FALEPUIPUI MO LE 10 ASO I LE GAOIA O LE PUSA PIA

O se ali’i e 19 tausaga le matua lea na ia gaoia se pusa pia mai se faleoloa i le po o le aso 15 o Me 2012 i Pago Pago, ua faasala i aso e 10 i le toese i Tafuna ma le totogia o le $100, o ni isi ia tuutuuga o lona nofovaavaaia e 24 masina, ina ua ta’usala o ia i moliaga mama e lua o le gaoi ma le inupia ae le’i atoa le 21 tausaga.

Ina ua fesiligia e le faamasinoga Vallen Matuaato ananafi i le mafuaaga na ia faia ai lenei solitulafono, na ia ta’ua, o le solitluafono na tula’i mai ina ua le lava pia o le latou inuga sa faia ma ni isi o ana uo, o lea na faaoso ai loa o ia e ana uo e alu e gaoi mai ni pia mai totonu o se faleoloa e latalata ane i le nofoaga na latou inupia ai.

Na fesili le alii faamasino ia John L. Ward II ia Vallen Matuaato pe ua i ai se lesona ua ia aoaoina mai le solitulafono sa ia faia, ae na tali le ua molia, “Ua ou iloa e le tatau ona ou toe tagofia le ava malosi se’i vagana ua atoa lo’u 21 tausaga.”

Na faailoa e Ward II ia Vallen e faapea, na mafua ona faatulaga e le Fono Faitulafono le tulafono e faasa ai le inupia o tupulaga e le’i atoa le 21 tausaga le matutua, ona e laititi tele o latou mafaufau e aafia gofie i le malosi o le oona o le pia.

“E le o se uo lelei le pia ia te oe, e o o fo’i i au uo sa faaosooso ia te oe, e le o ni tagata lelei na e tatau ona e faauo i ai, lea la ua o ese au uo ae saisaitia ai na o oe,” o le fautuaga lea a Ward II ia Vallen.

O le faalua ai lea ona molia Vallen i luma o le faamasinoga faaitumalo i solitulafono e aafia ai le ‘ava malosi e pei ona saunoa le ali’i faamasinoga.

I le nofo vaavaaia ai o Vallen mo le 24 masina, ua faasa ona ia toe tagofia le ava malosi, faasa ona toe faatasi ma ana uo sa auai sa masani ona tafao i ai, ae ua fautuaina o ia e auai i ni aoaoga faa faufautua e fesoasoani ai i aafiaga o le ava malosi e fesoasoani ai i lona olaga.

E ese mai i le mataupu lea ua faasala ai Vallen, o lo o i ai fo’i le isi mataupu i luma o le faamasinoga maualuga i le taimi nei, lea o lo o tuuaia ai o ia e le malo i le moliaga mamafa o le talepe fale i le tulaga lua atoa ai ma le solitulafono mama o le gaoi.

O ia tuuaiga na afua mai i le faalavelave lea na o latou osofaia ai ma ni isi alii se faleoloa i Satala i le po o le aso 4 Ianuari 2012. I faamaumauga a le faamasinoga o lo o taua ai e faapea, o Vallen na tu tu i fafo e vaai ni tagata e o atu ae o ana uo na o i totonu o le faleoloa ma gaoi mai ni oloa sa i ai, ma latou tufatufaina ai loa oloa sa maua mai i lea osofaiga.

E $10,000 le tupe lea ua faatulaga e le faamasinoga e tatala ai Vallen i tua mai lana mataupu lea, e faatali ai lana ulua’i iloiloga lea ua faatulaga e faia i le masina fou.

LIZZA GA’OTALA

O le aso 8 o Iulai lea ua faailoa e le loia a Lizza Ga’otala ia Michael White i luma o le faamasinoga maualuga e faapea, e tatau ona oo atu i ai ua maea ona sainia le maliliega o lo o talanoaina i le va o le malo ma le ua molia ma faai’u ai loa lenei mataupu.

O ananafi na fofogaina ai le isi ulua’i iloiloga o lenei mataupu i luma o le afioga i le ali’i Faamasino le tumau ia Elvis P. Patea ma le afioga i le ali’i fa’amasino lagolago ia Faamausili Pomele.

O Ga’otala o lo o tuuaia i moliaga mamafa e lua o le gaoi ma lona ave faaagaoi o ni tupe sa tuuina atu i lalo o lana vaavaaiga, a’o avea o ia ma Failautusi o le Asosi a Matua ma Faiaoga (PTA) a le Aoga Maualuga a Samoana i le 2012, lea na ia faaaoga ai le silia i le $2,000 mai i le teugatupe a le PTA.

Ina ua alia’e mai lenei mataupu i le masina o Tesema 2012, sa tuuina atu ai e le PTA ia Ga’otala le aso 31 o Ianuari 2013, e toe totogi atu le tupe ae ina ua le taunuu lea tulaga na tuuina atu loa e le PTA lenei mataupu i le Ofisa o le Loia Sili.

O lo o tumau pea poloaiga a le faamasinoga o lo o tatala ai i tua Ga’otala, e faatali ai le aso lea ua faatulaga e toe tula’i ai i luma o le faamasinoga.

TETE’E JOSEPH IAKOPO I TUUAIGA A LE MALO

Ua teena e le alii o Joseph Iakopo moliaga e 34 faasaga ia te ia, ina ua tula’i i luma o le /Faamasinoga Maualuga i le vaiaso nei ma ua faatulaga ai loa lona ulua’i iloiloga e faia i le masina fou, o iina lea o le a faamanino ai le tulaga tonu e tatau ona taoto ai lana mataupu.

O lo o tuuaia Iakopo i moliaga eseese e aofia ai le talepe fale, gaoi, faaoolima, taumafai e talepe se fale faapea ai ma le faaleagaina o meatotino a tagata.

E ese mai i Faleoloa, Fale’aiga ma le maota o le Faifeau ua maea ona lomia e le Samoa News na osofa’i ma talepe e le ua molia, e toafa isi aiga na osofaia e Iakopo a latou fale i le masina o Aperika ma Me e pei ona taua i faamaumauga a le faamasinoga.

O ni isi o mea totino o lo o masalomia na gaoia e lenei alii, na aofia ai DVD player, sipika, mea pue’ata, lavalava, taaloga a tamaiti ma le anoanoa’i lava o isi ituaiga masini uila.

Ina ua uluai fesiligia e leoleo ia Iakopo i nei mataupu, sa ia tuuina i leoleo se faa fanua o fale uma sa ia osofaia i Pavaiai ma Cango Hill.  O oloa uma na gaoia e Iakopo sa toe maua uma e leoleo i le fale o le aiga na nofo ai i Faleniu. 

O lo o taofia pea Iakopo i le toese i Tafuna sei vagana ua totogi le $150,000 ona faatoa mafai lea ona tatala o ia i tua mai le toese.