Ua fa’ailoa mai ua le o toe i ai le nusipepa a le malo o le Tapuitea, lea sa masani ona tufa fua atu i ana matagaluega, ina ia silafia ai galuega o loo faatinoina e le malo e aofia ai galuega ua faaulufale, galuega ua amata, faapea ai atina’e ua mafai ona ausia mo le manuia o le atunuu.

Sa fesiligia le tofa Tialuga Vince Iuli o loo galue i le ofisa o le kovana e uiga i lea mataupu, ma ia taua ai e faapea, o loo i ai le faamoemoe o le vaiaso fou e tatau ona toe sau ai i tua le isi lomiga o le Tapuitea.

O se mea e ao ina silafia e le atunu’u, o lea nusipepa fa’asalalau, e na’o matagaluega o le Malo e te maua ai se Kopi, ae afai e te va’aia i le faleoloa, e le maua ai! Peita’i, e i ai fa’asalalauga taua e lomia ai i lea nusipepa, e aoga ai ona e taua’aoina se kopi.

O nisi o ia ituaiga o fa’asalalauga e fa’aulu mai lea e le Ofisa o Tagata Faigaluega a le Malo. Peita’i, ua fa’ailoa mai, e matele fo’i ina fa’ailoa mai nisi o avanoa o fia maua ni tagata faigaluega, ma o se aoga tele lea mo le mamalu lautele. E ese mai lea, ua toe fa’asalalauina fo’i nei lava avanoa i le laupapa i totonu o le Ofisa o Tagata Faigaluega, ma e fa’aalu fo’i i le tatou nusipepa nei a le Samoa News i le tele o taimi.

E ese mai lea, ae ua fa’aalia mai ai nisi o asiasiga i le Ofisa o le Kovana Sili ua le maua fo’i e le ‘au fa’asalalau tau nusipepa lautele ma e lelei lava ona fa’aauau lea tautua. Ua fa’ailoa mai, “ua fai si umi e le’i toe lomia mai se Tapuitea, ae talosia ia, o le a toe fa’aauau mai lea tautua i le vaiaso a sau e pei ona fa’ailoa mai.”