Ads by Google Ads by Google

Solofua moliaga faaaoga faasolitulafono eletise ASPA faasaga aiga Futiga


[ata: SN]
ausage@samoanews.com

Pago Pago, AMERIKA SAMOA - Ua solofua e le Faamasinoga Faaitumalo le tagi a le malo sa faia faasaga i sui o le aiga o Aetui mai Futiga, i lo latou faaaoga faasolitulafono lea o le eletise mai le Pulega o le Eletise ma le Suavai a Amerika Samoa (ASPA).

 

O le faaiuga e solofua ai le tagi faasaga ia i latou e to’atolu na molia i lenei mataupu, na afua mai lea i se talosaga a le ASPA sa tuuina atu i le malo, ina ia solofua le tagi faasaga i le aiga o Aetui, ona o lea ua mae’a ona faia sa latou maliliega, e aofia ai le totogiina atu e le aiga o Aetui o le tupe o lo o nofoaitalafu ai i le ASPA, e aofia ai ma le totogi o le fa’aaoga faasolitulafono o le eletise a le ASPA.

 

O le vaiaso na te’a nei na faatulaga e faia ai le ulua’i iloiloga o lenei mataupu. Ina ua valaau le mataupu faasaga ia Michelle Aetui-Fuimaono, o lona to’alua o Kirk Aab, faapea ai lona tuagane o Ernie Aetui, na faailoa ai loa e le alii Loia Fautua ia Bob Stuart le sauni o le latou itu mo le iloiloga.

 

Ae ina ua fesiligia e le Faamasinoga le itu a le malo pe ua sauni mo le iloiloga, na tali le tamaitai Loia Sili lagolago ia Laura Garvey, e le o sauni le malo e valaau se molimau, sei vagana ai le talosaga o loo fia tuuina atu i le Fa’amasinoga.

 

Na taua e Garvey e faapea, ua maea ona logoina le malo e le ASPA, ma ua latou talosagaina le solofua o lenei mataupu, ona o lea ua maea ona faia se maliliega i le va o le ASPA ma le aiga o Aetui.

 

Talu ai ua le mafai e le malo ona tuuina atu ni mau e lagolago ai le latou tagi faasaga ia i latou e to’atolu na molia, na faia ai loa e le Faamasinoga le faaiuga, e solofua ai le tagi faasaga ia te i latou.

 

Talu mai le taimi na molia ai i latou nei i le masina na tea nei, sa taofia pea i latou i le Toese i Tafuna, e le i mafai ona latou totogi le vaega tupe sa faatulaga e tatala ai i latou i tua.

 

Na taua e le sui o le ASPA sa i ai i totonu o le Faamasinoga, susuga Ryan Tuatoo e faapea, o le maliliega ua mae’a ona sainia i le va o le ASPA ma le aiga o Aetui, o le toe totogiina atu lea o le tupe e tusa ma le $6,500. O lea tupe, o le pili o le eletise a le aiga ua leva tausaga e le o totogia, atoa ai ma le totogi o le faaaoga faasolitulafono o le eletise i nai tausaga ia na latou faatinoina ai lea gaioiga.

 

Ua malilie le aiga latou te le toe faia lenei amio mataga, ae afai e toe faia i le lumana’i, o le a le toe i ai se avanoa e talosaga ai le ASPA e solofua le tagi, ae o le a faaauau loa ona tuuina atu le mataupu i le Fa’amasinoga.

 

O lenei mataupu na tofu atu i le Ofisa o Leoleo i Tafuna i le aso 22 o Aperila, ina ua talosagaina e se sui o le Ofisa o le Pulega o le Eletise ma le Suavai se fesoasoani a Leoleo, i se mataupu na tula’i mai i Futiga i le fanua o le au aiga o Aetui.

 

E to’atele Leoleo na tali atu i lea valaau ma maua ai loa le avanoa e fesiligia ai alii faigaluega o le Pulega o le Eletise ma le Suavai sa i ai i le nofoaga na tula’i mai ai le faalavelave, faapea ai ma i laua ua molia i lenei mataupu.

 

O le mae’a ai ona tu’u fa’atasia e Leoleo o faamatalaga mai le nofoaga na tula’i mai ai le faalavelave, na faia ai loa le faaiuga ina ia auina atu i laua ua molia atoa ai ma alii faigaluega o le Pulega o le Eletise ma le Suavai i le Ofisa o Leoleo i Tafuna mo suesuega atili.

