O le ali’i e 49 tausaga le matua lea na ia toso faamalosi se teineititi e 7 tausaga i tua i se togavao ma le faamoemoe na te faia i ai uiga mataga, sa ia faailoa i le faamasinoga maualuga i le taeao ananafi e faapea, o le Tiapolo na faaosoosoina o ia na te faia nei uiga mataga i le teineititi na aafia, faaopoopo atu i ai ma le ova o lona ‘ona i le taimi na tula’i mai ai le solitulafono.

O le faaiuga o le gaioiga solitulafono sa faia e le susuga a Fiapito Faalogo, ua faasala ai loa o ia e le faamasinoga maualuga ina ia taofia i le toese mo le 10 tausaga e aunoa ma le avanoa e palola ai i tua, ina ua ta’usala o ia i le solitulafono mamafa o lona faia lea o ni uiga mataga i se teineititi laititi (child molesting).

O le mataupu e pei ona fa’asala ai e le faamasinoga Faalogo, na alia’e mai ina ua logo e se tama le ofisa o leoleo mo se fesoasoani, ona o si ona afafine e 7 tausaga le matua ua faia i ai e le ua molia ni uiga mataga, ma tofia ai loa le alii leoleo ia AJ Tagoa’i na te suesueina lenei mataupu.

A’o le’i tula’i mai lenei faalavelave, ua fai si leva o lamalama e le ua molia se auala na te faia ai ni uiga mataga i le teineititi na aafia i Pava’ia’i.

O le alii o Faalogo sa nofo i le fale o le aiga lea e tuaoi ma le fale o le teineititi na aafia i lenei mataupu, ma i se taimi o le aso 20 Ianuari, 2013 e pei ona taua i faamaumauga a le faamasinoga, na tula’i mai ai le faalavelave ina ua alu atu le teineititi e faaaoga le latou Fale Taele (tulou), ae faafuase’i ai loa ona oso atu le ua molia ma toso faamalosi lona lima ma fai i ai la te o aga’i i le ma’umaga peitai sa musu le na aafia ma fai ia Faalogo e soia.

E tusa ai ma faamaumauga a le faamasinoga, o lo o taua ai e faapea, e tiga lava ona musu le teineititi i le taimi na toso ai e Faalogo lona lima aga’i i le ma’umaga, ae sa taumafai malosi pea le ua molia e ave le teineititi i le mea o lo o mana’o i ai, ina ia faataunuu ai lagona tu’inanau o lo o ia te ia.

Ina ua la taunuu i tua i le ma’umaga, sa tago loa Faalogo ua faataoto le teineititi i lalo, ona muamua lea tatala ona ofu o lo o fai, faatoa tago atu ai ma taumafai e toso i lalo o le ofu o le teineititi o lo o fai, a’o le taimi lea e le o malolo ai lona gutu i le taumafai e kisi atu i foliga o le teineititi, ma ona lima o lo o tago tago solo i le itutinosa o le teineititi na aafia.

A’o faia gaioiga le popoi a le ua molia, na te’i ina ua ia faalogo atu o tauvalaau atu le tuagane o le teineititi i le igoa o lona tuafafine, e le’i toe faatali le ua molia ae na tu loa i luga ma tamo’e i le atoa aga’i atu i le isi itu o le ma’umaga, ae tu le teineititi i luga ma toe savali aga’i atu i le latou fale, ona ia faamatala lea i lona grandmother o gaioiga a Faalogo sa fai ia te ia, ma faafesootai ai loa e le aiga le Ofisa o Leoleo mo se fesoasoani.

Na fiu leoleo e tau saili Faalogo i le aso na tulai mai ai le faalavelave latou te le’i maua, ae i le vaveao po lava o le aso na soso’o ai, na latou toe o atu ai i le fale o lo o nofo ai le ua molia, ma latou maua atu ai se ali’i o tu tu mai i luma o le paipa, ona latou fesili lea i ai pe na te iloa se tagata e igoa ia Fiapito Faalogo, ae na tali le ua molia, “e le’i leva ona alu ese atu ma le fale.”

Ae ina ua faliu leoleo o le a toe fo’i, na talo atu i ai se tagata o le aiga o le teineititi na aafia ma faailoa atu i ai, o le tagata tonu lava lena o lo o latou tau sailia, ma e le’i toe faatali leoleo i le taimi lea, ae na latou toe fo’i atu loa ma pu’e faapagota le alii na latou talanoa ma iloa mulimuli ane ai loa, o ia tonu lea e igoa ia Faalogo.

I luma o le faamasinoga maualuga ananafi, na faatoese ai Faalogo i alii faamasino, o le malo o Amerika Samoa, aemaise ai loia ma tagata uma sa i ai, ina ia faamagalo o ia e tusa ai o lana solitulafono sa fai.

E le gata sa ia tuuaia le malosi o lona ‘ona o le mafuaaga lea o le solitulafono, ae sa ia taua fo’i, e faapea, “o le malosi o faaosoosoga a le tiapolo na mafua ai ona sese la’u faaiuga na fai ma ou soli ai loa le tulafono.”

Na taua e Faalogo e faapea, o masina e 10 talu ona taofia o ia i le toese i Tafuna, ua ia aoaoina ai se lesona taua mo lona olaga, ma ua ia manatu ai, o le toese e le o se nofoaga lelei mo ia, e le maua ai fo’i se lumana’i lelei mo lona aiga.

Sa ia faatoese i le teineititi na aafia ma lona aiga ina ia faamagalo o ia, sa ia faatoese foi i le aiga sa nofo ai i Pava’ia’i, ina ia faamagalo o ia e tusa ai o lana solitulafono sa faia.

I le faaiuga o lana faatoesega, sa ia talosagaina ai le faamasinoga mo se isi avanoa mo ia se’i toe fo’i atu ai i lona aiga e tausi lona tama ma saili se galuega mo ia.

Na taua e lana loia fautua ia Joel Shiver e faapea, e foliga mai ua avea le fefiloi o le ‘ava malosi ma le ma’i o lo o aafia ai Faalogo o le tu’inanau i tamaitai, ma itu na le mafai ai ona ia taofi o ia mai lona faia o lenei solitulafono.

E le’i finau Shiver i le faamasinoga mo se faasalaga mama mo le ua molia, ae sa ia manatu e taoto atu pea i se finagalo o le faamasinoga.

Ae i le faafinauga a le loia na tulai mo le malo ia Camille Phillipe i le faamasinoga, sa ia talosagaina ai le tatau lea ona faasala Faalogo i le toese i Tafuna mo le 10 tausaga.

O le solitulafono lea ua ta’usala ai Faalogo, o se solitulafono A i solitulafono mamafa, lea e mafai ona faasala ai se tasi i le toese mo le umi e le itiiti ifo i le 10 tausaga, ae le sili atu foi i le 15 tausaga, e aunoa ma se avanoa e palola pe nofovaavaaia ai fo’i.

E le’i atoa se 3 minute na iloilo ai e alii faamasino la latou faaiuga, ae o latou tuuina mai loa le latou faasalaga, e 10 tausaga lea o le a loka ai Faalogo i le toese i Tafuna, ma o lea faasalaga e tuli sa’o e aunoa ma se palola pe nofovaavaaia foi, ae aofia ai ma masina e 10 lea ua oo mai i le taimi nei ua uma ona ia tuliina.