Ads by Google Ads by Google

Molia se ali’i talavou i lona faaoolima i se Tama e 65 tausaga le matua


[ata: SN]
ausage@samoanews.com

E 23 tausaga o se ali’i talavou na pu’e faapagota e Leoleo i le vaiaso na tea nei, ona o tu’uaiga i lona faaoolima lea i se Tama mai Asia e 65 tausaga le matua e aunoa ma se mafua’aga tatau. 

 

Ina ua fesiligia e Leoleo le ua molia i le mafua’aga o lona faia o lea solitulafono, na ia taua ai e fa’apea, o lona ita i lona Tina i lona taumafai e ave o ia i le fale ae o lo o fia alu e eva i ana uo, na mafua ai loa ona ia fa’atino lea solitulafono.

 

Na taua e le malo i le latou tagi e fa’apea, o le taeao o le aso 10 o Me, 2020 pe tusa o le itula e 3:17, na faafesootai ai e Leoleo e to’alua mai le Matagaluega o le Puipuiga o le Saogalemu Lotoifale (AS-DHS) le Ofisa o Leoleo i Tafuna mo se fesoasoani, faasaga i se ali’i talavou na taumafai e lu’i i laua mo se fusuaga, atoa ai ma lona lafo atu o upu tau faamata’u ma laulau vavale atu ia te i laua.

 

E to’atele Leoleo na tali atu i le valaau ma latou feiloa’i ai ma Leoleo e to’alua mai le AS-DHS e uiga i lenei mataupu. 

 

Na taua e Leoleo e to’alua a le AS-DHS e fa’apea, pe tusa o le te’a laititi o le itula e 3:00 i le vaveao o le aso e pei ona taua, na la vaaia ai se ali’i talavou ae tino maualuga o lo o aga’i mai i luga o le alatele ma laulau vavale solo. Ina ua oo atu i luma o le pa a le AS-DHS, na savali atu le ali’i lea na valaau atu ia te i laua pe i ai se isi e fia fusu. Na ia tago fo’i kiki le loka o le faitoto’a o le pa ma fa’aauau pea ona savali e aga’i atu i le auala o lo o ui atu i luma o le Fale Talimalo o le Tradewind Hotel, ma aga’i atu i tua i le nofoaga o Ottoville. 

 

Na fa’ataalise atu Leoleo e saili le itu atoa i Ottoville pe latou te maua ai se ali’i talavou tino maualuga o lo o savali i luga o le alatele. Na fiu Leoleo e ta’amilo latou te le i maua se isi, ona toe taamilo atu loa lea i luma o le vaega o loo tu’uaia na tula’i mai ai le fa’alavelave, ma latou vaaia ai se tagata faigaluega a le StarKist o lo o nofonofo i se Fale Fa’atali pasi e fa’atali lana pasi e alu ai e faigaluega.

 

Na fesiligia e Leoleo la tagata faigaluega lea ma ia faamatala ai fo’i mea uma na ia vaaia e uiga i lenei fa’alavelave. Na faamaonia e le tagata faigaluega i lea i Leoleo vaaiga uma na molimauina e Leoleo e to’alua a le Ofisa o le AS-DHS, e le gata o le laulauvavale o le alii talavou na ‘ona ae na ia lu’i fo’i ali’i Leoleo, kiki le faitoto’a o le pa toe taumafai e fa’aleaga se faailoilo o le alatele (road sign).

 

Ina ua siliga le sailiga a Leoleo, na latou toe fo’i ai loa e fa’atino a latou galuega masani, peita’i, ina ua latou aga’i atu i luma o le Faleoloa o le Kristopher i Tafuna lava, lea e sosoo ma le Ofisa o le AS-DHS, na vaaia ai e Leoleo se ulugali’i Asia matutua lava, o lo o saofafa’i i luma o le Faleoloa.

 

Na faailoa ane e le ulugali’i Asia lenei se faalavelave na tula’i mai i ni nai minute e le i mamao atu, ina ua faaoolima se ali’i talavou tino maualuga lava i le Toeaina Asia e ala i lona tu’i o ona foliga ma palasi ai o ia i lalo, toe kiki fo’i le papatua o le tagata Asia.

 

Na faamatala e le ulugali’i Asia i Leoleo e fa’apea, o laua na fa’atino le la galuega masani i taeao uma lava, o le faamama lea o le otaota i luma o le Faleoloa ma la savavali e fai sina faamalositino o le taeao.

 

A o pisi le Tamaloa Asia e faamama le otaota i luma o le faleoloa, na faafuase’i ona ia vaaia se ali’i talavou tino maualuga ua aga’i atu i le vaega o loo tu ai, o lo o ee i luga ma leotele. Na faateia o ia ina ua tu’i e le ali’i talavou ona foliga ma pau ai i lalo. A o ta’atia i lalo, na savali mai le ali’i talavou tino maualuga lenei ma kiki lona tua.

