E 71 tausaga o se toeaina ave pasi na taofia e leoleo i le fa’aiuga o le vaiaso na te’a nei, ona o tu’uaiga i lona fa’amalosia lea o se teineititi e 15 tausaga le matua la te faiaiga, i totonu o se ‘container’ teu oloa o lo o ta’atia i tafatafa o le auala e alu aga’i i le falepuipui o tamaiti i Tafuna.

O moliaga mamafa ua molia ai le susuga a Tina’e So’osemea, o se tasi sa galue o se leoleo mo le tele o tausaga ua mavae,  e aofia ai le faiaiga fa’amalosi ma se teineititi e talavou i lalo o le tulafono, tagofia o itutinosa o se teineititi talavou i le tulaga muamua, atoa ai ma le faia o uiga mataga i se teineititi talavou.

O le mataupu lenei na tofu atu i le Ofisa o Leoleo i Tafuna pe tusa o le itula e 4:00 i le afiafi o le aso Lulu na te’a nei, ina ua vaaia e se molimau le pasi a So’osemea o lo o paka i tafatafa o le ‘container’ tu’ufua lea e ta’atia i se vaega o le auala e ui aga’i atu i le falepuipui o tamaiti i Tafuna, ae o totonu o le ‘container’ o lo o vaaia ai se toeaina matua ma se teineititi laititi.

E le i umi ae taunu’u leoleo i le vaega tonu e pei ona taua e le molimau, ma latou vaaia ai So’osemea ma le teineititi na a’afia o lo o talanoa i totonu o le pasi, ma poloaina loa i laua latou te o ma leoleo i le ofisa i Tafuna mo ni isi su’esu’ega.

Ina ua taunu’u i le ofisa o leoleo i Tafuna ma fesiligia fo’i e leoleo le teineititi, sa ia ta’utino ai i leoleo na fa’amalosi o ia e le ua molia la te faiaiga i totonu o le ‘container’ ae le i malie i ai lona loto.

Na taua e le teineititi i leoleo e fa’apea, pe tusa o le itula e 4:00 i le afiafi lea o le aso Lulu, na alu atu ai le ua molia i lana pasi ma piki mai o ia mai Vailoa, ma la aga’i atu loa i le kamupani i’a o le StarKist o lo o faigaluega ai lona tina, ma tu’u i ai e le ua molia le tupe i lona tina e fa’atau ai sana meaai.

Ina ua la toe fo’i ese mai, na la afe i se faleoloa i Utulei ma fa’atau ai e le ua molia lana meaai iina, toe avatu ma le tupe e $20 ia te ia, ma la aga’i sa’o atu ai loa i le auala o lo o ui atu i tua o le falepuipui o tamaiti i Tafuna (Juveniles Detention Center), ma ia vaaia ai le paka e le ua molia o lana pasi i tafatafa tonu lava o se ‘container’ tu’u fua o lo o ta’atia ai iina.

Na taua e le teineititi na a’afia i leoleo e fa’apea, ina ua paka le pasi a le ua molia i tafatafa o le container, sa fa’apea atu ia te ia, ua mafua ona ia faia lenei mea ona e fai lava si tele o le tupe o lo o nofo aitalafu ai lona aiga ia te ia, ma ia fa’atonuina ai le teineititi e oso i fafo ma le pasi ae mulimuli atu ia te ia i totonu o le container.

Ina ua taunuu i totonu o le container, sa vaaia ai e le teineititi na a’afia se nofoa momi tuai o lo o ta’atia mai ai, ona fa’atonu lea e le ua molia o ia e tatala ese ona lavalava ae taoto i luga o le nofoa momi lea, ma sa ia usita’i fo’i i ai, ma fa’atino ai loa e le ua molia le solitulafono o le faiaiga fa’amalosi ia te ia e aunoa ma lona mana’o i ai, e ui sa ia taumafai e una’i ese le ua molia, peita’i sa ia taumafai e po o ia ao fa’aauau pea ona ia fa’amalosia o ia la te faiaiga.

Ina ua mae’a ona fa’atino e le ua molia le solitulafono, sa ia folafola lona fasiotia o le teineititi na a’afia, pe afai na te fa’ailoaina i se isi le mea sa tupu.

E $50,000 le tupe lea ua fa’atulaga e le fa’amasinoga e totogi ona fa’atoa mafai lea ona tatala o ia i tua.

O le taeao ananafi na tula’i ai So’osemea i luma o le fa’amasinoga fa’aitumalo, ma ua fa’amoemoe o le fa’aiuga o le vaiaso nei e toe fofogaina ai lana mataupu i luma o le fa’amasinoga.