O le aso Gafua na te’a nei na tulai ai i luma o le faamasinoga faaitumalo se taule’ale’a mai Fagatogo, i le maea ai lea ona faila e le malo o le moliaga mamafa ia te ia, e afua mai i le faalavelave lea na maua atu ai le tino o se ali’i o maliu i totonu o le latou fale i Fagatogo i le masina ua te’a.

Ua molia e le malo le alii o Gallen Leasiolagi i le moliaga mamafa o le fasioti tagata pa’i valea, atoa ai ma le moliaga mama o le faatupu vevesi i nofoaga faitele, ma o lo o taofia pea o ia i le toese i Tafuna, sei vagana ua ia totogi le $20,000 ona faatoa mafai lea ona tatala o ia i tua.

O le mataupu lenei na tofu atu i le Ofisa o Leoleo i Fagatogo, ina ua talosagaina e le uncle o le ali’i ua maliu se fesoasoani, ina ua ia maua atu lona nephew o lo o taatia mai lona tino i totonu o le fale ua maliu, i le afiafi o le aso 15 Fepuari, 2014, ma tofia ai loa le alii leoleo suesue ia Det. Filemoni Amituana’i na te suesueina lenei mataupu.

Na taunuu leoleo ma sui o le EMS i le fale na maua i ai le tino o le alii na maliu, ma vaaia ai le tino maliu o lenei alii ua amata ona malo, e foliga mai ua fai si umi talu ona maliu o ia, ae na tusa ai o le agavaa ma le tomai o le ali’i leoleo sa gafa ma le suesueina o lenei mataupu, e foliga mai ua tusa ma le 5 i le 6 itula talu ona maliu lenei alii, e pei ona taua i faamaumauga a le faamasinoga.

Sa suesue e leoleo le tino o le alii na maliu ma maua ai unao’a i ona foliga ma lona fatafata, e foliga mai sa i ai se gaioiga sa faia e se tasi poo nisi tagata ia te ia a’o le i maliu o ia.

A’o faagasolo suesuega a leoleo e faatatau i lenei mataupu, sa taua ai i ni faamatalaga e faapea, o le alii ua maliu sa fasi i le taimi o se latou inugapia sa faia ma ni isi o ali’i o le nuu, ae ina ua fesiligia e leoleo ni molimau se to’alua, sa taua ai e molimau le igoa o Leasiolagi e faapea o ia lea o lo o masalomia na faaoolima i le alii ua maliu.

Na taua e le molimau i leoleo e faapea, a’o latou nofonofo ma le alii ua maliu i luma o le faleoloa o le Fashion Boat i Fagatogo, na fa’afuase’i ona savali atu Leasilolagi ma amata loa ona ia ta tu’i foliga, o le tino ma le ulu o le ali’i ua maliu i ona lima.

Na taua e le isi molimau e faapea, a’o savali atu i luma o le Fashion Boat, sa ia vaaia ai le alii ua maliu ma le isi alii o lo o inupia mai i luma o le nofoaga lea, e lei umi ae ona vaaia loa lea ua molia ua savali agai atu i le vaega o lo o inupia ai le ua maliu ma lana uo.

Na vaaia e le molimau ni tauga upu i le va o le ua molia ma le alii ua maliu, sa leo tetele fo’i i laua i le taimi na la tau upu ai, o lea na ia savali atu ai loa ma fautua ia i laua sa tau upu e soia le soona pisa leo tetele, ina ne’i manatu le faifeau o latou uma lea o lo o pisa ma lau lau vavale atu i luma o le faleoloa.

Na taua e le molimau i leoleo e faapea, a’o ia fautuaina le ua molia ma le alii ua maliu, na te’i ina ua savali atu le ua molia ma amata loa ona ta tu’i foliga ma le ulu o le ali’i ua maliu i ona lima.

Na taua e le isi molimau e faapea, o le tu’i muamua lava a le ua molia i foliga o le alii ua maliu na vaaia ai le tifa o le alii i le isi itu, ona faaauau ai lava lea ona ta tu’i e le ua molia foliga, o le fatafata ma le ulu o le alii ua maliu, e aunoa ma le taumafai o le alii ua maliu e tali tu’i o lo o tau i lona tino.

Ina ua maea ona faaoolima Leasiolagi i le alii ua maliu, na taua e le molimau le talosaga o lea alii ia te ia, ua ia faalogoina le tiga o lona ulu, fatafata ma lona manava, e mafua mai i tu’i sa tau i lona tino.

Na fai le molimau i le alii ua maliu la te o i le falema’i e vaai se foma’i peitai sa musu le na aafia, o lea na alu ai loa le molimau ma momoli le alii na aafia i le fale, ina ua maea, sa alu le molimau ma ta’u i lona tama le mea ua tupu, ona vili lea o le tama o le molimau i le alii na aafia e siaki poo a mai o ia, ma fai i ai pe le mana’o e ave o ia i le falema’i ae na tali le na aafia e leai.

O se manu’a na aafia ai le ulu o le alii ua maliu e pei ona taua i le ripoti a le alii fomai ia Dr. Amor Conzales sa faia se suega faapitoa i lona tino, na mafua ai ona oo le maliu i le alii na aafia.

O le solitulafono o le fasioti tagata pa’i valea, o se solitulafono C i le faatulagaina o solitulafono mamafa, lea e mafai ona faasala ai se tasi i le toese mo le umi e le sili atu i le 7 tausaga, pe faasala foi i le salatupe e le silia i le $5,000, po o le faasala fo’i i fa’asalaga uma ia e lua.