Na taua e le afigoa i le alii kovana sili ia Lolo Matalasi Moliga i sana tusi i le aso 9 Aperila, 2014, lona lagolagoina o taumafaiga ma fuafuaga a le afioga i le alii faipule i le Konekeresi ia Faleomavaega Eni Hunkin, i le ave lea o le fa’amuamua i le puipuia o le saogalemu o tagata o Amerika Samoa, i se taumafaiga ina ia faavae se vaega faapitoa e taua o le National Guard i Amerika Samoa.

Na taua foi e Lolo lona fiafia tele i se fautuaga sa tuuina atu e Faleomavaega, ina ia tofia le susuga ia Command Sgt. Maj. Iuniasolua Savusa e avea ma totino o se vaega latou te faatinoina se suesuega i auala e faavae ai se Vaega o le Puipuiga mo Ameirka Samoa, pau lona popolega e pei ona ia faailoa ia Faleomavaega, e tele naua galuega ma tiute tauave a Savusa e faigata ai ona tuuina atu lana lagolago atoatoa e tusa ai o lenei faamoeome.

Na taua e Lolo lona faafetaia o le alii faipule i Uosigitone, ina ua mafai ona ia maua se kopi o sana tusi sa tuuina atu i le Failautusi o le Puipuiga a le malo tele, le afioga ia Chuck Hagel i le aso 3 Aperila, 2014, e tusa ai o se taumafaiga ina ia faavae se Vaega o le National Guard in American Samoa.

Saunoa Lolo e faapea, i le talanoaina ai o le mataupu e faatatau i le puipuiga o le saogalemu o le atunuu, e tele ni isi o mataupu e fesootai ma le mataupu lenei e ao ona talanoaina muamua, mo le iloiloina lelei o se auala e foia ai nei tulaga.

“I lo’u lagolagoina ai o lau fautuaga, ou te talitonu ai, o le puipuiga o le saogalemu o tatou tagata, o le vaega lea e tatau ona matua ave i ai le faamoemoe faapea ai ma le ofoina atu o ni auala e faatinoina ai lea auaunaga,” o se vaega lea o le tusi a Lolo ia Faleomavaega.

Na taua e Lolo lona faanaunauga o lo o i ai, ina ia mafai ona tuuina mai le avanoa ia Amerika Samoa, e tula’i ai lava latou e faafoe lana Vaega o le National Guard, e ala lea i le taoto atu o le malosi e faavae ai lea vaega i le taitaiga a le afioga i le alii kovana, ina ia mafai ai ona tuuina atu auala e vave tali atu ai i taimi e tula’i mai ai ni faalavelave i le atunuu, ona o le vava mamao o Hawaii ma Amerika Samoa, aemaise ai o le taimi e taunuu mai ai i le atunuu pe a tula’i mai se fa’alavelave.

Na faailoa e Lolo ia Faleomavaega e faapea, o lo o i ai le Ami Fa’aleoleo i Amerika Samoa, ae o lona puleaina mai e faatonutonu mai lea i fafo atu o Amerika Samoa, ae o mea sa tutupu i le atunuu e pei o le galulolo na mavae atu nei, na faatoa gaioi le Ami Fa’aleoleo i totonu o le 72 itula talu ona tuana’i le taimi na osofaia ai Amerika Samoa e le galulolo.

Na faaiu le tusi a Lolo ia Faleomavaega i lona talosagaina lea o ia, ina ia faaaoga lona malosi e saili ai ni aulaa e mafai ai ona faatautaia e Amerika Samoa lana Vaega o le National Guard, ina ia mafai ai ona tali atu i le atunuu i se taimi vave e tula’i mai ai se isi fa’alavelave fa’alenatura i le lumana’i.