XUI PENG

O le alii faipisinisi Asia lea o lo o tuuaia e le malo i lona faaoolima lea i se isi alii Asia e faaaoga ai se naifi, ua ia talosaga i le faamasinoga maualuga ina ia faatulaga loa se aso e faia ai lana faamasinoga autu.

O le vaiaso nei na toe valaau ai le mataupu a Xui Peng i luma o le faamasinoga mo le isi ana iloiloga, ae faailoa ai loa e lana loia fautua ia Joel Shiver i le faamasinoga le mana’o o Peng e fa’atulaga se aso e faia ai lana faamasinoga iloilo i luma o tagatanuu o Amerika Samoa.

O lo o tuuaia e le malo ia Peng i le moliaga mamafa e tasi o le faaoolima i le tulaga lua, atoa ai ma le moliaga mama o le faatupu vevesi i nofoaga faitele.

O tuuaiga faasaga ia Peng na afua mai i se vevesi na tulai mai i le va o sana tagata faigaluega ma se isi alii Asia i lona faleoloa i Aua, ma faaleagaina ai le masini tupe o le faleoloa, ina ua fufusu le alii faigaluega ma se isi alii Asia.

Na logo e le aufaigaluega ia Peng i le mea ua tupu, ma tago ai loa le ua molia i le naifi ma tuli loa le alii na fufusu ma lana tama faigaluega, ma maua atu i le isi faleoloa i Atu’u, ma tauanau loa e Peng le alii lea e alu atu la te fusu.

Na taua e le malo le tata’e e Peng i le tioata o le faleoloa ma ulufale atu ai loa i totonu ma lafo upu mataga i le alii na aafia, a’o faaauau pea ona ia sasau atu le tama’i naifi o lo o uu i lona lima ma lavea ai loa le lima o le ali’i na manu’a.

O lo o tumau pea poloaiga o lo o tatala ai Peng i tua e fa’atali ai le aso lea ua faatulaga e lau ai lona fa’asalaga.

FITIAO FILEMU

O le vaiaso na te’a nei na faila ai e le malo le moliaga mamafa o le ave ta’avale a o se’i le laisene fa’asaga ia Fitiao Filemu, ina ua maua e leoleo o lo o ia faafoeina se ta’avale i luga o le auala i Fagatogo ae o lo o se’i e le fa’amasinoga lona laisene.

O le mataupu faasaga ia Filemu na tula’i mai ina ua ia kolosiina se isi ta’avale i luga o le auala i se auala e le tusa ai ma tulafono o le alatele, ma mafua ai loa ona taofia lana taavale e leoleo, ae ina ua fesiligia o ia i lona laisene, na manino ai o lo o se’i lona laisene mo le umi e 6 masina, ina ua ta’usala e le fa’amasinoga fa’aitumalo o ia i le masina o Fepuari na te’a nei i le moliaga o le ave ta’avale ‘ona.

O lo o tatala pea i tua Filemu e fa’atali ai le aso lea ua fa’atulaga e toe iloilo ai e le fa’amasinoga lana mataupu.

TOLUPO HODGES JR

Ua talia e le faamasinoga maualuga le talosaga na faaulu e le tamaitai loia ia Sharron Rancourt lea o lo o tula’i mo le alii o Tolupo Hodges Jr, mo se avanoa e toe tolopo ai le ulua’i iloiloga o lenei mataupu i le isi tolu vaiaso, ina ia mafai ai ona tuuina atu sana tali e tusa ai o ni isi o faamaumauga ua faila e le malo i luma o le fa’amasinoga.

Na talia e le afioga i le alii faamasino sili lagolago ia Lyle L. Richmond le talosaga a Rancourt, ma toe tolopo ai loa le iloiloga a Hodges Jr i le aso 29 Me, 2014.

Na taua e Rancourt e faapea, e foliga mai e ese lava faamaumauga ia ua faila e le malo i luma o le faamasinoga maualuga e faatatau i le mataupu lenei, ese faamaumauga na latou faila i luma o le faamasinoga faaitumalo i le aso na faia ai le ulua’i iloiloga o lenei mataupu.

Na finau Rancourt e faapea, o le eseese o faamaumauga ua tuuina atu e le malo e faatatau i lenei mataupu, ua feteena’i ai ma mea moni e talitonu le itu tete’e sa tupu.

Ae na taua e le loia a le malo ia Tony Graf e faapea, o faamaumauga lava ia na faila e le malo i luma o le faamasinoga faaitumalo, o faamaumauga lava fo’i na o lea ua latou failaina i luma o le faamasinoga maualuga.

O Hodges Jr o lo o tuuaia i lona umia faasolitulafono o fualaau fa’asaina, ma o lo o taofia pea o ia i le toese i Tafuna e fa’atali ai le aso lea ua faatulaga e toe fofogaina ai lana mataupu i le masina fou.