 

Na taua e se sui o le ASPA i Leoleo e fa’apea, e to’atolu i latou na tofia e galulue i le faaleleia o nisi o laina eletise i le itu i sisifo o le atunu’u e aofia ai ma le afioaga i Futiga. Sa faasolo le latou galuega asiasi ma oo atu ai loa i le fanua o le aiga o Aetui i Futiga.

 

A o faia la latou galuega, na mafai ona iloa e ese tasi o alii o le latou vaega se uaea eletise o loo sau mai luga o le pou uila a le ASPA ma aga’i atu i le fale o le aiga o Aetui. O lea  uaea eletise o loo tanu i lalo o le palapala ae faapipii aga’i i le pou uila, o se taumafaiga ina ia faigata ai ona iloa e se tasi poo sui o le ASPA pe a faatino a latou galuega.

 

Na faailoa e le aufaigaluega i le latou Ta’ita’i sa i ai i le taimi lea le tulaga e pei ona maitauina, ma faia ai loa le faaiuga a le Taitai e tipi le uaea ina ia motusia ai le toe sapalai atu o le eletise i le fale o le aiga o Aetui. O le taimi fo’i lea na latou faailoa ai i le aiga o Aetui le gaioiga ua faia ona o le solitulafono o le auala na latou maua ai le eletise e aunoa ma lo latou totogiina atu o se tupe.

 

Na matua le fiafia Aetui-Fuimaono ma lona to’alua ia Aab i le taimi na logo atu ai e alii faigaluega o le Pulega o le Eletise ma le Suavai le gaioiga ua latou faia i le uaea eletise lea na ta’i faanana mai luga o le pou uila ma aga’i atu i le latou fale.

 

O le ova o le ita ma lagona le fiafia o le ulugali’i, na faatino lea e ala i le la lafo o upu palauvale aga’i i ali’i faigaluega o le Pulega o le Eletise ma le Suavai atoa ai ma le lafo i ai o upu tau faamata’u. Sa i ai ma le tuagane o Aetui-Fuimaono i le gaioiga e lafo upu mataga ma faia folafolaga tau faamata’u.

 

Na taua e se alii faigaluega i Leoleo e fa’apea, o Aetui-Fuimaono na savali atu ma palauvale atu ia te i latou, ae o lona to’alua o Aab na savali atu ma le Suo ma ia folafola lona sasaina o le ulu o le tagata ona o le soli atu fua o le fanua e aunoa ma se faatanaga. Sa faapea fo’i ona lafo e Aab upu palauvale i alii faigaluega.

 

O le tuagane a Aetui-Fuimaono, lea fo’i o lo o ta’u lona igoa i totonu o le tagi a le malo, sa ia savali atu ma tu i le faitoto’a o le fale ma se fana o loo u’u i lona lima, ma foliga mai o lo o ia faia ni gaioiga e faamata’u ai ali’i faigaluega, ma valaau atu i ali’i faigaluega e o ese ma le fanua.

 

Na faafesoota’i e se ali’i faigaluega le Ofisa autu o le Pulega o le Eletise ma le Suavai, ma fesili i ai i le taimi mulimuli na motusia ai le eletise a le aiga o Aetui. Na taua e se sui o le Ofisa autu, o le pili moli mulimuli lava a le aiga na totogi lea e Aetui-Fuimaono i le masina o Me 2018. O le latou pili moli o lo o i ai e le i totogiina lava e tusa ma le $6,500, a o lea ua latou faia le gaioiga faasolitulafono e toe faaola ai le eletise i le latou fale, e ala i le ta’i faagaoi o le uaea mai luga o le pou uila e aga’i atu i le latou fale.

 

Na taua e le isi alii faigaluega a le Pulega o le Eletise ma le Suavai ina ua fesiligia o ia e Leoleo, lona fefe ma le mata’u ina ua vaaia le aga’i atu o le aiga o Aetui ma laulauvavale atu a o faatinoina a latou tiute. I lona taofi, o lea ua tutuli ese i latou ae o loo faatino a latou galuega mo le manuia o le aiga o Aetui faapea ai tagata uma o le nu’u ma le atunu’u.

 

Sa taua e le ali’i faigaluega lea lona vaaia o le tuagane a Aetui-Fuimaono o savali atu i fafo ma valaau atu ia tei latou, e i ai lana fana o lo o i ai. Na savali le alii lea i totonu o le fale ma uu mai le fana, ona ia tu lea i le faitoto’a o le fale ma faaali atu ia te i latou le au o le fana, ae o lana vaai, e foliga mai o se fana tuai.

 

Na musu Aetui-Fuimaono e fai sana faamatalaga i Leoleo, se’i vagana ai Aab na malie e faasoa ma Leoleo e tusa ai o le fa’alavelave.