea na molia i lona fa’amalosia o se tei (niece) a lona to’alua, e 16 tausaga, ma ua ia te’ena moliaga uma fa’asaga ia te ia, ina ua tula’i i luma o le Sui Fa’amasino Sili, ia Lyle L. Richmond ma le ali’i faamasino lagolago ia Mamea Sala Jr., i le Aso Lulu na sei mavae atu.

Ua mae’a ona totogia e le ua molia ia le $50,000 e pei ona fa’atonuina e le fa’amasinoga e mafai ai ona tatalaina o ia i tua.

O le a le lomia le suafa o le ua molia, ina ia puipuia ai le tama’ita’i o lo o a’afia i lenei mataupu.

O lo o molia lenei alii i le fa’amalosi teine, faia o uiga fa’asotoma i se teineititi talavou, faia o amioga mataga fa’amalosi, i le tulaga muamua fa’apea ai ma le faia o ni tulaga e a’afia ai le saogalemu o se teineititi talavou.

E tusa ai ma fa’amaumauga a le fa’amasinoga, o lo o ta’ua ai e fa’apea, na fa’amatalaina e le teineititi na a’afia, i leoleo sa su’esu’eina lenei mataupu, le amataina o lenei fa’afitauli i le va o Iuni ma Iulai 2012, ina ua fa’ato’a nofo lenei tama’ita’i i le fale o lona ‘aunt’, le to’alua o le ua molia.

Na fa’amatala e lenei tamaitai, e tasi le vaiaso talu ona nofo i totonu o le fale a lona ‘aunt’ ma lona to’alua po o le ua molia, ae alu atu le ua molia i totonu o lona potu ma taoto atu i ona tafatafa, i luga o lona moega, ma sogi atu ia te ia.

I le fa’aauauina o fa’amatalaga a lenei tamaitai, e pei ona i ai i fa’amaumauga a le fa’amasinoga, o leisi vaiaso na soso’o ai, ae toe alu atu foi le ua molia i totonu o lona potu ma o lo o ta’ua i fa’amaumauga, le taumafai o le tamaitai e tete’e atu i le ua molia, ae peita’i, na le’i fo’i ai le fa’amalosia e lenei alii o le tamaitai , e la te faia uiga fa’afeusua’iga.

Na ta’ua foi i fa’amaumauga a le fa’amasinoga, le fa’amatalaina e le tamaitai i leoleo, se tasi o taeao na o la o ai ma le ua molia i le faleoloa, na tu’u atu ai e le ua molia le ki i le tamaitai e alu e tatala le ofisa.  Ae peitai, e le’i o’o atu le lima o le tamaitai e ki le moli o le ofisa, ae u’una’i mai o ia e le ua molia, mai i tua, aga’i i totonu o le ofisa, ma tapuni e le ua molia le faitotoa o le ofisa.

O lo o ta’ua i faamaumauga le fa’ataoto e lenei alii o le tamaitai i luga o le foloa o le ofisa, ma o la faia ai uiga fa’aleulugali’i.

O lo o taofi le malo, o lo o i ai se talitonuga, o le taimi mulimuli lava na tupu ai lenei fa’alavelave, o le vaiaso mulimuli o Aokuso, po o Aokuso 29, 2012, i le faleoloa a lenei aiga, ina ua u’una’ia e le ua molia le tamaitai, e faia ni uiga mataga ae e le’i alu i le aoga.

Ua ta’ua i fa’amaumauga a le fa’amasinoga e fa’apea, na faamatala e lenei teineititi i leoleo e fa’apea, sa le mafai ona ia taofia le ua molia mai i lona fa’amalosia o ia, ona o le mamafa o lenei ali’i.

E le gata i lea, o lo o ta’ua foi i faamaumauga a le fa’amasinoga, le faafefe e le ua molia o le teineititi, ina ia aua ne’i tau i lona ‘aunty’ se mea na tupu.  Ma o lo o i ai se talitonuga, e pei ona ta’ua i fa’amatalaga a le teineititi i leoleo, e pe a ma le faatolu pe fa’afa ona tupu nei mea ia te ia, i le vaiaso e tasi.