Vaega: 72

Fa’atalofa atu i lou alafa’i mai i le manuia i lenei taeao fou, i le alofa ma le agalelei o le Atua Soifua, e ia i pea le fa’amoemoe maualuga, o lo’o aoina pea le masina i lo’u soifua laulelei, ae maise fo’i o faiva ma tiute o lo’o feagai ai ma oe i lenei aso.

Ae alo maia, o le a toe fa’aauau atu la tatou tala fa’asolo e pei ona masani ai, i lona vaega lona fitusefulu tolu lenei, Alofa, se ia tiga.

Na muta mai la tatou tala ina ua ma ulufale nei ma lo’u tama i totonu o le fale mata’aga tele lava lenei, ma o lo’o tu i i le itu i Saute o Peretania, ma e lata lava i le nofoaga o lo’o o’u nofo ai nei.

Na alu nei la matou solo e aga’i atu i le isi itu o le fale, ma sa ou va’ai ai le to’atele o tagata o lo’o matamata i totonu o le fale mata’aga lenei. Na liliu mai nei le isi tama’ita’i o lo’o ta’ita’ia le solo a le au matamata ma fa’afeiloa’i mai i lo’u tama. Na fa’ailoa ai nei e lo’u tama o a’u o lona afafine. Ua tu le tama’ita’i lea ma mata’i a’u i lea taimi, ae mulimuli tu’u mai lona lima ma ma fa’atalofa.

O le tina lenei, e foliga mai a ou fa’atusatusa tausaga o lona olaga, pe tai toeitiiti lava tutusa ma tausaga o lo’u tama. Ua u’u mau e le tina lenei lo’u lima ma tilotilo mai i o’u foliga ma ‘ata’ata. Ae ou te iloa, ai o i ai sana tala o tau fai mai, ae leaga o lea e tu lo’u tama. “Averia, ua lagona lo’u fiafia tele ina ua ta feiloa’i, a tonu e i ai se taimi ta te talatalanoa ai pe a maua sou avanoa.”

Na ou ‘ata atu nei i lenei tina out e talitonu ua leva ona galue i totonu o lenei fale mata’aga, ma ma fa’amavae loa ma toe fa’aauau la matou solo ma le leoleo i le isi itu o le fale.

E maofa le loto, i le va’ai atu i totonu o lenei fale atoa, e fai o le tele o le fale, ae na ou iloa ai fo’i e foga fale lua le fale atoa, ae foliga mai o se fale lava e tasi. O le ogatotonu galemu o le fale, o lo’o i ai se vai manino lava, ma o lo’o tafe e aga’i atu i le isi itu lea o lo’o i ai le fale e tioata atoa, a’o totonu o lo’o tumutumu mai ai tagata.

E ofo le loto, ma ou fa’apea ifo, letioa fo’i a fai tala, i le lalelei o le lalolagi ma mea o tumu ai. Ua alu pea la matou solo ma lo’u tama, ai ua lagona e lo’u tama ua le toe u’uina e ia lo’u lima, o lea na tu ai loa ma tilotilo mai i tua ia te a’u.

Ua matou taunu’u nei i luga i le fogafale lua o le fale mata’aga lenei, ma ua matou savavali sa’o nei i le isi itu lea o lo’o fa’amalama atoa lona faiga. I la’u va’ai i lea taimi, o se fale ua sili ona matagofie i le va’ai, ma a e tu mai i luga, e te uma mai lava mea o lo’o tutupu i le fogafale o lo’o i le pito i lalo.

Ua matou ulufale nei i totonu o le potu tele lava lenei ma na  ou iloa ai le laulau tutu i luga o tagata faigaluega ma fa’afeiloa’i mai lo’u tama. Ua na o lo’u tilotilo atu nei i ai ma lo’u le iloa pe o le a lona mafua’aga. ina ua uma ona fa’afeiloa’i e le au faigaluega lo’u tama, ona a’apa mai lea ua u’u atu lo’u lima ma taumafai e tu’u atu au e fa’apito i luma.

Na liliu nei lo’u tama ma fa’apea atu i tagata faigaluega nei, “Ou te mana’o ina ia outou silafia, o lo’u afafine lenei o Averia Rosa Elisapeta,  ma o le mafua’aga lea o lo’u o’o mai, ae ou te le i logoina mai outou, ae ‘aua tou te popole fai pea a outou galuega, na ma o mai ma lo’u afafine e fa’asino ia te ia le fale lenei, ae maise ai fo’i ina ia iloa e ia, o le tasi lenei o fale mata’aga o lo’o o’u va’aia.”

Na ou te’i i le tala lea a lo’u tama, ma na avea ma ala ua le mautonu ai lo’u mafaufau i sa’u tala e fai atu i tagata faigaluega uma nei. Na ou tu nei ma ou tilotilo atu i lou tama i lea taimi, ae savali mai loa se tina matua lava, ua fa’atalofa mai i lo’u tama, ae ua le ave’esea ona mata ma a’u.

Na ou lagona lelei atu lava le musumusu a le lo’omatua lenei i lo’u tama, “Mikaele, ua pei ua ou toe va’ai ia Elisapeta i foliga o Averia, talofa e, ua matua lava ma lalelei e pei o lona tina.”

Ua ata lo’u tama ma tilotilo mai ia te a’u, ae ua ou punou nei lalo ua leai sau tala e fai atu. Na liliu mai nei le lo’omatua ma fa’apea mai ia te a’u, “Avery Rosa, talofa lava, e ia te a’u le agaga fiafia, ina ua ta feiloa’i, ae sau se taimi ona ta talatalanoa ai lea pe afai e mafai ona ioe mai lou tama ta te talatalanoa.”

Ua tele lava fesili ua mapuna mai nei i lo’u mafaufau i lea taimi, po’o se tasi lea o pisinisi o lo’o pulea e lo’u tama, ma ua ou fia maua se tala mai i lo’u tama pe sa’o o’u mafaufauga pe leai.

Ua ma ulufale nei i totonu o le isi potu tele lava, ma o iina na fa’amaonia ai loa o’u manatu, ona i le pito lava i tua o le potu tele lenei, o lo’o tautau mai ai le ata o lo’u tina moni o Elisapeta Rosa (Elizabeth Rose).

E faia pea