Pe a o’o i le aso 12 Aukuso, 2013, ua amatalia le olaga tautua o Christina M. Hammock i le NASA Center i Houston Texas, peita’i o ia o se tasi o tama’ita’i faigaluega i le Nofoaga o le NOAA i Matatula, [le nofoaga lea sa sailia fo’i i ni tausaga talu ai, ona sa fa’apea o le nofoaga lea na mulimuli lava va’aia ai se tasi o le aufaigaluega a le Va’ai Tau, ona le mailoa loa lea o lona tino!]

O Christina Hammock o se tasi o lo’o fa’afaigaluega mai e le NOAA mo a latou ofisa va’ai tau, peita’i, na soifua ane o ia i le a’ai o Jacksonville, North Carolina. Peita’i, i le taimi nei ua fa’amautu lona aiga i Livingston Montana.

O lana tala ata lea ma le fiafia tele, aua sa fa’aulu lana talosaga e fia avea ai o ia ma se tagata fealua’i i va’a o le vateatea, ae na te le’i mautinoa lava, e tau ane se fa’atatau a le NASA e filifilia ai lona tagata e avea ma se “asitoronoti.”

O Tina lea o lo’o ia fa’atautaia nei le Ofisa o le NOAA i Matatula, ma ua fa’ato’a atoa le 34 tausaga o lona soifua, e le’i faia fo’i sona aiga.

O se galuega ese fo’i o lo ua ia sauni atu i ai, ma ua fa’ailoa mai e Tina, “O ai na te fia sofa’ia le vateatea ma vanimonimo ae le mata’u i le Atua foafoa? O le tele o sailiga i le taimi nei a le NASA, ua sailia nofoaga o nisi paneta e mafai ona ola saogalemu ai tagata e pei o le lalolagi, ae pei uma lava, ua amata ona sailia e tagata le Lagi o le Atua soifua!”

Ua mae’a fa’ailoa mai ia Tina, e lua tausaga e a’otau ai i latou ua filifilia, ona fa’ato’a mafai lea ausia tomai e mafai ai ona folau i va’a o le vateatea. E matele a’oa’oga i le tulaga o le tausiga o le tino i luga o nei ituaiga o va’a.

“Ua ou sauni mo nei a’oa’oga, ua tatau fo’i ona ou tulaueleele ma fa’afoe se tasi o T-38 Jets, o ituaiga va’alele nei na gaosia fa’apitoa e le NASA e a’otauina ai latou pailate folau i va’a o le vateatea.” O sana tala ata lea.

O isi vaega tele o lenei a’oa’oga, o lou iloa lelei lea ona tausia o lou soifua maloloina i le maualuga o le vateatea o le a e folau ai. Ua i ai so’otaga vavalalata o Tina ma le tatou atunu’u, i lona tina Samoa o Tala Silao mai Tula.

“Ina ua ou iloa ua talia mai le talosaga a Tina, na maligi lava o’u loimata, aua o le a tu’ua fo’i le mafutaga ma ia, ae fiafia tele lo’u loto, aua o Tina e naunau ia avea o ia ma se tasi na te fa’afoea va’a o le vateatea, ua tino mai lana miti!” O se tala lea a Tala Silao.

O se tasi tama’ita’i Samoa o lo’o faigaluega fa’atasi ma Tina, Vai Talamoa o Malaeloa, sa ia fai mai ai, “Ou te mitamita lava a’u, aua o ai e mafai ona fai atu i nisi, ‘o le tama’ita’i ave va’a o le vateatea le la sa ma faigaluega, talanoa ma masani lelei?’ O se mea e le tupu so’o, ma e seasea ona o’o ia te ita lea ituaiga o fa’aeaga! Ua ou fiafia tele ua mafai ona maua le avanoa sa fa’amoemoe Tina na te maua, ae sili ona fa’afiafiaina o a’u, aua ou te iloa lelei lea tama’ita’i laufofoga fiafia, agamalu ma loto fesoasoani ia te a’u i le galuega!”

E i ai se mea e te alu ma oe i le vateatea, Tina?

Ua pau lenei o le atunu’u ua tau le fia tu’ua e Tina, “O isi a’u galuega sa ou galue ai Anetatika i matu, ma soso’o ai ma le toe galue fo’i o le pole i saute ma e matele ina malulu lava nei nofoaga, soso’o lea ma Greenland ae o lea ua matou ou fiafia lava e nofo i le tau o Amerika Samoa, ua ou le fia alu ese ai! E tali tutusa la’u galuega i Barrow Alaska, lea na soso’o ma lona sau i’inei.”

A’o nofo ma galue i Amerika Samoa, e tele taimi e sopo ai o ia i le vaomatua, maulu i le sami o le tatou gataifale, ma scuda diving i le gataifale matagofie o Manu’a ma Tutuila.

“O se lalolagi matagofie lea e ola ai tagata Samoa i lalo nei!” O se tala fa’amama’i lea  Christina M. Hammock, asetoronoti filifilia o le vateatea. E le’i nofonofo ai Tina i lona lea taofi, ae sa tele mea sa ia fa’asoa ai e tusa o lona talitonuga. Sa ia talanoa i fanau aoga sa asia le Ofisa o le NOAA i Tula ma Tafuna, na o’o fo’i ana asiasiga i le tele o A’oga Maualuluga o le tatou atunu’u ma talanoa ai e tusa o galuega patino i le tau ma le si’omaga.

E lua fa’ailoga BSc in Physics & Eletrical Engineering ae tasi lona Masters Degree mai le Iunivesite o North Carolina i le Electrical Engineering. Fa’amanuia atu le Samoa News i le fa’aeaga ua maua fo’i e Tina Hammock a’o tatou o mafuta vavalalata e ala i lana tautua i le NOAA - Matatula.

fa’aliliu: Leua Aiono Frost