Pago Pago - AMERIKA SAMOA

SIPAIA VIVI

I le aso 23 o Novema, 2023, na ave faapagotaina ai e leoleo ia se alii na masalomia i lona fa’ao’olima i lona afafne ma sona ‘niece’, atoa ai ma lona taufa’amata’u i lona uso ma se agaese.

O lo o ua ta’ua i faamaumauga a le malo e faapea, na fa’afesoota’i ai e le ofisa autu a leoleo i Fagatogo, ia lo latou ofisa i Tafuna, ona o se vala’au mai i se tina mai i Seetaga, e ripotia mai ai se faalavelave.  Ina ua toe valaau e le ofisa leoleo i Tafuna ia le tina lea na valaau i le latou ofisa i Fagatogo, na faamatala iai e lenei tina e faapea, na fasi e le susuga Sipaia Vivi ia lona afafine ma lona ‘niece’ ma faafefe lona uso (le uso a le ua molia) i se agaese.

Na malaga atu leoleo i le nofoaga na tupu ai le faalavelave ma feiloai ma le tina na valaau mai i le ofisa a leoleo.  Sa ia faamatalaina i leoleo le fa’asuaava o Vivi i le taimi na tupu ai le faalavelave.  Ma sa faamatalaina foi e se tasi o tamaitai ua a’afia i lenei mataupu, na o la o ma lona tausoga i le faleoloa, ae ina ua o la toe fo’i mai, o iina na otegia ai la’ua e le ua molia ma fasi ai la’ua.

Na aveina loa e leoleo ia le ua molia i le ofisa a leoleo mo le fa’aauauina o a latou suesuega.

O iina na faamatala ai e Vivi lona to’atama’i i lona afafine ma lona ‘niece’ ona o le tuai ona toe fo’i mai mai le faleoloa.  Sa ia faamtalaina lona ta po o la’ua, ae o mai loa lona tuafafine ma lona uso amata se latou taugaupu.  Sa faamaonia e Vivi lona palauvale i lona uso ma lona tuafafine ma ia fa’afefe lona uso i se agaese.

O iina na loka ai loa Vivi ma molia i le Faatupu Vevesi i totonu o lona aiga.  O se solitulafono e mafai ona fa’asala ai o ia i le 15 aso i le falepuipui, po o se sala tupe e $300; po o faasalaga uma e lua.

O lo o molia foi Vivi i le Faao’olima i lona tulaga e tolu, ma e mafai ona faafalepuipui ai o ia i le tasi tausaga, po o se sala tupe e $1,000; po o faasalaga uma e lua.

E $500 le tinoitupe ua faatulaga e mafai ona tatala le ua molia mai i le falepuipui, e faatali ai lona faamasinoga.

JOHN MATAGILELE

O le aso 21 o Novema, 2023, na ave faapagota ai e leoleo ia se alii na fiu e fa’ato’ato’a ae le mapu le palauvale, talu ai le gasegase o lona tama.

Ua molia lenei alii i le Faatupu Vevesi i totonu o lona aiga, lea e mafai ona faasala ai o ia i le falepuipui, i le ono masina, po o se sala tupe e $500; po o faasalaga uma e lua.

E tusa ai ma faamaumauga a le malo, o lo o faamatalaina ai le mauaina e le ofisa a leoleo i Tafuna o se valaau mai i se tamaitai i le afioga o Malaeimi, e faapea, o lo o taufa’afefe o ia e le susuga ia John Matagilele, ma palauvale solo i totonu o le latou fale.

Ua ta’ua foi i totonu o faamaumauga a le malo e faapea, sa faamatala e lenei tamaitai i leoleo ina ua taunu’u atu, lona fiu e fai i le ua molia, e soia le palauvale i totonu o le latou fale, ona o lo o gasegase lo latou tama, ae peitai, sa musu le alii o Matagilele ma o’o ai lava ina fa’afefe o ia e Matagilele i lona folifoli e tu’i o ia.

Sa faamatala foi e lenei tamaitai, e le o se taimi muamua lea ua fa’atupu vevesi ai Matagilele i totonu o le latou aiga.  Sa ta’ua e lenei tamaitai, e le o se taimi muamua lenei e ona mai ai Matagilelei ma tu’uaia lo latou tina i le le alofa ia te ia.

Sa agai atu loa leoleo ma loka mai Matagilele a’o taotooto i totonu o le latou fale, ma palauvale mai i le ua a’afia i lenei mataupu, ma aveina atu loa o ia i le ofisa leoleo i Tafuna.

E $300 le tinoitupe faatulagaina e mafai ona tatala ai le ua molia, mai i le falepuipui, e faatali ai lona faamasinoga.