Pago Pago - AMERIKA SAMOA

O le afiafi o Aperila 21, 2026, na tupu ai se faalavelave i le afioaga o Vailoa, a’o faia le sa o le afiafi a le nu’u, ma ua molia ai nei Risati Mapu ma William Manning, i le Faatupu Vevesi ma le Fa’ao’olima.

E tusa ai ma fa’amaumauga a le faamasinoga, sa fa’afeso’ota’i e se tamaitai ia le Ofisa a Leoleo i Leone, ona o se fusuaga na tupu i luma o le faleoloa a Samu, i le afioaga o Vailoa.  E le’i umi ona valaau atu le tamaitai, ae toe o’o atu foi seisi valaau, i le ofisa a leoleo, e tusa ai ma le faalavelave lava e tasi, ae sa ta’ua i le valaau lona lua, ia suafa o i la’ua na molia, o Risati Mapu ma William Manning, po o ‘B-Boy’, o lona igoa valaau lea.

Ina ua taunu’u leoleo, i le nofoaga na tupu ai le faalavelave, sa muamua ona o latou talanoa ma i latou na iai ma sa fa’ailoa iai e tagata o le nu’u, ua tu’ua e i la’ua na molia, ia le nofoaga na tupu ai le misa.

O le aso na soso’o ai, na o’o atu ai ni alii se to’alua, sa a’afia i le fusuaga, i le ofisa a leoleo, i Leone mo le faia o a la faamatalaga, e tusa ai ma le fa’alavelave na tupu.

E tusa ai ma ripoti a leoleo, sa o latou maitauina ia le fula ma le uno’oa o le mata tauagavale, o le tasi o alii na a’afia, faapea ni manu’a i ona tuli ma lima.  Ae o leisi, sa na’o ni nai ma’osia, i ona foliga ma lona tuli taumatau.

Sa vala’auina e leoleo ia le vaega a le EMS, ina ia mafai ona siaki ia nei alii.

I le faamatalaga a se tasi o alii na a’afia, o le fa’ato’a manava mai ma auai atu i le leoleoga o le Sa, sa savalivali atu ai i le auala,  i tafatafa o le faleoloa a Samu, lea e i leisi itu auala o le aoga maualuga a Leone, ae ona va’aia se taavale o paka i tafatafa o le alatele.

Sa ta’ua e le na a’afia, ia lona savali atu i le taavale, ma faatonuina Risati (le na molia), e fa’atu ai iina le la taavale, ona o lea o le a ta le Sa.

Ae peitai, e ta le sa, ae va’aia ia Risati (le na molia), o savalivali atu ma ni isi, i luga o le auala, e pei e leai se sa o faia.  O le mae’a o le Sa, na toe savali atu ai le na a’afia, ma toe fa’amanatu atu ia Risati (le na molia), ia tulafono o le sa a le nu’u.

Ae fesili mai Risati (le na molia), po o le a le mea o manao iai ia le na a’afia.  Sa faapea ona amata ai se finauga, i le va o alii e to’alua.

Na ta’ua foi i le ripoti a leoleo, ia le oso atu o William (le na molia) ma taumafai e tu’u’ese’ese ia Risati (le na molia) ma le alii sa a’afia.  Peitai, na ta’ua e le alii na a’afia, ia le tu’i mai o ia, e Risati (le na molia) ma ia pa’u ai i lalo, i luga o le auala.

Sa ta’ua foi e le na a’afia, ia le fa’aaogaina e Risati (le na molia), ia se ‘spanner’, e ta ai lona mata tauagavale.  Ae na mafai ona toe tu i luga, ma savali atu i le faleoloa, lea sa iai lona uso, ae na mulimuli atu ai ia Risati (le na molia) ma fa’aauau ona taumafai e fasi o ia, faapea ma le palauvale atu ia te ia.

Sa faamatala e le alii lona lua, na a’afia, ia lona taumafai e fautuaina ia Risati (le na molia), e soia, peitai, na oso atu ia William (le na molia) ma taumafai e una’i ese o ia, lea na mafua ai ona manu’a lona tuli.

Na fa’ailoa atu foi e le alii lona lua, na a’afia, e foliga mai sa fa’asua’ava ia Risati (le na molia), i le taimi na tupu ai le faalavelave, ma sa ia u’uina i lona lima, ia se apa pia.

I le aso 23 o Aperila, sa fa’aauau ai su’esu’ega a leoleo, e ala i le sailia o ni molimau, i le faalavelave na tupu.  E le gata i lea, sa faatalanoaina e leoleo ia le tagata lea na valaau atu lona lua, i le ofisa a leoleo, i le aso na tupu ai le faalavelave, mo sana faamatalaga tu’u gutu ma tusitusia.

E tusa ai ma le faamatalaga a le tagata lea na valaau lona lua atu i le ofisa a leoleo, i le aso na tupu ai le faalavelave, na alu e piki mai tagata o le aulotu mo ni a latou a’oga mea, ae sa taofia o ia i tafatafa o le a’oga maualuga a Leone, ina ua ta le sa.

A’o ia nofonofo ai i lea eria, e faatalitali le mae’a o le sa, sa ia va’aia ai ni alii se to’alua, o tu tu, i tafatafa o se taavale.  O se tasi o alii, sa u’uina ia se apa pia, ma e foliga mai, o lo’o faia talanoaga a nei, e pei e leai se sa o faia.

Na ta’ua e le na valaau i le ofisa a leoleo, ia lona va’aia o se tasi o le aumaga, o agai atu i nei alii, ma fautuaina i latou, e tusa ai ma le sa.  Ae peitai, sa foliga mai, na le fiafia ai ia Risati (le na molia) ma ia ave’ese ai lona mitiafu, ma olioli atu i le aumaga.

Sa faamatala atili e le mmolimau, ia le palauvale o Risati (le na molia), i le aumaga ma mau o Risati (le na molia), i se tasi o le aumaga, ma pa’u ai le aumaga ma tau ona foliga, i luga o le auala.

Ona oso atu lea o le alii lona lua, na a’afia, i le taumafai e taofiofi le misa, ae na toe savali atu ia Risati (le na molia) ma tu’i ma pa’u ai i lalo ia le alii lona lua, i luma o le faleoloa.

O moliaga na molia ai ia Risati Mapu ma William Manning, na aofia ai:

Faitauga 1:  Fa’atupu Vevesi i nofoagai faitele – O se vaega ‘E’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe, e le silia ma le $500; po o faasalaga uma e lua.

Faitauga 2:  Fa’ao’olima i lona tulaga e tolu – O se vaega ‘A’ i solitulafono mama, e mafai ona nofosala ai i le falepuipui, e o’o atu i le tasi tausaga, po o se sala tupe, e le silia ma le $1,000; po o faasalaga uma e lua.

Na lokaina ia Risati Mapu ma Wililam Manning, e aunoa ma se tinoitupe fa’atulagaina, e mafai ona toe tatalaina ai i tua, a’o fa’agasolo o la faamasinoga.