[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na tuu atu ai e Kati i le taitai leoleo le ripoti atoa o le suesuega sa faia, faatasi ai ma lana talosaga, ua tatau ona agai atu leoleo mo le pu’eina mai o i laua o loo tuuaia i le faalavelave na maliliu ai leoleo ma tagata savili.]

Na ona tuu atu lava e Kati o lana ripoti i le taitai leoleo, faatonu loa e le taitai ana tama faapitoa e toalua la te momoliina le ripoti o le Ofisa o le Loia Sili, a maea, ona momoli lea i le Faamasinoga mo le sainiga o se poloaiga e pu’e faapagota ai le aualii ia ua tuuaia i le faalavelave na maliliu ai leoleo ma tagata savili i totonu i le lua aso talu ai. “O le a ou faatali mai i le nofoaga na tulai mai ai le faalavelave i au tama faapitoa ia o le a tofia matou te galulue i le mataupu lenei, atoa ai ma isi mataupu o loo faia pea i ai suesuega,” o le tala lea a Kati i le taitai leoleo, ona la lulu lima lea ma faatofa, ona savali lea o le tama i lana taavale ae faasaga atu le taitai leoleo ua fai faatonuga i ana tama faapitoa e toafa ia ua ia filifilia, e galulue faatasi ma Kati i le taulimaina o mataupu tau solitulafono. “Ia outou iloa o le tagata lenei o le a outou galulue, e le o se tama’i tagata, ia outou faaaloalo i ai, o ia foi o le taitai ia te outou, a i ai se isi mea e manaomia ai le fesoasoani a le Ofisa, vili mai,” o le faatonuga mulimuli lea a le taitai leoleo na tuuina atu i ana tama faapitoa, ona tu lea i luga ma savali i lona ofisa.

E lei umi ona taunuu Kati i luma o lana fale kofe  lea e masani ona malolo ai i aoauli, ae ona tatagi loa ma lana telefoni, ma le tago atu e tali, o le pule o le fale kofe lea o loo telefoni mai i totonu o le faleaiga. “A maua sou avanoa ona e toe fesootai mai lea ia te a’u, e i ai le mataupu taua lea ou te fia talanoa atu ai i lau susuga a le alii leoleo nana,” o le tala lea a le tamaitai pule o le faleaiga, “ua lelei, o le a ou fesootai atu ia te oe i le aso lenei a’o le’i manava galuega,” e fetaui lava le maea o le talanoa atu o Kati i le pule o le faleaiga ae toe tatagi lana telefoni, ma le tago atu e tali, o alii leoleo e toafa ia ua tofia latou te galulue, lea ua o mai ma le poloaiga a le faamasinoga e pu’e faapagota atu ai le isi vaega o le kegi leaga o loo sailia e leoleo.

E le’i fevaaia’i Kati ma leoleo ia ua agai ane ma le tusi saisai, sei vagana ai fesootaiga i luga o le telefoni, ma ua tuuina atu i ai e le tama faatonuga uma e uiga i le gaioiga e tatau ona faia, peitai a’o faia talanoaga a le au vaega lea, na faateia le tama ina ua ia vaaia le masau mai o se sipi lanu uliuli ma paka i luma tonu lava o le fale lea o loo nonofo ai le aualii ia, ma ia vaaia ai loa le ulufafo mai o le au ula ia ma la ato pa’u uli ma savavali loa agai i totonu o le fale, ae o le taimi foi lea na faatonu ai loa e Kati ana leoleo faapitoa i luga o le telefoni, e osofa’i atu e le isi toalua le faitoto’a pito i luma, ae o le isi to’alua i le faitoto’a pito i tua, manu e le’i tuai.