TALIA LE ISI TO’ATOLU FANAU A’OGA MILITARY ACADEMY

E toatolu fanau a’oga ua ausia nei e i latou se la’asaga lelei tau le aoaoga i le lumana’i o lo latou olaga taumafai, ma ua fa’ailoa mai ua talia mai i latou i a’oga a le Militeri mo le tausaga a’oga fou. O i latou nei ua fa’ailia mai e le tatou Faipule i le Konekeresi, Aumua Amata, o Serenalia Iona o Leone High, lea ua maua lona avanoa i le US Air Force Academy i Colorado, ae e tatau ona pasia e ia le suega o lona soifua maloloina.

O le isi to’alua lea ua fa’ailoa mai o lo’o maoa’e le avanoa mo i la’ua e ulufale ai i le US Air Force Academy o le tamaitai talavou o Dovida Fuiava mai le Manumalo Academy mo le US Air Force Academy prep school. O le isi o le ali’i o Daniel McMoore mai Samoana High School i le US Naval Academy prep School i Annapolis, Maryland.

Fa’ailoa e Aumua, “O avanoa fa’apenei mo le fanau e ulufale ai i nei a’oga a le Militeri, e le faigofie aua e tatau ona matua lelei togi, ma ua filifilia i latou e ulufale ona ua ausia e i latou nei togi maualuluga, ma isi fo’i agava’a fa’atulagaina tau le amio lelei ma le tinou i a’oa’oga. O la’u fa’amaoniga fo’i ua le fesiligia pe a va’aia le fanau e naunauta’i ma fa’aosofia i so’o se taimi e fia iloa atili i so’o se latou mataupu e tau’avea i a’oga.”

“Tau ina ia manatua e lenei vaega o le fanau a’oga o Amerika Samoa, e leai se mea e muta ai le luamana’i saili o so’o se tasi e na te fa’aaogaina avanoa lelei fa’apenei i lona soifua taumafai i le sailiga o le atamai lautele. Fa’amalo le tausinio.”

“Fa’amanuia atu i lo outou filifilia mai nei a’oga ale Militeri Serenalia Iona, Dovida Fuiava ma Daniel McMoore, ia malamalama o outou ala, ma sa fa’amanuia le Atua ia te outou e ala i le sailiga o le amatai,” o se saunoaga lea a Aumua.

Sa ia toe fa’ailoa mai fo’i lana fa’afetai i le vasega o faia’oga uma sa latou aoaoina nei fanau mai le amataga o lo latou olaga aoaoina.

TULATA INA AMATA GALUEGA FA’ALELEIA MEATOSOVA’A

I le folasaga a le tamaita’i fa’atonu o le Uafu ma Malaeva’alele, Taimalelagi Dr. Claire Tuia Poumele i le sauniga sa fa’atautaia e sua ai le eleele mo le amatalia o le vaega muamua o le fa’aleleia o le Uafu o Va’a i Malaloa.

“Ona o le tele o tatou va’a ua mana’omia ona fa’aleleia, ma ua fa’amatuu mai fo’i e le Initeria  le vaega tupe e toe fa’aleleia ai lea tautua aoga tele a le tatou Malo, o lona uiga e le o toe mamao lava ae tatou va’aia loa ua toe amatalia galuega mo tatou Va’a uma i le atunuu, pe a mae’a faaleleia mea ua tatau ona lipea lelei i lea tautua a le Malo,” o sana tala lea ina ua oo ane lona mafaufau i le tulaga o isi va’a la’u pasese ma uta a le Malo e malaga i le Manu’atele o lo ua le mafai ona toe malaga i le taimi nei.

“Ua tatou iloa lelei e tatau lava ona fa’atasi le tulaga o le fa’aleleia o lenei Uafu mo va’a fagota Longliners ma le i ai fo’i o le auaunaga lea a le Mea Toso Va’a ina ia toe lipea ai ni fa’aletonu i o tatou va’a fagota, va’a la’u pasese ma uta, ma e tele fo’i le aoga o lea tautua i le tele o isi va’a e talosagaina mai le toe fa’aleleia i le tatou tautua lea. Fa’afetai ua ataata mai ata o tau lelei, ma e le o toe mamao ae tatou toe fiafia fo’i ua faigofie ona toe fa’aleleia tatou Sa pe a amatalia latou galuega,” o sana toe saunoaga lea e tusa o le mana’omia o lea tautua e lana matagaluega.

