[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na fesili atu ai Lisa i le tamaititi o Lisati, pe aisea lava ua tupu soo ai lenei mea i le va o lona tina ma Lasela.]

Na avea le maea o le vevesi ma itu na amata ai loa ona maui atu le tumutumu o tagata na lolofi atu e fia iloa le au o le paipa, e o o i tagata o le nuu o Amouta na o atu e faatali Lisati ma lana uo mai Niu Sila, ua toe fo’i i le nuu ma tali e i le vaaiga sa tulai mai i le malae vaalele, aemaise ai lava le va o le tina o Lisati ma Lasela lea ua foliga mai ua fai ma va e le mafai ona toe taofia. O le naunau o Lisa na te fia maua se tali mai ia Lisati e tusa ai o lana fesili, na mafua ai ona ia toe augani i le tamaititi ina ia faailoa ane ia te ia se mea na te le o iloa, ina ne’i i ai se mea e pogisa ai lona mafaufau i le la ulua’i mafutaga ma Lasela.

“Se!, e leai se ma ulua’i mafukaga sa faia ma Lasela, ga ou fai aku fo’i ia ke oe, o faigauo lava faa kamaiki o le guu i kokogu o le aoga sa kula’i mai i lo ma va, ae o gisi mea e pei oga e mafaufau i ai, ua ou leai aku ...” o le tali faasa’ea atu lea a Kati i le fesili soo atu o Lisa ia te ia, ona toe faasaga ane lea ua fesoasoani i lona tina i le tau faaleleia o manu’a i ona foliga ae fetaui loa ma le sosolo atu o le taavale a le falema’i.

Toeititi leai se isi o le au faatali pasese e le i tomumu i fomai tamaitai se toalua na o atu i le taavale falema’i faapea ai ma le ave taavale, i le fai’aga ma le tuai atu o le taavale, pe ana fai lava o se ma’i e oso ma oti ai se tagata lona uiga e o o atu i le malae vaalele ua malo tia’a le ma’i. “Augasa fo’i legei kaavale falema’i se’i vaai ua koeikiiki akoa le lua ikula o kau faakali le kou kaavale ao legei faakoa sosolo mai, iga faakopekope ia kou gaioi ua leva oga mafakia si fafige i kiga o magu’a o loga kigo,” o le tomumu ane lea a le isi olomatua sa alu atu ai i le faataliina o le au malaga.

Ua foi le toatele o le nuu faapea ai Kati ma Lisa ma lo la aiga i le fale, sei vagana ai le tina o le tamaititi lea ua ave i le falema’i mo nisi o togafitiga i le matuia o manu’a na aafia ai ona foliga, e mafua mai ina ua fasi o ia e Lasela ma lona aunty Tomboy. Talu mai lea aso, sa avea pea nei faaletonu o se fesili e le o mafai ona tali i le mafaufau o Lisa. Ui o lea, o lea ua taunuu manuia le faigamalaga a le tamaititi i lona nuu, ma ua sauni fo’i i le isi laasaga tele e pei ona la fuafuaina ma Lisa, o le faia lea o le la faaipoipoga i totonu o lona nuu o Amouta ma amata loa ona atina’e le la pisinisi faleoloa lea ua fuafua e faatuina lava i luma o le latou fale apa ma nai ona matua. Ua suia atoa le olaga o le aiga i totonu o le nuu, e o o lava fo’i i tupulaga o le nuu, ua sui atoa le auala e ola ai tagata ona o faataitaiga lelei ma fautuaga e avatu i ai e Lisati ma lana uo, ona o le naunautaiga o le tamaititi, ia avea lona nuu o Amouta o se aiga e tasi.