SIAUMAU SIAUMAU JR

I le maea ai o le isi iloiloga a le susuga ia Siaumau Siaumau Jr. na valaauina i le vaiaso nei, ua manino mai ai le tele o le taimi o lo o manaomia e le loia fautua ua tula’i nei mo le ua molia, e iloilo ai nisi o talosaga sa faaulu e le loia sa avea muamua ma loia fautua a le ua molia.

Na taua e le alii faamasino sili lagolago ia Lyle L. Richmond e faapea, o se tasi o itu o lo o atugalu i ai le faamasinoga i le mataupu a Siaumau Jr, o le tele o talosaga sa faaulu e loia e le i iloiloina lava e le fa’amasinoga.

O le tele o nei talosaga sa faaulu e le alii loia na ulua’i tula’i mo Siaumau Jr, le afioga ia Tautai Aviata Faalevao, lea o lo o i ai nei i Amerika ona o tulaga i gasegase o le tino.

Na taua e le alii loia ia Mike White lea ua avea nei ma loia fautua a Siaumau Jr, o le a ia vaavaai i talosaga uma e pei ona atugalu i ai le faamasinoga, ona tuuina atu ai loa lea o sana fautuaga i luma o le faamasinoga e tusa ai o ia talosaga.

Ua toe tolopo le mataupu a Siaumau Jr e aunoa ma le faatulagaina o se aso e toe valaau ai, ona o lo o toesea foi ma le atunuu le tamaitai loia ia Mitzie Jessop o lo o tula’i mo le itu a le malo.

O Siaumau Jr o lo o tuuaia i le tele o moliaga mamafa e aofia ai le fasioti tagata i le tulaga muamua, faapea ai ma moliaga o le faaaoga faasolitulafono o se a’upega, ona o le faalavelave lea na tula’i mai ia Iulai 2010 i Fagatogo, lea o lo o tuuaia ai o ia i lona tagatavaleina o le alii leoleo suesue ia Det. Lt. Lusila Brown.

SAUNI STEFFATHER TALI IOE I ONA MOLIAGA

O le stepfather 62 tausaga le matua lea o lo o tuuaia na ia tagofia itutinosa o le fanau teine a le fafine o lo o la nonofo nei, ua maea ona sainia sa latou maliliega ma le malo, ma ua ia sauni fo’i e tali ioe i tuuaiga faasaga ia te ia.

O le tausaga na te’a nei na faila ai e le malo moliaga mamafa e fa faasaga i le ua molia, e aofia ai moliaga e lua o lona tagofia o itutinoa o tamaitai se toalua e laiti i lalo o le tulafono, faapea ai ma le moliaga o lona faia o gaioiga e ono lamatia ai le saogalemu o fanau laiti.

Ina ua fesiligia e le faamasinoga le ua molia i le maea ai lea ona fofogaina o le latou maliliega sa sainia ma le malo, lea e pei ona ia tali ioe ai i le moliaga e lua o le tagofia o itutinosa o tamaitai laiti se to’alua, na tete’e ai le ua molia na te le i tagofia itutinosa o tamaitai, se’i vagana ai lona sogi atu ia te i laua.

E faalua ona fesili le alii faamasino sili lagolago ia Lyle L. Richmond i le stepfather pe moni sa ia tagofia itutinosa o tamaitai laiti e toalua na aafia, ae sa tumau pea le tali a le ua molia, “ou te le i tago i ai se’i vagana ai lona kisi atu ia i laua.”

Ua toe tolopo le fofogaina o le maliliega i le va o le ua molia ma le malo e toe faaauauina i le vaiaso nei, ma ua fautuaina e le faamasinoga le loia a le ua molia ia Joel Shiver ina ia toe talanoa i le ua molia e tusa ai o le maliliega lea ua latou faia ma le malo.

Ae i faamaumauga a le faamasinoga e uiga i lenei mataupu, sa ioeina e le ua molia i leoleo ina ua fesiligia o ia i le tausaga na tea nei, lona tagofia o itutinosa o tamaitai e toalua, atoa ai ma lona faia i ai o ni isi o uiga mataga.

Na taua e tamaitai na aafia i leoleo e faapea, o taimi lava e masani ona faia ai e le ua molia uiga mataga nei ia i laua, o taimi e tuua atu ai le la aoga, po o taimi fo’i e alu ai lo la tina e fai lana tagamea, ae o le tele o taimi la te tauina ai i lo la tina uiga mataga o lo o fai atu e le ua molia ia te i laua, e na o le ote ai lava o le la tina i le ua molia e soia, e aunoa ma le faia o se isi faaiuga.

ROTORUA TOAILOA

O le tamaita’i talavou lea o lo o tuuaia i lona ulufale faamalosi i totonu o se falesu’isu’i i Malaeimi ma taumafai e faaoolima i le fafine Asia e ana le falesu’isu’i, ua toe tolopo lana mataupu e toe fofogaina i le aso 2 Mati 2014, e faatali ai se ripoti mai le foma’i lea ua sauni e su’esu’eina lona mafaufau, ona o lo o i ai ripoti e aafia o ia i le gasegase o le mafaufau.

Ina ua valaau le mataupu a Rotorua Toailoa i le vaiaso nei i luma o le faamasinoga, sa talosagaina e lana loia fautua ia Douglas Fiaui le faamasinoga ina ia toe tolopo le aso e toe valaau ai lenei mataupu, ona o lo o ia faatali i le foma’i o le mafaufau mo le faatinoina o sana suesuega i le tulaga o lo o i ai le malosi o le mafaufau o le tamaitai ua molia, pe gafatia e le malosi o lona mafaufau ona tali i tuuaiga faasaga ia te ia, pe a o o i le aso e faataunuu ai sona faamasinoga autu.

E le i faatuiese le loia a le malo is Stiffany Oldfield i le talosaga a le itu tete’e, ae sa ia faailoa i le faamasinoga lona lagolagoina o le talosaga e toe tolopo le mataupu sei faatali se suesuega a le foma’i o le mafaufau mo le ua molia.

O lo o taofia pea Toailoa i le toese i Tafuna e aunoa ma se tupe ua faatulaga e tatala ai o ia i tua, ona o tulaga faaletonu i ona pepa nofomau.