E 25 tausaga o se tama’ita’i ua tu’uaia e le malo i le moliaga o le gaoi, e mafua mai i le fa’alavelave lea na ia aveesea mai ai le laptop a lona uso mai le fale a ona matua i le vaiaso na te’a nei.

O le mataupu lenei na tofu atu i le Ofisa o Leoleo i aso Sa na te’a nei, Ianuari 25, 2015 i le afiafi, ina ua aga’i i ai le tina ma le uso a le tama’ita’i ua molia o Angelina Samana, ma talosagaina se fesoasoani a leoleo e tusa o lana laptop sa teu i le fale a ona matua, ae ua le iloa po o ai ua ia gaoia.

Na taua e le uso a le ua molia i leoleo e fa’apea, sa ia te ia lana laptop talu mai le amataga o le tausaga na te’a nei, sa i ai lava lana laptop i le latou fale ma ona matua, ae na fa’atoa leiloa lava i le aso Faraile na te’a nei ina ua asiasi atu lona uso i le latou fale.

Na taua e le tina a le ua molia i leoleo e fa’apea, na te’i ina ua vili atu le ua molia i lana telefoni i le aso Faraile na te’a nei, ma talosaga atu ia te ia pe mafai ona alu atu e piki mai o ia i se tasi o faleoloa Tafuna o lo o i ai, ma o atu ai loa ona matua ua piki mai o ia ma latou o ai loa i le fale o lo o nonofo ai ona matua, o lona uso ma lona tuagane.

O Samana e nofo i se tasi o fale i Lepuapua e pei ona taua i fa’amaumauga a le fa’amasinoga.

Ina ua fesili leoleo i le tina ma le uso a le ua molia, pe sa la vaai o aveese mai e Samana le laptop mai totonu o le fale, na tali molimau e leai, peita’i  na fa’ailoa e le tina i leoleo e fa’apea, e le o se taimi muamua lea ua faia ai e le ua molia ituaiga amioga nei i le latou fale, o lona tago lea ma aveese so o se mea e manao i ai, ona alu lea ma tuu i tua o le latou toga laau, fa’atoa piki lava i le taimi na te tuua ai le fale ma alu ese loa lea ma ia.

E le i mana’o le tina e faila se tagi fa’asaga i lana tama, se’i vagana ai lona manao e toe fa’afoi atu le laptop a lana tama o lo o mana’omia, ae ina ua fesiligia e leoleo le ua molia i le fale o lo o nofo ai i Lepuapua po o ia te ia le laptop, na lulu lona ulu ma fai i leoleo e leai se laptop.

Na fa’ailoa e le leoleo ia Samana, ua mafua ona avatu o ia i le ofisa o leoleo, ona o lo o i ai se suesuega o lo o manaomia ai lana fesoasoani, e tatau fo’i la ona lava pea lona onosa’i.

Ina ua tu’u atu e le leoleo le kopi o le pepa o lo o tusia ai aia tatau a le ua molia e faitau i ai ina ia malamalama lelei i ai, sa ia ee i luga ma ia toe palau vale i leoleo ma fai i ai, “o lea fo’i ou te malamalama i o’u aia tatau fa’aletulafono”.

Sa fa’aauau pea ona faitau e leoleo aia tatau o Samana ia te ia, ma tu’u atu ai loa le pepa na te sainia, peita’i sa musu o ia e saini le pepa ma sa ee i luga ma fai i leoleo, “o a’u lea la’a alu i le fale”. Mulimuli ane ave Samana i le toese ina ua fa’aauau pea ona ia tete’e i galuega a leoleo.

Na fa’aaoga e leoleo se malosi fa’aopoopo e mafai ai ona loka lima o Samana, ina ua tete’e o ia e tu’u atu ona lima e loka e leoleo, ae ina ua savavavali mai leoleo ma le ua molia i fafo o le ofisa e sauni ai mo le momoliina atu o ia i le falepuipui i Tafuna, na tagi ai le ua molia ina ua ia vaaia lona tina i fafo o le ofisa o leoleo, ma ia valaau atu ai i lona tina, “Mama, fa’amolemole”, ae na tali atu i ai lona tina faapea, “leai, fai soo lau mea lea o lou alu ma ave mea i le tatou fale”, peita’i sa fa’aauau pea ona fa’atoese Samana i lona tina ma valaau i ai, e le fia alu i le falepuipui.

Ina ua latalata le taavale a leoleo i le falepuipui i Tafuna, o iina na ta’utino ai loa Samana i leoleo ma fai i ai, “Isaako, faamolemole, ave a’u i le fale, ioe, o a’u lea ga avea le laptop, ae ave muamua a’u i le fale oga kakou o laia e piki mai le laptop”.

O le vaiaso fou lea ua toe tolopo i ai le isi iloiloga a Samana e tusa ai o lenei mataupu.