Ads by Google Ads by Google

Leai ni fa’au’uga tuufa'atasi - Pue ata fanau ma fa'alauiloa i televise:


[ata: foa'i]

Pago Pago, AMERIKA SAMOA -

 

Ua fa’ailoa e le tamaitai fa’atonu sili o le Matagaluega o A’oga, Dr Ruth Matagi-Tofiga le suiga o le a fa’atautaia ai sauniga uma mo fa’auuga o le fanau i lenei tausaga ona o le fa’asa o feagai ai ma le atunuu ona o fa’ama’i pipisi.

 

E afua mai i le sauniga tele o le Pakaloli, o le a tasi lava le sauniga tele mo a’oga maualuluga uma i lenei tausaga, o le a le aofa’atasi i ai le fanau a’oga uma ma aiga, ae o le a pu’ea muamua le sauniga ona maimoaina lea i le televise e tagata uma.

 

O le a faia le sauniga o le Pakaloli fa’apea ma fa’au’uga i le masina o Iuni mo a’oga maualuluga uma lava.

 

Ua vave fa’ailoa mai lenei fuafuaga ua fa’ataoto mo fa’au’uga o le fanau, ona ua matauina, ua amata ona le mau nofo fo’i le pa’ia o matua ma aiga, i le tapenaga o fuafuaga mo le fanau i o latou aso fa’apitoa.

 

Ua faailoa mai fo’i e Matagi-Tofiga o i latou ma le vasega o pulea’oga fa’atasi ma faufautua a vasega fa’aiuaso uma ua tele taimi ua latou fono ai pea ina ia soalaupule le fa’amoemoe o fanau fa’aiuaso i lenei tausaga ma lona fa’ataunuuina.

 

“E mafua ona talanoa i matou ina ia mafai ona feutaga’i le faiga e faia ai fa’au’uga, ae maise o le va’ai toto’a fo’i i le aotelega o fanau fa’au’u mai vasega fa’aiuaso i a’oga ta’atasi. Ia mafai fo’i ona usita’ia le fa’asa o lo’o faia nei i mea uma e fa’atino mo nei fa’au’uga uma,” o se tala lea a Matagi-Tofiga.

 

Aofa’i o fanau fa’au’u mo lenei tausaga mai a’oga maualuluga a le malo: Fagaitua High e 142 tamaiti; Leone High 130 tamaiti; Nuuuli-Voctech High 71; Samoana High 192; Manu’a High 12 tamaiti ma le a’oga Tafuna High 242 tamaiti a’oga.

 

A tuu fa’atasia uma i latou nei e atoa ai le 789 tamaiti fa’au’u mai a’oga maualuluga a le Malo i le 2020.

 

Ua tofia i le fonotaga fa’apitoa mo Pule Aoga ma Faufautua o vasega fa’ai’uaso uma a aoga maualuluga le ali’i Faife’au Rev. Iasepi Ulu, Faife’au o le EFKAS i Fagatogo, e avea ma fa’afeagaiga e ta’ita’ia le sauniga mamalu o le Pakaloli lea ua fa’atasia mo a’oga uma.

 

Ua fa’ailoa mai o le a pu’eina lava lea sauniga lotu fa’apitoa e pei lava o le polokalama masani, ae o Faufautua i Vasega Fa’aiuaso uma i a’oga taitasi ma  fanau a’oga e latou te tu’ufa’atasia nisi o latou ata pupu’u e fa’ailo ai polokalama eseese ma mafutaga eseese sa fa’atino e vasega fa’aiuaso mai a’oga taitasi ina ia fa’aalia a’o fa’asolo lea sauniga mamalu.

 

“O le aoga fo’i o nei sauniga e fa’asolo mai e le televise mo le fanau ma aiga e maimoaina, ona o le a mafai fo’i ona fa’aulu ai ma nisi o mea sa le mafai ona toe ofi i sauniga masani o faau’uga ona e umi tele ai le taimi e fa’atautaia ai fa’au’uga. O le a i ai le avanoa e lauga ai sui ua lautogia i a’oga ta’itasi i le tulaga togisilia, ae maise fo’i o se upu fa’amalo mai le sui sa avea ma Peresetnee o Vasefa fa’aiuaso ta’itasi i lenei tausaga aoga,” o se fa’apupulaga atili lea e tusa o le sauniga o fa’au’uga a le tamaita’i fa’atonu.

 

“O fa’au’uga o le fanau mai a’oga maualuluga, o se isi lea amataga ona soifua tuto’atasi o fanau, ma ua avea o se mea sili ona taua ia i latou ae maise o latou aiga, ua avea i latou ma tagata matutua, ma o le a matu’u ese atu mai le pule ma le puipuigamalu a matua i a latou fa’aiuga e faia aua le aluga i le lumana’i o latou olaga. Ua le mama fo’i la i le ASDOE le taua o lea taimi mo vasega fa’aiuaso o lenei tausaga 2020.”

 

O le fa’asologa o fa’au’uga ua amata mai le Laumua i le Manu’atele Iuni 12; Samoana ia Iuni 15; A’oga Matata Eseese a le Nuuuli Voctech High Iuni 16; Leone High ia Iuni 17; Tafuna High ia Iuni 18; Fagaitua High ia Iuni 19.

 

E pue’a uma nei sauniga mamalu e le tatou Faletelevise a le KVZKTV ma o le a galulue fa’atasi i latou ma le Matagaluega o A’oga ina ia fa’aalia i luga o alaata uma o le Televise, ma sootaga fa’ainiteneti ina ia fa’aalia fa’alaua’itele mo le maimoaga a le mamalu lautele.