Pago Pago - AMERIKA SAMOA

O loo talosia ele Sui Taitaifono o le Komiti Faafoe o le falema’i o le LBJ, Dr Jean Anderson, ae o le aufaigaluega a le LBJ, o le faaiuga ua iai e mo le lelei o le Soifua maloloina i le teritori. 

I le tali mai a Dr Anderson i fesili faatatau i lipoti o masaloga o se sainigalima ase vaega sinia o fomai o le LBJ, ia aveesea le Pulega o le LBJ o iai nei, ona o le tofia ai o le Foma’i Sili (CMO) fou, Dr Joseph Shumway ma le faamavaega a fomai sinia e to'alua ile vaiaso talu ai. 

"O le filifiliga e mo le lelei o le LBJ ma le faamalieina ole misiona a le Pulega ia siitia  atina'e le LBJ i sona tulaga sili atu mo le soifua maloloina o tagata."

“O suiga ua tutupu ele faigofie mo nisi i le LBJ ma oute malamalama fou i popolega o na tagata, ae ua silafia uma lava, o suiga e faigata. 

"Ae pau se tala, o le tatalo mo latou na, e ave le talitonuga i le Pulega, ma talitonu i le latou filifiliga ua faia e mo le lelei o le LBJ, ia ausia ai le misiona a le Pulega e siitia ma faaleleia le auaunaga faalesoifua maloloina.

"E iai se aso e toe manatua ai lenei taimi faigata o feagai ai ma tatou, ae ose mitamitaga foi , ina ua tatou faia le mea e tatau ona fai, e ui ile faigata, ae e mo le faaleleia ole LBJ ma suiga  ua maualuga ai le auaunaga faasoifua maloloina mo tatou tagata."

I le mau a Dr Anderson ua lagolagoina e le Pulega o le LBJ le taunuuga manuia o le fuafuaga a Dr Shumway, ma ua tapena foi e galulue faatasi ma tagata ua iai poto faapitoa e faia aoaoga, ma mata’itu le atina'eina  ma le auaunaga faa CMO, fua i le uma ai ole konekarate a Shumway. 

"Ua matou talosaga fou i tagata popoto faapitoa i le LBJ ma fafo atu, ma tatou tausi soifua e omai faatasi e galulue mo le faamoemoega e tasi." 

Sa le mafai ona talanoa Dr Anderson, faatatau i le faamavaega a Dr Annie Fuiva ma Dr Reese Tuatoo.

"Ae mo le taimi nei e le mafai ona talanoa le Pulega faatatau i foma'i  ua iai se latou filifliga e faamavae, aua o na faamaumauga mo tagata faigaluega e faalilolilo. 

I le imeli a Dr Shumway ole aso 29 Ianuari 2023  i le sui Taitaifono ole Pulega a le LBJ, o ta'ua ai lana galuega sa taumafai ai nai masina ua tuana'i, i lepolokalame faale soifua maloloina mai le Ekalesia Iesu Keriso, O le Aupaia o Aso e gata ai . 

"Sa iai foi popolega i gasegase sa faigata ona maua auaunaga faasoifua maloloina ona o faafitauli i sapalai ma le faatinoga. Ae ua uma ona ou toe faatalanoa  e faauau ai pea na polokalame. 

Na ta'ua foi e le Dr Shumway, a'o lei tofia , sa toetoe lava ina aveesea lea polokalame.

E iai foi aiaiga o na folafolaga i lona taimi, ina ia faauau ona faaaoga ma ave iai le lagolago a le LBJ. 

"O iai foi lo'u faamoemoe e aumai nisi tagata popoto faapitoa ma tausi soifua ua iai agavaa e galulue, i Family Practice ma le vaega o auaunaga i faalavelave faafuase'i mo Samoa i tausaga oi luma.”