Fa’atalofa atu i lou alafa’i mai i le manuia i lenei taeao fou i le alofa ma le agalelei o lo’o tatou Matai oi le lagi, e ao ai ona o tatou fa’apea ifo, “Le Ali’i e, e leai se mea e tasi i le lalolagi e mafai ona fa’amalieina o matou mana’oga, ae ua na o Lau Afio lava, ia tumau atu pea le vi’iga i te Oe Tama e fa’avavau, Amene.”

I le Masina o Mati o le tausaga 1990, a’o alu le vaega lona lua o le a’afiaga o manuki i totonu o Reston, na taofia fa’aletulafono ai e le Vaega a le C.D.C i Atlanta, le toe auina ane o manuki i totonu o Amerika.

Ua toe a’apa fo’i le Vaega a le C.D.C, e se’i laisene o kamupani e tolu e i ai le Hazelton Washington, o le Charles River Primates ma le Worldwide Primates. Ua fa’asala kamupani uma nei, ina ua o latou solia tulafono e tatau ai ona tu’u ‘ese’ese manu po’o tagata ua iloa ua a’afia i fa’ama’i (quarantine). O lea faiga a le Vaega a le C.D.C, ua na o mo se taimi, ae na toe fa’atula’i mai laisene o pisinisi nei, ina ua ma’ea le fa’asalaga na tu’u i ai e le C.D.C.

O le faiga lea a le Vaega a le C.D.C na taofia uma ai le toe auina ane i totonu o le iunaite Setete o ni oka o manuki mo le tele o masina. O le a’afiaga la na o’o i ai le kamupani a le Hazelton Washington, ua faitau miliona ma miliona tupe ua lusi a le kamupani.

E ui ina faia e le Vaega a le C.D.C lea tulaga e uiga i le kamupani a le Hazelton, ae sa momoli pea le fa’afetai a le vaega a le Ami i USAMRIID i le ali’i foma’i o Dan Dalgard ma le kamupani atoa, ona o le tu’uina ane o le nofoaga sa tausi ai manuki i le Ami, ina ia fa’atama’ia manuki ua mama’i.  Fai mai le fa’amatalaga a le ali’i foma’i o Peter Jahrling, ina ua feiloa’i ma le ali’i tusi tala o Richard Preston, “O se tulaga sa pagatia ai le kamupani a le Hazelton, ona ua lusi le tele o tupu e fa’afoe ai le kamupani, ae o le mea e sili ona taua, ua faia e le kamupani ma le ali’i foma’i manu o Dan Dalgard le fa’aiuga ua sili ona lelei.”

O le nofoaga na tausi ai manuki, na faia ai se maliliega a le tagata e onaina le fale ma le fanua ma le kamupani a le Hazelton, ina ia umia e le Hazelton le nofoaga lea, ma e totogi ta’i masina. O le mea la ua tupu, ua tau maluelue le feagaiga lea, ona ua iloa e le aiga e onaina le nofoaga lea, le tulaga ua o’o i ai, ona o le a’afiaga na o’o i ai manuki sa i totonu o le nofoaga lea.

Na i’u ai lava ina tula’i ‘ese le kamupani a le Hazelton mai le nofoaga lea, ae ua toe fo’i le fale ma le fanua i le aiga e onaina, ma e o’o mai i le taimi na tusia ai e le ali’i o Richard Preston le tala moni lenei, e le i toe nofoia pe fa’aaoga e se isi kamupani.

O le ali’i foma’i o Peter Jahrling, lea ua feiloa’i nei ma le ali’i tusi tala o Preston, o ia lea ua avea nei ma Saienetise fa’apitoa i totonu o le nofoaga a le Ami, USAMRIID. O ia ma le ali’i o Tom Geisbert lea na o la mauaina le a’afiaga o manuki nei, ua o la fa’aigoaina le fa’ama’i lenei o le Reston. O le nofoaga sa maua muamua ai le fa’ama’i, lea na mamate ai manuki.

Fai mai le tusitala o Richard Preston, a talatalanoa fa’asamasamanoa ali’i ma tama’ita’i foma’i o lo’o i totonu o le nofoaga lea a le Ami i Fort Detrick, ua fa’aigoa e i latou le virusi lea na maua i totonu o Amerika, o le Ebola Reston.

E faia pea…

Fa’aliliu: Akenese Ilalio Zec