Vaega: 94

Taeao manuia i le alafa’i mai o le atunu’u i fanuga lelei i lenei taeao fou i le tausiga alofa a lo tatou Matai i le lagi, e ao ai ona o tatou fa’afo’i le vi’iga ma le fa’afetai i le Atua Soifua, ona o lana tausiga alofa i aso uma o lo tatou ola.

Ua ma ulufale nei i totonu o le potu o lo’o i ai Tino, ma na fa’ate’ia fo’i si a’u uo, ona sa leai sona manatu o le a ma ou atu ma lo’u tama i le aso. Na ma feiloa’i nei, ae ua na o le pupula to’a mai ia te a’u, “Averia, o a mai oe, ua e malosi, ua le mafai ona ave’ese lo’u loto ma lo’u mafafau mai ia te oe.”

Na ou ‘ata nei ma ou a’apa atu ua fusi mai si a’u uo sa agalelei ma alofa ia te a’u i taimi sa ou mo’omia ai le fesoasoani. Na tu nei lo’u tama ma tilotilo mai ia ma’ua i lea taimi, ma ata mai. Ua ou le iloa po’o le a le uiga o le ‘ata a lo’u tama, ae pei uma lava o lo’o i ai se mea ua iloa e lo’u tama, ae ou te le o iloaina.

Na u’u nei e Tino lo’u lima ma ma savavali atu loa i le isi itu o le potu lea o lo’o nofo mai ai nei lo’u tama. Ua ma saofafa’i ifo i luga o le sofa ma e foliga mai o lo’o i ai se mea o lo’o tupu, ona e leai lava se tala a lo’u tama na fai mai ia te a’u. Na ou tilotilo atu nei i lo’u tama i lea taimi, ae na ou iloa atu o lo’o ‘ata’ata ma tilotilo atu ia Tino.

“Tino, fa’afetai ua tatou feiloa’i, o lea fo’i ua i ai Averia, ae o le itu muamua lava ou te fia talanoa atu ai, ona e le i iloa e Averia se mea e tasi, ia o lea la o le a ou tautala atu ia Averia, e tusa ai ma lou o’o mai.”

Na ou tilotilo atu nei i lo’u tama i le taimi, ma ou manatu ua fa’aluafesasi, ona ou te le o malamalama i le mea lea e tupu. Na ou toe tilotilo ifo nei i si a’u uo o Tino i lea taimi, ae ua na o le punou ua leai se tala e fai mai. Ua fa’alologo nei o’u taliga i le mea lea o le a tautala mai ai lo’u tama i lea taimi.

“Averia, si o’u afafine pele, ia e malie, ina nei te’i lava ua e fa’apea mai ua  ou fia pule ma fai le tala ia Tino, e leai, sa o ma talanoa ma tino i le lua vaiaso talu ai, ma o aso uma lava talu ona tatou o mai, e le misi lava le vala’au mai o Tino ia te a’u, ae sa ou musu lava e logo oe, ona o mea o lo’o tutupu i totonu o lo tatou aiga.”

Na ou va’aia nei foliga fa’anoanoa o lo’u tama i lea taimi, a’e o lo’o fa’alogo pea o’u taliga po’o le a le uiga o lana tala lea o le a fai mai ia te a’u. Na tau fai lava si faigata ona fai mai le tala a lo’u tama, ona ua ou va’ai atu nei, ua amata ona punou ifo ma lulu lona ulu. Na ou tu a’e nei i luga ma ou savali atu i le nofoa o lo’o nofo mai ai lo’u tama, “Papa, fa’amolemole, tautala mai, out e fia iloa po’o o le a le mea o lo’o e mana’o ai, o mea uma lava o lo’o tutupu i totonu o lo tatou aiga, o lena ua uma ona ou tautala atu Papa, ou te onosa’i lava, ma tausi le filemu, ona o lo’u alofa ia te oe lo’u tama. ‘Aua e te popole ia te a’u, o lo’o malosi lava lo’u loto e talia ai mea uma, ae saunoa mai po’o lea le mea lea e tupu, ina ia ou malamalama ai.”

Na ou fa’alogoina i lea taimi le u’u mau e lo’u tama ia lo’u lima, ma na ou iloa ai loa iina o lo’o i ai se mataupu ogaoga o lo’o fia talanoa mai ai ia te a’u, a’o le mea na ou popole ai ma ou matamuli ai, ona o lea o lo’o fa’alogologo Tino i lea taimi.

“Averia si o’u afafine pele, ua e iloa lava lo’u alofa ia te oe, ma e leai se tasi na te mafai ona ave’esea, ae ua o’o mai Tino i lenei aso, ona e pei ona ou fai atu sa maua pea la ma feso’ota’iga ma Tino talu ona tatou o ‘ese mai, o lea lava ua o’o mai i le mea mamao, tiga ona mamao le ala ae ua sau lava, ona o lona alofa mai ia te oe i mea uma.”

“Averia, ua talanoa mai Tino, ua mana’o e te lua fa’aipoipo, ua malilie fo’i i ai matua o Tino ma ua tu’u mai a la fa’amanuiaga mo oulua, pe afai o le a e ioe ia lua fa’atasi ma Tino.”

“Averia, lo’u afafine, ua ou malie atoatoa i ai, o a’u fa’amanuiaga fo’i mo oulua o lea ua ou tu’u atu i o oulua lima, o le fa’amoemoega fo’i lea o lo’o loto ma lo’u agaga, ia oulua fa’atasi ma mafuta ma Tino i aso uma o le olaga, ae se i vagana ai le oti na te tatalaina.”

E faia pea