Pago Pago, AMERIKA SAMOA - 

FAIGALUEGA FAATONU KVZK-TV - OFISA O LE KOVANA:

Ua fa’amautu mai nei e le fesoasoani sili a le Kovana, Iulogologo Pereira, ua amata nei ona faigaluega mai le alii fa’atonu o le Ofisa o Fa’amaumauga Fa’alauaitele a le Malo, lea e pulea le tatou faletelevise, i le Ofisa o le Kovana, a’o fa’agasolo le taumafaiga ina ia tuufa’atasia lea Ofisa ma le Pulega o Fesoota’iga Tau Telefoni, Uaealesi poo le ASTCA.

O le fa’atonu o lea matagaluega o le susuga lea ia Tuimavave Tauapa’i Laupola.

O Aukuso o le tausaga ua mavae na mua’i faailoa mai ai lea taumafaiga ina ia galulue fa’atasi mai le faletelevise ma le ASTCA i se pulega e tasi aua e sootau’au foi a latou galuega fa’atautaia e ala i so’otaga o fa’asalalauga fa’alauaitele, ma na toe mou atu lea fuafuaga se’ia toe oo mai i lenei vaitau, ae fa’ato’a toe faia i ai se gaoioiga ma fa’ailoa mai ai le suiga o le Ofisa o le ali’i fa’atonu i le Ofisa o le Kovana Sili, e galue mai ai ma toe fa’avae ai ona afuafua lea sootaga o tautua nei.

Fa’ailoa e Tuimavave Tauapa’i, “E soo se mea lava e tatau ona fa’alogo i le fa’amoemoe o lo’o tulimata’i ai se suiga lelei o le tautuaina o le Malo ma o tatou tagata lautele. O le vaega fo’i o fa’amaumauga fa’alauaitele a le malo, e tatau ona sootaga fo’i ma le Ofisa o le Kovana Sili i mea uma lava.”

I le taimi nei e le o mana’omia ona toe sailia se isi e fa’auluulu i ai le Ofisa o le Televise i le fale o lo’o fa’amautu ai.

OFISA O FA’AMAUMAUGA MO LE FAITAUGA O LE ATUNUU

Talu mai lava ona tapunia mea uma a le Malo tele ona o le pipisi o a’afia ai setete ma teritori uma o Amerika i le ma’i pipisi o le Coronavirus, ua fa’apea fo’i ona tapunia ai galuega uma o lo’o faauluulu i le Malo tele a latou galuega. 

O le vaega na fa’ato’a tatala a latou galuega o le Faitauina o le atunuu i le taimi tonu na taofia ai loa galuega ona o le Coronavirus, o le Census poo le faitauga o le aofai o le atunuu, ua fa’aauau pea lava ona tapunia. 

Ua le gata ai i lea, ae ua tapunia fo’i ma le Ofisa o le Saogalemu, toe tapunia fo’i ma le Ofisa o Fa’asao i le Gataifale po’o le National Marine Sanctuary i Fagatogo. O tautua a le Ofisa o le Saogalemu ua tuuina mai ai se numera e te vala’au ai, ina ia feso’ota’i ai oe ma se tasi o lea Ofisa e pisi tele i aso ta’itasi, aua e to’atele le atunuu o loo maua mai latou saoga i le Saogalemu a le Malo tele.

Ua i ai fo’i le to’atele o fanau a le atunuu ua soifua mai, ma ua manaomia o latou numera saogelemu ina ia maua ai alamanuia ua agava’a ai i latou i le fananau mai. O nei galuega uma, ua mafai ona maua se’ia tatala lea Ofisa ona fa’ato’a tapena mai lea o numera. Peita’i o isi uma fa’afesili tau le saogalemu, ua mafai ona fa’ailoa mai Uepesite e taumafai ai le tagata latou e feso’ota’i ia maua se tali e fa’afilemu ai lou fanoga se’ia oo ina toe tatala faitoto’a o nei tautua a le Malo tele, pe a mavae Coronavirus.

Ua i ai nisi o aiga ua mae’a ona faitauina. Peitai o loo to’atele lava e le’i faitauina mai.

Ua faailoa mai ele fa’atonu o Fefa’ataua’iga a le Malo, Fuiavalili Keniseli Lafaele, “Ua mae’a taua’aoina i le Komiti o le Coronavirus le matou fanoga ina ia amatalia ona toe fa’aauau galuega o le faitauga o le atunuu ia Iuni 2020, ae o le a usita’ia le fa’asa o lo’o fa’atautaia nei, e faaaoga ai tapuni fofoga e le aufaigaluega pe a ulufale i fale o aiga.”

Pe a maea ona faia le fa’aiuga a le Komiti o le Coronavirus i lea talosaga mai le Census, ona fa’ato’a fa’auia lea i le Kovana SIli mo le fa’aiuga tonu e fa’aoo mai i le Ofisa o le Faitauga o el Atunuu atoa, Iunaite Setete o Amerika.

I le taimi nei o lo’o maua e le aufaigaluega na fa’afaigaluega a’o le’i taofia galuega i le Coronavirus, i latou nei e o atu i aiga e fa’amaumau mai, o le latou 50% o le latou 80 itula o le totogi, e le o pei o le Malo o lea e maua le latou 40itula o le vaiaso mo le totogi, ae 20itula o faigaluega ai.

Peita’i o le aufaigaluega a le Census lea e faigaluega i le Ofisa, ae ese ai i latou o lo’o fa’asolo i tua i aiga e tusia suafa o aiga ta’itasi, o loo totogia i latou i le faiga o lo’o ua faigalouega ai tagata a le Malo o Amerika Samoa i le taimi nei, faigaluega i le 20 itula i le vaiaso ae totogia pea i le 40itula o le aso.

Na fesiligia fo’i Fuiavalili i le taumafaiga e toe soo le fau ma le fau i le galuega na amatalia ae ua taofia ona o le covid-19, ae fa’ailoa mai e ia, “E tatau lava ona mae’a faia le galuega atoa o le fa’amaumauga o le atunuu ma mae’a lelei i le taimi atofaina ia Setema 2020. Poo le a lava le faigata, ae tatau lava ona mafai ona fa’amae’a lelei lea tiute.”