A o le i tuuina atu e le fa’amasinoga maualuga i le vaiaso na te’a nei le fa’asalaga fa’a falepuipui o le grandmother lea na ia fasi ma fa’apologa lona grandson e 10 tausaga le matua, na fa’amatala e le fa’amasinoga e fa’apea, o gaioiga sa faia e lenei tina i le alualu toto na a’afia, e le o ni gaioiga lea e tatau ona faia i ni tagata soifua.

E 20 masina lea ua faasala ai e le faamasinoga ia Prescilla Schwalger e taofia ai o ia i le toese i Tafuna, o se tasi lea o tuutuuga o lana nofovaavaaia e 5 tausaga, ina ua ta’usala o ia i le moliaga mamafa o le fa’ao’olima i le tulaga lua.

Na fa’atoese ma loimata le ua molia e tusa ai o lana solitulafono sa faia, ma ia tautino ai na te le toe faia lenei solitulafono i lona olaga atoa, na te le toe saua fo’i i fanau a lana fanau.

Na taua e Schwalger e faapea, o masina e 5 lea na taofia ai o ia i le toese e fa’atali ai le aso e lau ai lona fa’asalaga, e le gata ua ia lagonaina ai le nofo pologa i le toese, ae ua ia aoaoina ai foi se lesona taua mo ia i le lumana’i, ma ua ia lagona fo’i le sese o lana mea sa fai.

Sa ia ta’utino i le fa’amasinoga e faapea, talu ai sa ia manatu e sasa ma fa’atonu lana tama ina ia poto ma lelei lona lumana’i, o le mafuaaga lea na ia manatu ai e faatino ona tiute faatina o le sasa ma a’oa’i.

Na fa’ai’u le fa’atoesega a Schwalger i lona fa’atoese lea i le alualutotonu na a’afia, (o le tama lea a lana tama teine), ina ia fa’amagalo sona sese e tusa ai o le mea sa ia faia ia te ia.

Na iu na tutu fa’atasi loia e lagolago se fa’asalaga fa’a nofovaavaaia mo le ua molia, peitai na finau le loia a le malo ia Tiffany Oldfield e fa’apea, e tatau lava ona i ai sina fa’asalaga fa’a falepuipui e tuuina atu mo le ua molia, ona o le matuia o manu’a sa a’afia ai le tino o le tamaititi na aafia.

Na ta’utino Oldfield i le faamasinoga, sa ia vaai tino lava i le tele o ma’ila i vaega eseese o le tino o le alualutoto na a’afua, e mafua mai i le sasa ma amioga fa’apologa sa faia i ai e le ua molia.

A o le i tuuina mai le fa’asalaga a le fa’amasinoga e tusa ai o lenei mataupu, na saunoa le ali’i fa’amasino sili ia Michael Kruse e fa’apea, o le va o Novema 2011 ma Novema 2013, o le umi lea na faia ai e le ua molia le gaioiga o le fasi ma faapologa le tama a lana tama teine sa la nonofo.

“O le taimi umi lea na faia ai e le ua molia ni amioga e le tatau ona faia i ni tagata soifua, o le sasa o le ulu o le kiu piliaki, fa’asala e fa’a tootuli i luga o le sima i fafo i le la, fa’apea ai ma isi lava ituaiga gaioiga e faaoo ai le tiga i le tino o lenei alualu toto,” o se vaega lea o le saunoaga a le ali’i fa’amasino sili.

Na taua e le faamasinoga e faapea, sa auina atu i Apia se sui o le Ofisa Nofovaavaaia mo le fa’atalatalanoaina o le tamaititi na a’afia e tusa ai o lenei mataupu, aemaise ai o le siakiina lea o tulaga o lona soifua maloloina.

I lea asiasiga a le sui o le ofisa nofovaavaavia, sa maitauina ai le tele o ma’ila o lo o tauave pea e lenei alualutoto i lona tino i aso uma o lo o totoe o lona ola.

“Ae o le itu e pito sili ona faamomoi loto i le fa’afofoga a le fa’amasinoga, e ui i le tele o mea leaga sa faia e le ua molia i lenei alualutoto, ae sa fa’ailoa e le alualu toto i le sui o le ofisa nofovaavaaia e faapea, ua ia fa’amagalo i lona grandmother e tusa ai o mea leaga sa ia faia ia te ia,” o le saunoaga lea a Kruse.

“O lau talosaga fo’i lea ua fai mai ua e pologa i totonu o le toese, e le taitai fa’atusatusa lou pologa lena ua i ai i tiga ma mafatiaga na feagai ma le alualutoto na e faapologaina, e tusa ai o ata ia ua i o matou luma,” o le saunoaga lea a Kruse ma ia faasala ai loa le tina e nofovaavaaia mo le 5 tausaga.

O isi poloaiga o le nofovaavaaia e aofia ai lona usitaia o tulafono a le malo, aua nei ona toe soliina se tulafono pe afai e magalo mai i tua, ua faasa foi ona ia toe sauaina fanau a lana fanau.