Na augani ma loimata le tina matua o Malia Tavai i le Kovana ma le faigamalo a Amerika Samoa, ina ia alolofa e fau se fale e tu’u ma tausi uma ai fanau o lo o a’afia i le gasegase o le mafaufau, ma le feofeoa’i solo i luga o le alatele, toeititi tula’i mai ai ni fa’alavelave matuia ia te i latou i le ao ma le po.

I le laeiina ai e le tina ia Tavai o le toniga lanu viole a le latou fa’alapotopotoga e fa’aigoaina o le ‘To’omaga o le Mapusaga mo le Mafaufau’, sa ia taua ai i lana saunoaga e fa’apea, ua latou fia vaai i se lanu fou e sui ai le lanu o le latou toniga e pei o le lanu pa’epa’e, e ta’u atu ai ua maua le mapusaga mo nai a latou fanau o lo o a’afia i lenei gasegase.

“Lau afioga i le kovana ma le faigamalo,” o le saunoaga lea a Tavai ona taofi lea mo sina taimi ina ua maligi ona loifofoga, “alofagia mai la matou tagi atu mo se fesoasoani mo nai a matou fanau, ua mana’omia se nofoaga mautu e pei o se fale e tausi ma tu’u fa’alelei ai latou, ina ia mautinoa ai lo latou saogalemu.”

O le saunoaga a Tavai, o se tasi lea o molimau sa mafai ona tuuina atu i le taimi o le sauniga sa faia i le Malae o le Talu ananafi, e tatala aloaia ai le fa’alauiloaina o gaioiga mo le fa’atauaina o i latou e a’afia i le gasegase o le mafaufau i lenei masina.

I le feagai ai ma lenei galuega i le tele o tausaga ua mavae, na taua ai e Tavai i lana molimau le faigata tele o lenei galuega, e le gata ia te ia ae o isi fo’i matua o lo o laina tutusa a latou fanau i le gasegase lava lea e tasi.

“Matou te lagonaina le faigata o lenei savaliga ma le avega o lo o matou amoina pea, ae matou te onosa’i lava ona o le vaai alofa i nai fanau.”

“Matou te tau saili ni tupe e tausi ma fafaga ai latou, ae afai fo’i e maua se avanoa matou te aveina ai i latou i se nofoaga e fa’a tafafao ai, matou te taumafai lava ina ia maua sina meaai mo i latou, po o isi fo’i mea e fa’afiafia ai o latou mafaufau.”

“Ua tele tausaga o matou laeiina lenei toniga lanu viole, e le o se lanu lelei, ae ua matou manatu e laei pea lenei toniga ina ia ta’u atu ai lagona o le mafatia ma le pagatia, ae matou te finau pea ina ia lata mai se aso e suia ai lenei toniga i le lanu pa’epa’e, e ala lea ina ua mafai ona maua se nofoaga mautu e tausi ma tuu lelei ai nai fanau.”

E le gata na fa’aleoina e Tavai le talosaga mo se fale e tausi ma tu’u i ai fanau nei, ae o se nofoaga faapitoa fo’i e taaalo ma eva ai latou e pei o isi fanau o lo o atoatoa le malosi o le mafaufau.

Na taua e le afioga i le ali’i Fa’atonusili o le Matagaluega o Auaunaga ma Tautua Lautele ia Taeaoafua Dr. Meki Solomona i lana saunoaga e fa’apea, ua toeititi lava mae’a le fale o lo o fausia e le malo i tua o le falema’i o le LBJ i Fagaalu, ona o le manatu ia maua se nofoaga faapitoa e tausi ma nonofo ai i latou nei.

“E le o galo i le faigamalo nai fanau o lo o a’afia i lenei gasegase Malia, o le manatu o le faigamalo, ia tutusa auala e tautua ai tagata uma e aofia ai ma i latou o lo o a’afia i lenei gasegase,” o le isi lea saunoaga a Taeaoafua.

Saunoa le ali’i fa’atonu e fa’apea, o le isi galuega o lo o fa’atinoina e lana matagaluega i le ao ma le po, afai latou te mauaina i latou o lo o a’afia i lenei gasegase i luga o le alatele o savavali solo ai, latou te ave i le fale ma fafaga, fa’a lavalava ma fa’a taeele fo’i, ma ave i nofoaga o lo o tausi ai i latou i le taimi nei, ae mafua ona toe fo’i i latou i luga o le alatele, o lo latou lava lea filifiliga, e mafua mai ona o a’afiaga o le gasegase o lo o a’afia ai o latou mafaufau.