VAEGA 35

E toe fa’atalofa atu i a tatou pa’aga i so’o se tulimanu o le kelopo o lo’o maua mai ai lenei auaunaga.  Aemaise i nai o tatou tama ma tina matutua i Amerika Samoa.

E tatou te tau fai si’i faatasi ia le viiga ma le mua, i lo tatou Tapa’au Sili i le Lagi, ona o Lana pule faasoifua ma Lana tausiga alofa, ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’etaga malu, mo le fa’aauauina o le tatou Fagogo – E SOLA LE AMIOLEAGA AE TULILOAINA.

**************************************************

Sa tatagi le telefoni a le teine o Selema, a’o la agai ese atu ma le tamaititi o Tomasi, mai i le falea’oga.

“Hello,” o le tali a Selema i le telefoni.

“O le tuagane lea a le tina a Tomasi,” o le faapea mai lea a le tagata i luga o le telefoni. – Manatua, sa fa’alala e le tuagane a le tina a Tomasi, ia le fasiotia o Mikaele, le uo a Selema lea o lo’o nofo ai Tomasi.

“O le a le mea e te mana’o ai?” o le fesili atu lea a Selema.

“O lea ou te mulimuli atu i le lua taavale ma Tomasi.  Manatua la’u tala na fai atu ia te oe.  E le nofo Tomasi i le fale a Mikaele.  Afai o lena e te alu e ave ia Tomasi i le fale a Mikaele, o lona uiga, e le na’o Mikaele ou te fasiotia.”

Ona tape mai loa lea o le telefoni.

Na fesili atu loa Tomasi ia Selema, “O ai le la e mulimuli mai lana taavale ia ta’ua?”

Ina ua tilotilo Selema i le fa’ata o lana ta’avale, sa ia iloa atu se taavale pa’epa’e, i tua tonu o lana taavale. 

Na faapea Selema, o le tuagane lea a Lina (le tina a Tomasi), ae peitai, ina ua tu lana taavale i le moli, sa ia iloa atu, e ese foliga o le tagata lea.

Ona toe manatua lea e Selema, le tamaloa lea sa i le faletalimalo, lea na fai atu Nero, o lo’o taumulimuli ia Repeka.

Ina ua toe lanu meamata mai le moli o le auala, sa faapea atu Selema ia Tomasi, “U’u mau lou fusipa’u.”

Ona ‘o’omi loa lea e Selema o le vae kesi o lana taavale.  E le’i lua pi’oga fa’afuase’i a Selema, ae ia le toe va’aia le taavale pa’epa’e i on atua.

Ae o le taimi lea ia Tomasi, e pei o se tamaititi laititi na tu’u iai e lona tina se aisikulimi, i le ata fiafia ma patipati ona lima.

‘Oka! Matua’i seki lava o lau ‘ave’ave!”

[E FAIA PEA]