E ui e le i auai le afioga i le alii Kovana Sili ia Lolo Matalasi Moliga i le fa’amanatuina o le fu’a a le atunu’u i lenei tausaga, peita’i sa mafai ona momoli mai ona alofaaga i le atunuu aemaise ai malo valaaulia, e ala i sana tusi sa tolaulauina e le tofa Fiu Saelua i le taimi o le sauniga o le fu’a i le aso Tofi na te’a nei, i le malae o le Veterans Stadium i Tafuna.

Saunoa Fiu e fa’apea, o le afioga i le Kovana le tumau ia Lemanu Peleti Mauga na fuafua na te fofogaina aloaaga o le alii kovana ia Lolo, ae talu ai e le i mae’a ona faitau e Lemanu alofaaga o le kovana i le taimi sa ia fa’ata’ita’i ai ona faitau le tusi a le alii kovana, ona o le maligi o ona loifofoga, na mafua ai loa ona tofia o ia na te faitauina alofaaga o Lolo mo le atunuu.

Na oo lava fo’i i le tofa a Fiu, sa tutulu fo’i i le taimi na ia faitauina ai alofaaga o le alii kovana mo le atunu’u.

Saunoa Lolo e fa’apea, e ui e le o i ai lona tino i le fa’amanatuina o le fu’a i lenei tausaga, ae o lo o mafanafana lona loto o lo o laina tutusa o ia ma le atunuu atoa i le fa’amanatuina o lenei aso taua, e le gata i tulaga faaleaganuu ae faapea fo’i i le agaga o le Atua.

“Ou te fa’afetai atu ia te outou uma e tusa ai o a outou talosaga mo a’u, a o o’u toese ai ona o gasegase o le tino, o a outou talosaga ua mafua ai ona toe faaopoopo e le Atua le isi malosi fa’afouina mo a’u, ou te nofo tapua’i atu ai mo le fa’amanatuina o le fu’a a Amerika Samoa,” o se vaega lea o le tusi a le alii kovana.

Sa ia faafetaia fo’i le afioga i le alii Palemia o Samoa, susuga Tuilaepa Lupesoliai Sa’ilele Malielegaoi ma le Ulu o Tokelau Kuresa Nasau, i lo la taliaina o le valaau ina ia auai i le faamanatuina o le 114 o le fu’a a Amerika Samoa i lenei tausaga.

O talosaga i le taimi o le sauniga lotu o le fu’a, faapea ai ma vaega o pese fa’aleaganu’u a aufaipese sa fa’afiafia i le fu’a o lenei tausaga, sa manatua ai le gase gase fa’atafa o le ali’i kovana ia Lolo, a’o aumau ai i atunuu mamao.

O se vaega o le pese a le afioaga o Pago Pago i le taimi o le latou pese faaleaganuu, na talosia ai le sailiga fofo a le alii kovana i atunuu i fafo, ina ia vave mai se aso e toe feiloa’i ai ma le ta’ita’i o le atunu’u.

E o o fo’i i le pese a le kamupani o le StarKist Samoa, BlueSky Communication ma le afioaga o Saanapu mai Samoa, sa latou taua fo’i lo latou nonofo tatalo ina ia toe vave fa’afo’isia le malosi o le ali’i kovana.