TATALA FALETA’ALO TAFUNA ELEMENTARY - SUA ELEELE ISI GALUEGA

O le taeao o le aso Faraile ua te’a sa tatala ai le galuega o le faletaaalo a Tafuna Elementary, ua mae’a fa’atula’ia nei. O lea galuega sa fa’afoea e le Light House Construction a le afioga Ma’ae Bob Tuiasosopo, ma i lana tau sa ofo e $444,431.

Peita’i e tusa ai ma le fa’amalamalamaga a le tamaita’i fa’atonu o galuega i lona taimi atofa mo se tala o le galuega, sa toe i ai le isi Kamupani Faufale na toe malo i le isi vaega lua o le galuega ina ia teuteuina ia matagofie, e tusa ai ma fanoga sa moomia e le tamaita’i Pule A’oga o Lauleva Polu, lea ua tu’ua nei le galuega ae malolo tumau.

I le saunoaga a Kovana Sili Lolo Matalasi Moliga, “E fa’asefulu lelei ona ou asiasi mai i le galuega lenei a’o fa’atautaia, e fa’alima ona asia ona o talosaga atu a le tamaita’i pule a’oga ua maliu nei. O Fautuaga uma lava ina ia matagofie le latou faleta’alo, lea ua ia le ootia le lipine. Peita’i ua ou talosaga atu i le finagalo malie o le Laumua ma le PTA a lenei a’oga,  Ae a se tofa ae tatou fa’asuafaina lenei faleta’alo i lona igoa, Lauleva Polu.”

Na patipatia lea tulaga, ma ua fa’ailoa fo’i le talisapaia e le PTA lea fa’amoemoe. O le konekarate lona lua sa faia le pa siomia ua aofia atu i ai ma le isi galuega uma ua toe fa’aopoopo i le fale ta’alo lava latou na pasia le ata mai le amataga, na fa’atino lea e le H & H. Constructrion lea e pule Mr Ou.

E lua sauniga na fa’atino i lea taeao matagofie. O le ulua’i sauniga i fafo o le faleta’alo sa ootia ai le lipine e ulufale ai i totonu mo le maimoaga ma le toega o le polokalama saunia, sa taita’ia lea sauniga e le faife’au tofia Rev. Eleasaro Fa’ata’a o le EFKAS i Petesa Tai lea e fa’afesaga’i lona malumalu ma le a’oga i le isi itu ala.

Ona o nei teuteuga fa’aopoopo sa toe talosagaina ma tapena ai le isi konekarate latou te fausia ia mae’a vave, ma ia tino mai ua ese mai fo’i le fausaga ua tula’i mai ai le Laumua o Agelu Lanumoana nai lo isi uma faleta’alo ua tutula’i nei i le atunuu. I le fua atu i ai e lua lelei malae ta’alo Volleyball ma Basketball e ofi i lea faleta’alo, ma o se tapenaga aoga fo’i mo le lumana’i o ta’aloga i le olaga o fanau a’oga ma le malo fo’i e talimalo ai i ta’aloga fa’avaomalo.

 O le tau na ofoina e le H&H Constrution mo lona sao i teuteuga o le galuega i Tafuna Elementary e $584,000 ma ua tula’i mai ai le tau aofai o le galuega i lea Laumua e $1.2miliona ma ua mae’a lelei fo’i nei galuega uma.

Saunoa le kovana, “O le lelei ma le matagofie ose galuega fausia mo so’o se laumua, e fa’amoemoe ia te outou o lo’o fa’auluulu i ai le laumua ma le PTA, a’o fausia e mafai ona talosaga ma faufautua i nisi mea e fa’aopoopo ia mae’a ane le galuega, e tu mati’e i nisi ona foliga ua fausia ai, e pei o lenei galuega. Fa’afetai i le moe manatunatu o le pule a’oga, lea ua va’aia suiga lelei i le galuega lenei, fa’afetai. Ua fa’aalu aoga tupe a le Malo ma le matagaluega, ua fa’afiafialoto le va’aia i suiga lelei ua fa’atula’i mai.”

I le sauniga sa suaina ai le eleele mo galuega e Fa ua fuafua e amatalia, sa lautogia ai sui mai Laumua Ta’itasi ina ia auai e sua le eleele ma sui fo’i o latou Kamupani Faufale ua lautogia mo nei galuega ta’itasi.

O le A’oga lea a Manulele Tausala Elementary sa pa’au atu ai le latou Pule A’oga Martha Sagapolutele; O le A’oga a Gov. Uifa’atli Peter Coleman i Pago Pago na pa’au atu ai le latou Pule A’oga Tasha Atioo, Le Laumua i Lupelele sa oo atu ai foi le latou Pule A’oga Makerita ma le Aoga Maualuga a Matata Eseese a le Nuuuli Voctech High na faatasi atu ai le tamaitai pule a’oga o Valasi Lam Yuen, lea ua fa’atautaia nei e le Nana’s Construction, ma sa auai fo’i le tausi Fiapaipai Tuaolo Fruean e suaina le latou eleele mo lea galuega. Ina ua mae’a fo’i lenei vaega o le sauniga mamalu, sa nafa loa fo’i le laumua i Tafuna Elementary ma le latou taligamalo e ala i le taumafataga na tufatufaina.