 

O gaioiga uma sa faia e le ua molia na mafai ona pueina i masini pu’eata a le Faleoloa, lea na mafai ona maimoa i ai Leoleo ma maitau uma gaioiga a lenei ali’i. O le ali’i sa i luga lona ata o masini pu’eata a le Faleoloa, o ia lea o Esau Lefiti, le ali’i o lo o molia i lenei mataupu.

 

Na faailoa e le Toeaina Asia i Leoleo vaega o lona tino na manu’a ina ua faaoolima le uam olia ia te ia. O ia vaega e aofia ai ona foliga, o lona lima ma lona papatua. Na talosagaina e Leoleo le fesoasoani a le EMS ma faia ai loa togafitiga faanatinati mo le Tama Asia na aafia i lenei fa’alavelave.

E to’alua fo’i i isi tagata na savavali i luga o le alatele i le taimi lea o le vaveao na fesiligia e Leoleo e uiga i lenei mataupu, ma la faailoa ai le vaaiga sa la molimauina i le taimi na la savalia ai le alatele. 

 

Na taua e le moilmau muamua e fa’apea, ao savali mai mo lana faamalositino i le taeao e pei ona fesiligia, sa ia molimauina ai se alii talavou ae tino maualuga o lo o ee ma laulau vavale solo i luga o le alatele, i luma tonu lava o le Faleoloa o Kristopher. E le i umi ae ona vaaia ua savali atu le tagata lea ma faaoolima i se Toeaina Asia sa tu i luma o le faleoloa.

 

O lona popole tele i lona saogalemu na mafua ai ona vave lana savali ese mai le nofoaga na tula’i mai ai le fa’alavelave. 

 

Na faamaonia e le molimau lona lua le faamatalaga a le molimau muamua. Na taua e le ali’i lea e fa’apea, sa ia vaaia se ali’i talavou sa ia ofuina se mitiafu mumu (o le ofu lea o Lefiti na ofu i le taeao lea), o ia ta tu’i faailoilo o le alatele ma valaau i Leoleo e to’alua a le Ofisa o le AS-DHS latou te fufusu.

 

Na faigata ona iloa e Leoleo poo ai le igoa o le alii o loo i ai lona ata i luga o le pu’eata a le Faleoloa, ae o le ta’avale lea na afe i luma o le Faleoloa i le taimi lava lea o le vave ma momoli atu ai le susuga a Lefiti, na faigofie ai loa ona iloa e Leoleo le tagata e ana le ta’avale. 

 

Na aga’i Leoleo i le fale o le tagata e ana le ta’avale ma fesiligia o ia i le mafua’aga na afe ai lana ta’avale i luma o le Faleoloa i le taimi lea o le vaveao, ae faailoa ane e le Tina e ana le ta’avale, o lana tama Lefiti, o lo o moe fo’i o ia i totonu o le fale.

 

Na piki e Leoleo le susuga a Lefiti mai lona fale i le taeao lea ma auina atu loa i le Ofisa o Leoleo i Tafuna mo isi suesuega atili e uiga i lenei mataupu.

 

Ina ua fesiligia e Leoleo ia Lefiti e uiga i lenei mataupu, sa ia taua ai e fa’apea, o lona ita i lona Tina i le taumafai e taofi o ia mai le mea na fia alu i ai na mafua ai loa ona ia faia lea solitulafono, i lona taumafai e faaleaga faailoilo o le alatele, lafo upu tau faamata’u i Leoleo a le AS-DHS, atoa ai ma lona faaoolima i se Toeaina Asia i luma o le Faleoloa o le Kristopher.

O le vaiaso na te’a nei na tula’i ai Lefiti i luma o le Fa’amasinoga Faaitumalo. O le ali’i Loia Fautua lagolago ia Bob Stuart na tula’i mo ia, ae o le tamaitai Loia Sili lagolago ia Laura Garvey na tula’i mo le malo.

 

O lo o molia Lefiti i le moliaga mamafa o le faaoolima i le tulaga lua, o se solitulafono D i le faatulagaina o solitulafono mamafa, lea e mafai ona faasala ai se tasi i le Toese mo le umi e mafai ona oo atu i le 5 tausaga i le Toese, pe faasala fo’i i le salatupe e mafai ona oo atu i le $5,000, pe faasala fo’i i faasalaga uma ia e lua. O lo o molia fo’i Lefiti i le moliaga o le faatupu vevesi i nofoaga faitele, o le vaega B lea o solitulafono mama.

 

O le vaiaso nei lea ua fa’atulaga e faia ai le ulua’i iloiloga o le mataupu a Lefiti i luma o le Fa’amasinoga Faaitumalo.