O lea matagaluega o lo’o tau’avea fo’i e se ta’ita’i ua tofia i ai e le Kovana, Liu Siakisone, mo le taimi nei, ae le’i faia sana tofiga mo le iloiloga a le fono faitulafono ina ia pasia ai.

TOE FILIFILIA SEN. FAIIVAE - PERESETENE KOMITI FA’AFOE FFAS

Ua fa’ailoa mai i le amataga o lenei masina ua mae’a le fonotaga e toe filifilia ai tofiga mo le FFAS poo le Football Federation American Samoa, lea e fa’afoe tatou ta’aloga Soka i le atunuu, ma ua toe tula’i mai ai le afioga Senatoa Faiivae Iuli Godinet i lona tofiga Peresetene mo le isi fa tausaga.

Ua toe tutula’i mai fo’i lana Komiti Fa’afoe tuai sa latou galulue mai i le fa tausaga ua tuana’i, e to’aono i latou i lea Komiti Fa’afoe.

“Ou te fa’afetaia le mau talitonuina o lo’u sui fa’atauva’a e le mamalu o le matou Asosi o Ta’aloga Soka i Amerika Samoa nei, fa’afetai fo’i mo le tatou galuega aua e le na’o a’u e fa’atinoa le galuega, e tatau lava ona tatou maua le agaga o le galulue fa’atasi ma le feoeoea’i i so’o se mea ona tino mai lea ua lelei,” o se saunoaga lea a le Peresetene i le latou fonotaga na usuina i le aso Lulu na te’a nei, mo le fa’amoemoe e saili tofiga.

O le aotelega o Kalapu Soka i le atunuu e 11, peita’i e le’i mafai ona palota le isi lua o nei kalapu, ona e i ai ni fa’aletonu sa le mafai ai ona faia se latou palota.

O le Komiti fa’afoe ua toe tutula’i nei e aofia ai: Peresetene Faiivae, talu mai le tauasga e 2008; Rev Elder Ioane Evagelia o Utulei; Sandra Fruean o le PanSa; Amio Mavaega-Luvu o le Lione Heart; Sen. Fano Mitch Shimasaki o le Green Bay; Tausaili Ott o le Black Roses; ma Silasila Samuelu o le Pago Youth.

O le fa’afa lenei ona tofia pea o le afioga Senatoa Faiivae e avea ma Peresetene, ma ua i ai fo’i ni suiga poo teuteuga o latou tulafono tamau ua fa’aulu i lenei tausaga ma ua leai ma se suiga ua fa’atutu aga’i e suia ai aiaiga o palotaga.

O se suiga ua tatau lava ona faia ua fa’ailoa mai o le suiga lea o le agava’a e avea ai se kalapu soka ma totino o le Asosi Soka o lo’o i totonu o le FIFA. O se suiga lava lea e tatau ona faia, ia le suia ai fo’i lea fesoasoani e toina mai e le FIFA mo lea fa’agatama i le atunuu.

O le suiga, ua fa’ailoa mai, o kalapu uma i le Asosi, e ao ina tofu ma le ‘au a tama ma le au a teine i le vasega o fanau talavou laiti ma fanau talavou matutua. O lona uiga e tatau ona to’atele atu nisi tamaiti ma teineiti fa’aopoopo e ta’a’alo Soka i kalapu ta’itasi.

I le taimi nei, ua taofia ai le tele o fa’agatama fa’atauva sa fa’atulaga e le Soka mo le fanau talavou o loo aofia i a latou lisi o totino i le atunuu. Ua fa’apea fo’i ona taofia ai le tele o koleniga e tatau ona faia mo au ta’a’alo fa’avaomalo a le FFAS i le atunuu, ae fa’afetaia fo’i, aua o lo’o fa’apea uma lava ona a’afia au ta’a’alo soka a atunuu ta’itasi o le lalolagi.

“O lo’o i au lava galuega ua mae’a fuafuaina ma ua fa’ataunuuina fo’i, e ui ona o lea e taofia mea uma ona o fa’ama’i pipisi. E le tatau fo’i ona matua leai lava se mea e fai, ua fuafuaga fa’aataoto ua mae’a fa’ata’atitia e fa’atautaia ai le aluga o le Soka i le atunuu, ua sauni mo le taimi lava e matuu ese atu ai le fa’asa, ae amata loa ona fa’atamo’e. Toe fa’afetai atu i le tofiga ua ou toe pale ai nei, o la outou pule lea, o ai lava le tagata vaivai ua outou manatu mai ai. Fa’afetai tele,” o le toe saunoaga lea a le ali’i peresetene.