O le alii Seila o le Lady Naomi lea na ta’usala e le fa’amasinoga i le moliaga o lona umia faasolitulafono o se vaega o fualaau faasaina o le mariuana, ona o le afifi mariuana lea na ia aumaia faanana i totonu o le teritori, ua poloaina e le fa’amasinoga maualuga na te tuliina masina e 12 i le toese i Tafuna.

Na faatoese le alii o Liki Kerisimasi i luma o le faamasinoga maualuga i le taeao ananafi e tusa ai o lana solitulafono sa fai, ma ia talosagaina ai se isi avanoa mo ia.

Na taua e le ua molia e faapea, ua lagona lona salamo ina ua ia tuu avanoa i tagata sa talosaga atu mo se fesoasoani, na te aumaia ai a latou uta i le teritori, ina ua emo ane le ata o lo o aumai ai ma fualaau faasaina i totonu o lea uta.

Sa ia faatoese i le malo a Amerika Samoa ina ua ia le usitaia ana tulafono, ma ia talosagaina ai le faamasinoga mo se avanoa e toe fo’i atu ai e tausi lona aiga faapea ai si ana fanau ua motusia la latou mafutaga mo le tele o masina.

Na tautino Kerisimasi, e le gata ua ia le faamaoni i lana galuega sa tuuina atu e le Atua e tausi ai lona aiga, ae ua ia le faamaoni fo’i i lana tautinoga sa faia o ia o se Seila mo le malo o Samoa.

Na taua e lana loia fautua ia Joel Shiver e faapea, e na o le $200 le tupe sa totogi ai le ua molia mo le aumaia o le afifi mariuana i le teritori, ma ua avea lea tupe ma itu ua faaseseina ai lona mafaufau mai le mea sa’o sa tatau ona ia faia.

Na finau Shiver ina ia nofovaavaaia le ua molia, ina ia maua ai le avanoa e toe fo’i atu ai i lona aiga i Samoa, peitai na finau le loia a le malo ia Tony Graf i le faamasinoga, ina ia faasala le alii Seila mo le 18 masina, faapea ai ma le faasalaga tupe e $2,000.

Na taua e le alii faamasino sili ia Michael Kruse e faapea, afai ua le faamaoni le ali’i Seila lenei i le faatinoina o ona tiute, o le fesili ua tula’i mai i le faamasinoga, e toafia nisi Seila o lo o galulue i le va o Samoa e lua o lo o latou faia lenei gaioiga, o le fela’uaina o fualaau faasaina i le va o motu e lua.

Saunoa Kruse e faapea, e tusa ai o ripoti ua latou maua, e foliga mai o le alii Seila ua ta’usalaina nei, sa fa’aaoga e pei o se tagata na te la’uina mai uta o fualaau faasaina i totonu o le teritori, ae totogi o ia i se totogi tupe.

E ui e $200 le tupe na taua e le loia a le ua molia sa totogi ai o ia mo le auina mai o le afifi mariuana, peitai o le tupe sa maua e leoleo i lona tino i le aso lea e $330, ma o lea tupe ua tuuina atu e fai ma vaega o lana sala tupe e $2,000 ua poloaina o ia e le faamasinoga e totogi.

E 3 tausaga na manatu le faamasinoga e taofia ai le ua molia i le toese i Tafuna, peitai ua faamalumalu lona tuliina o lea faasalaga, ae ua lava masina e 12 e taofi moi ai o ia i le toese ma le tuutuuga, a maea ona ia tuliina lea umi, ona ia tuua lea o le teritori ae aumau ai i fafo atu o le atunuu mo le umi e 5 tausaga o lana nofovaavaaia ua tuuina atu i le faamasinoga.