LAPATAIA TAGATA UMA INA IA VAVE VAAI SE FOMA’I PE A I AI NI SUIGA TINO

Ua faamaonia mai e se sui o le Falema’i o le LBJ i Fagaalu le faamaonia i a latou suesuega o lo o faia, le i ai lea o ni isi o le atunuu ua faamaonia le a’afia i siama o le gasegase o le ‘typhoid fever’, po o le Fiva Taifoi e pei ona lau silafia ai e le toatele o le atunuu, ma ua lapataia ai le mamalu o le atunuu atoa ina ia vave vaai se foma’i i le taimi e maitauina ai ni suiga i lou soifua maloloina ae le masani ai, aemaise lava i le fanau laiti.

I se fonotaga ma tusitala i le taeao ananafi, na faamaonia mai ai e le ali’i foma’i ia Dr. Mike mai le LBJ e faapea, e to’a 8 le aofa’i na faamaonia le maua i siama o lenei faama’i i le tausaga lenei, e aofia ai ma gasegase fou e to’alua na na faatoa tula’i mai i le faaiuga o le masina o Me na te’a nei atoa ai ma le vaiaso lenei.

O lea fonotaga sa auai le foma’i mai le LBJ, atoa ai ma sui o le Matagaluega o le Soifua Maloloina e pei o le afioga i le Faatonusili ia Motusa Tuileama Nua; Foma’i sili ia Tamasoalii Dr. Joseph Tusa, atoa ai ma ni isi o sui o le Matagaluega o lo o galulue soosoo tauau i le mataituina o togafitiga i fa’ama’i pipisi i le atunuu.

O le ‘typhoid fever’ o se fa’ama’i e sili ona matuia e mafua mai i le siama e taua o le ‘Salmonella enterica serotype’, ma o lea siama e mafai ona feavea’i e le isi tagata aga’i atu i le isi tagata, lona uiga fo’i la e mafai ona feavea’i le fa’ama’i lenei e ala i meaai po o le suavai taumafa.

E fiafia tele le siama lenei e nofo i totonu o totoga o le tagata (tulou) atoa ai ma isi vaega o le tino, ma faagofie ai loa ona latou tufa atu le siama i isi vaega o le tino ma vave ai ona aafia le tagata i gasegase tuga ma tigaina.

E mafai foi ona aafia le tagata soifua i le siama o le ma’i lenei e mafua mai i feau vai a meaola (tulou), ma o le fautuaga mo tagata uma, ia mautinoa e mama le siosiomaga o lou aiga, totonu o le fale taele, umukuka ma soo se vaega o le fale.

Saunoa Motusa e faapea, talu ai ua faamaonia le aafia ai o ni isi o le atunuu i siama o lenei faama’i, a’o lea fo’i ua fetaui ma le malolo mai o fanau mai aoaoga i lenei vai tuuaga o aoga, ua manatu ai le Matagaluega e tatau ona tuuina atu ni lapataiga i matua ma le atunuu atoa ina ia mautinoa e malupuipuia le fanau mai nofoaga o lo o tafafao i latou, ma ia vave vaai se foma’i pe afai e i ai se isi o le aiga aemaise lava i le fanau e ma’i ma maitauina ai ni suiga i lona malosi sa le’i masani ai e pei o le vevela, fiva, le fia ai ma tiga le tino.

E ui o le masina o Ianuari 2013 na faamaonia mai e Dr. Mike na faamaonia ai le ulua’i tagata ua aafia i le siama o le ma’i lenei i le atunuu, peitai ua manatu le falema’i ua tatau loa i le taimi nei ona lapataia le atunuu ona o lea ua maitauina le faamaonia ai o ni isi e toalua na faamaonia le aafia ai i lenei faamai i le taimi nei.

Na taua e Dr. Mike le galulue ai o le falema’i ma le aufaigaluega e tau saili po o fea tonu lea na mafua ai ona aafia i latou nei i lenei faama’i.

“O le gasegase o le typhoid fever e mafai ona togafitiina, ae afai e tuai ona e alu e vaai le foma’i, e ono oo atu tulaga matuia o le gasegase i se tulaga e ono uma ai ma lou soifua,” o le saunoaga lea a Dr. Mike.

O i latou e toalua na taofia lata mai nei i le LBJ ona o le siama o le faama’i lenei, o tamaiti uma i laua, ma o le isi o i laua nei sa sili ona tigaina ma matuia le aafiaga na aafia ai o ia, ina ua tuai ona avatu i le falema’i mo togafitiga.

Na taua e Dr. Mike e faapea, e lima aso o ma’i le tamaititi lea i le fale faatoa avatu ai e vaai le foma’i, ma o togafitiga sa faia i lona tino na maitauina ai le matuia o le tulaga ua i ai lona gasegase, ae o se itu faafiafia loto ua toe manuia o ia ma ua aga’i ina toe atoatoa lona malosi i le taimi nei.

Na taua e Dr. Tufa e faapea, e ui o le manulauti ma le tiute tauave a le Soifua Maloloina, o le puipuia lea o le tagata mai le aafia i faama’i pipisi atoa ai ma le tuuina atu o togafitia i le tagata ua aafia, peitai e faigofie puipuiga mo le atunuu ma le mafai ai ona aafia se tasi i soo se faama’i pipisi pe afai e tausisi i tulafono o le saogalemu.

“E faigofie lava le tulafono, soo se taimi e alu ai i le fale taele pe fai ni feau po o soo se mea gaioiga e te faia i totonu o lou aiga, aua nei galo ia fufulu ou lima ae ete le’i ai pe le’i alo atu fo’i mo le kukaina o se meaai, e oo foi i le taimi e te inu ai, ia mautinoa ua fufulu mama ou lima ae ete le’i inu ina ia mautinoa ai e le o aafia oe i se siama o lenei faama’i,” o le saunoaga lea a Dr. Tufa.

O ni isi o nofoaga na taua e Dr. Tufa e faigofie ona aafia ai fanau pe afai e le faaeteete i latou o lo o tausia o nofoaga o Child Care.

“O le fautuaga, ia faamuamua le saogalemu i taimi uma, fufulu mama ou lima, afai fo’i ua e faalogoina lou ma’i, vave vaai se foma’i,” o le fautuaga lea a Dr. Tufa.

O ni isi o auga o le ma’i o le typhoid fever na taua e le tamaitai o Victoria Cowger o lo o galue i le vaega o le CDC a le Soifua Maloloina, po o le ofisa o lo o faia suesuega i faama’i pipisi e aafia ai tagatanuu e aofia ai le maualuga o le vevela po o le fiva, tiga le ulu, le fiafia e ai meaai, vaivai le tino pe gagase foi, amata ona faaitiitia le tino, sosolo le lala vevela i le tino ma ua faalogoina foi le tiga o le manava.

Fai mai le fautuaga a le Soifua Maloloina ma le Falemai mo le atunuu, e tai foliga tutusa lava auga o le typhoid fever ma isi faamai ua masani ai le atunuu, ae afai e tuai ona e alu e vaai e foma’i, e ono aafia ai ma lou soifua.

O le fautuaga, e sili lava le puipuia nai lo le togafitia.