Ua fa’aalia e le Pulesili o le Ofisa o le Litaea a le malo ia Luatua Filisouaiga Ta’afua i sana tusi i le Ta’ita’ifono o le Komiti Fa’afoe o le Litaea, lona le taliaina o le fautuaga sa tu’uina atu e le Komiti Fa’afoe ia te ia, ina ia malolo mai lona tulaga fa’a ta’ita’i o loo ia tauaveina, ona e i ai lona talitonuga, e leai se malosi fa’aletulafono latou te faia ai lea ituaiga fa’atonuga.

O le tusi a Luatua ua mae’a ona tu’uina atu i le Ta’ita’ifono o le Komiti Fa’afoe o le Litaea ia Fanene Morris Scanlan, faapea ai totino uma o le Komiti Faafoe, o sana tali atu lea i le fautuaga ua mae’a ona tuuina atu e le Komiti Fa’afoe ina ia fa’amavae ma malolo mai lona tofiga fa’a ta’ita’i, e mafua mai i tu’uaiga o le fa’aaoga sese o tupe fa’apea ai fa’aiuga le sa’o o loo tu’uaia Luatua sa ia faia.

E lua tusi na tusia e Luatua ma tuuina atu ia Fanene ma le Komiti Fa’afoe o le Litaea, o le tusi muamua sa tusia i le gagana Samoa, lea na tuuina atu i le aso 10 Iulai 2015, lea sa ia fa’atoese ai ia Fanene ma ia ta’utino e le toe tula’i mai lea fa’aletonu i le lumana’i, ae o le tusi lona lua na tuuina atu i le aso 24 Iulai, lea o loo ia teena ai le fautuaga ina ia malolo ma fa’amavae ese mai le tofiga Ta’ita’i.

TUSI MUAMUA A LUATUA

Na taua e Luatua i lana ulua’i tusi ia Fanene, o le mataupu i le fa’aaogaina o le ‘rubber stamp’ a le ofisa, o mea lava ia na alu atu o ia i totonu o le Ofisa i taimi ua mavae o loo fai, ae ua ia fa’afetaia suiga ua faia e le Ta’ita’ifono ua mafai ai ona foia ia fa’afitauli.

I tu’uaiga fa’asaga i le kamupani teu fale o le Hardcore lea sa totogi i ai tupe ae le o lesitalaina fa’aletulafono i faiga fa’apisinisi, na ta’utino Luatua ia Fanene e fa’apea, “o Hardcore, o le igoa lava o le matou kamupani ua leva mai lava i aso ia o fai le matou konekarate kamuta, janitorial, cleaup, landscaping ma tulaga uma faapena.”

“I le agaga mama ia te a’u lava ia e le aofia ai matagi i se taofi, sa ou faapea lava o le auala sa’o lea e fai ai. Peita’i ua ou toe mau manatu mulimuli ane e i ai le isi auala e sili atu ona lelei sa tatau ona fa’aaogaina e ese mai le auala lea. Ua avea le alu tele o lo’u mafaufau i le taugofie ma le convenient mo le Fund ma auala ua le atoatoa ai la’u fa’aiuga i le mataupu lea. O le mea lea Chairman, ou te faamaualalo atu i lau afioga e le toe tupu se mea faapea.”

TUSI LONA LUA

I le tusi lona lua a Luatua i le aso 24 Iulai, na matua ese ai le gagana sa fa’aaogaina e le Pulesili o le Ofisa o le Litaea i lea tusi, e le gata sa ia teena tu’uaiga fa’asaga ia te ia, ae sa ia fa’aalia fo’i lona teena o le fautuaga e fa’amavae ese mai i lona tulaga.

“Ou te teena tu’uaiga e faapea sa i ai se mea sese sa ou faia i le muamua lea totogi le tupe mo lo’u pasese. I le avea ai o oe ma totino pito i matua o le Komiti Faafoe o loo i ai nei, ua e masani lelei i ta’iala ma tulafono o loo lima ta’ita’iina ai galuega a le Komiti i mataupu faapenei, o ia fo’i tulafono sa pasia e le Komiti Fa’afoe i tausaga ua mavae, lea lava o loo fa’atautaia ai galuega e oo mai lava i le taimi nei,” o se vaega lea o le tusi lona lua a Luatua ia Fanene o loo tusia i le gagana fa’aperetania.

Sa ia teena fo’i lona faia o ni gaioiga fa’aalatua e totogi atu ai tupe a le Litaea ia te ia.

“Ou te ta’utino atu ia te oe e leai ma se taimi na ou sainia ai se siaki mai teugatupe a le Litaea ma le fa’amoemoe e afaina ai teugatupe a le Litaea.”

“Ma le isi tulaga, ou te le taliaina le fa’aiuga a le Komiti Fa’afoe e fa’amalolo a’u mai lo’u tulaga i le taimi lenei, ona e le o mafai e le Komiti Fa’afoe ona latou fa’ailoa mai ia te a’u mafua’aga ua ala ai ona a’e so latou taofi e fa’amalolo a’u mai lo’u tulaga. E i ai fo’i ta’iala mai le Fa’amasinoga e uia mo mataupu fa’apenei, peita’i e le o mafai e le Komiti Fa’afoe ona latou fa’ailoaina mai ia tulaga uma ia te a’u.”

“E le gata fo’i i lea, ou te le taliaina fo’i le fa’aiuga a le Komiti Fa’afoe ina ia fa’amalolo a’u mai la’u galuega, ona ou te talitonu, e leai se malosi fa’aletulafono o loo i le Komiti Fa’afoe latou te tuuina mai ai lea ituaiga fa’aiuga ia te a’u. E pei ona ou fai atu, o loo i ai ta’iala ma tulafono e lima ta’ita’iina ma mulimulita’i i ai galuega ma tagata faigaluega.”

Na taua e Luatua ia Fanene e fa’apea, o le faia e le Komiti Faafoe o lenei fa’aiuga, ua atagia mai ai le oo atu o le latou malosi i le malosi o loo fa’atula’i mai e le tulafono.

“Ona o mafua’aga eseese uma e pei ona ou taua i la’u tusi, ou te talosagaina ai ma le fa’aaloalo le Komiti Fa’afoe ina ia toe silasila toto’a i lenei mataupu, ma tuu ese la outou fa’aiuga sa tuuina mai ina ia ou malolo mai la’u galuega mo le 30 aso,” o le vaega fa’ai’u lea o le tusi a Luatua ia Fanene ma totino o le Komiti Fa’afoe o le Litaea