Ads by Google Ads by Google

Tala I Vaifanua

Pago Pago, AMERIKA SAMOA -

 

POLOKALAMA FA’AGAFUA O TULAFONO FEMALAGAIGA ME 31,2020

 

Fa’ailoa e le Ofisa o Femalaga’iga ua fa’asolo pea lava le latou lisi o i latou na talosagaina le fa’aleleia o latou pepa nofomau i Amerika Samoa e fa’aaoga ai le ‘fa’agafua o tulafono o femalaga’iga i Amerika Samoa sa fa’atulaga e Kovana Lolo Moliga a’o le’i sofa’i mai le atunuu e le faasa a le Coronavirus.

 

Peitai o le taimi ua utiuti lava, ae ua fa’asolo pea nai talosaga na fa’aulu ma fa’amauina i lea vaitau. O le to’atele sa fa’agafua le totogia o latou pili e ao ina fa’aleleia ai latou pepa se’ia oo la i lenei vaitau, e vala’au atu ai i latou ia oo mai mo le fa’amalamalama atu a latou pili totogi ma fa’aulu loa e pu’e ai latou pepa fa’amaoni poo ID.

 

Na fesiligia pe mata ua suia le faitauga sa manatu ina ia fa’aaogaina lea avanoa e fa’aleleia ai latou pepa nofo mau i Amerika Samoa, ae fa’ailoa mai e i latou o nafa ma le fa’asologa o le lisi o suafa na tusia, “O lo ua i ai suiga, o nisi o lo’o tuuavanoa lava i ai, ina ia  sailia mai latou pili mo le fa’agafua, a leai o lona uiga e le aoga ia i latou le avanoa lea, ao nisi fo’i ua le toe iinei sui na manatu e fa’afouina latou pepa i lenei taumafaiga.”

 

Ua fesiligia i latou nei ua fa’afaigata ona totogia pili o le fa’aleleia o pepa ae fa’ailoa mai, “E alofagia lava le tatou usoga i Samoa, e iloa atu lava le taumafai mai o nai o tatou tagata ia totogia pili e fa’aleleia ai pepa o sui i totonu o latou aiga, peitai, o le vasega o Saina ma Filipino, e o mai lava totogi mea uma ma ua feoai nei ma ID, o lo’o ia i latou le tupe e mafai ai ona fa’amae’a lea feagaiga.”

 

SAUNI FALETUPE TAUTUAINA O LE LAUTELE I SIAKI STIMULUS

 

O le a suia itula e tatala ai lala o faletupe o le TBAS ma le ANZ i le aso a taeao, Aso Toona’i, ina ia mafai ona tautuaina le mamalu o le atunuu o le a taulimaina siaki Stimulus mai le falemeli i Fagatogo.

 

Ua fa’ailoa mai e le TBAS e fa’apea o le a tatalaina lo latou ofisa i Tafuna fa’atasi ai male ofisa autu i Utulei mai le itula e 8:30 i le taeao se’ia pa’ia le 1:30 i le aoauli.

 

Mo le faletupe o le ANZ, e tatalaina le ofisa i Fagatogo ma Tafuna mai i le itula e 9:00 i le taeao se’ia pa’ia le 1:00 i le aoauli.