SUA ELEELE - GALUEGA SOSO’OGA UAFU LONGLINER I MALALOA

O le taeao o le aso Tofi i le Uafu o Va’a Faila i Malaloa na sua ai le eleele e toe galueaina ai ni suiga lelei i le fa’alautele, soso’o ma fa’aleleia atili lea Uafu, ina ia fa’atulaga lelei ai le itu e taula mai i ai va’a fagota Longliners.

O lea fa’amoemoe sa talimalo ai le Matagaluega o Uafu ma Malaeva’alele, lea e ona lea galuega, i le tama’ita’i fa’atonu o Taimalie Claire Tuia-Poumele ma lana aufaigaluega.

Na tatala le fa’amoemoe i le sauniga lotu na ta’itaia lea e Rev. Fa’ata’ita’i R. Fa’avae o le EFKAS i Pago Pago, ma fa’asolo ai le polokalama na fa’atulaga mo le fa’amoemoe. E pu’upu’u lava le polokalama ona o aiaiga e le tatau ona fa’aumiumia fa’amoemoe fa’apenei i lenei vaitau. O le tau o le galuega na saunoa i ai Tuia-Poumele e $3.96mil mo le vaega muamua lenei o le galuega. O le sao o le DOI e $1.5miliona.

Saunoa le afioga i le kovana sili, Lolo Matalasi Moliga, “O le galuega e le gata ai i le vaega muamua. O le isi vaega tele o le galuega o lona vaega lua, lea e saili ai le $10 Miliona e tatau ona fa’agaoioi ma mae’a ai.”

Peita’i, a’o le’i saunoa o ia e tusa o le galuega, sa ia mua’i fa’aalia lona le fiafia i le Fisheries Council la e avea ai Taotasi Archie Soli’ai ma latou Taitaifono i lenei tausaga. “Atonu o lo ua tofia nei e le vaega lea se tasi o alo o le atunuu e avea ma latou ta’ita’ifono, ae fiu e talosaga atu se fa’atupega mo galuega fa’apenei i le atunuu ma le malo, ae le tali mai ise tali e aoga mo Amerikka Samoa. Amata mai lava lenei nofoaiga e na’o le te’ena mai ma sofa’i mai isi mea uma na fuafua mo le leleiga o le atunuu ma le aufaifaiva.”

O le konekarate ua malo i le tauofoga e fa’atinoa lea galuega o le Silva Group Corp, ma sa auai fo’i le latou Pule Sili Jasinta Silva mo sana saunoaga, lea sa ia fa’afetaia ai le avanoa ua latou maua e fa’atino ai le galuega, ma o le a avea fo’i ma se avanoa lelei, e latou te fa’aailoa atu ai so latou agava’a i lea fo’i ituaiga o fausaga ua sauni atu e faia. O le fausaga o le Uafu ma le galuega o le a fa’atino, ua saunoa i ai le tama’ita’i fa’atonu o Uafu ma Malae va’alele, sa nafa le fausaga poo le ata o le galuega ma Tinai Gordon & Associates ae o Inisinia e to’alua a le Port Administration ua atofa mo lea galuega o le tamaita’i o Natalia Palamo ma Mika Aga. Na tula’i fo’i Natalia Palamo e fa’ailoa le galuega o le a i ai se vaega e toe fa’aloloto atili ma fa’alautele, fa’asao atu aga’i i Pago Pago. O le nofoaga tonu lea o le a taula ai va’a fagota ituaiga o Longliners.

I le saunoaga fo’i a Taimalie sa ia fa’afetaia ai se avea’i sa savalia ai lona Ofisa e le vasega o faipisinisi o le atunuu, Peter Grispin, Tom Drabble, Joe Wielemann, ma isi ina ia talosagaina se nofoaga tonu e taula i ai va’a fagota tetele nei a le atunuu. O nisi o nei fa’amoemoe o taimi e fia fa’atino ai fo’i ta’aloga a le Gamefishing ma e mana’omia fo’i se vaega lelei o le Uafu e taula ai nei va’a e auai mai.

“O va’a fagota longliners ua tulia mai i latou mai le uafu a le StarKist, ua fe’oma’i ma ua ave’esea mai fo’i le uafu tele ma uafu laiti o va’a la’u pasese, ae o lea la fa’ato’a tali le malo, ua amata ai nei le galuega lelei mo i latou.”

Pe afai e ma’ea lenei vaega muamua o le galuega tele lea i Malaloa, ua fa’ailoa mai, o le a i ai le sapalai o le Eletise ma le Suavai Mama e fa’aaoga i luga o lenei Uafu. Ma i lenei fo’i galuega, ua tima’ia le Konekarate ua toina i ai le fa’amoemoe o le malo, ia faia galuega uma ma le saogalemu, ia mua’i mataituina lava le saogalemu o tagata faigaluega mai fa’ama’i pipisi ma so’o se mea lava e faigaluega ai a’o faia tiute i le Uafu lea. Ua fa’apena fo’i ona va’aia toto’a va’a faila ma isi va’a uma, ina ia le afaina i so’o se mea e fa’atino i le galuega.

O le umi o le galuega lea e tatau ona mae’a lelei ia Novema 2020.