Ua amata nei ona fa’agasolo pepa mo le fa’amautuina o si’itaga i totogi o faiaoga a le malo, e pei ona fa’amaonia mai i se vaega o le ripoti a le Matagaluega o Aoga, mo le fa’alauiloaina o galuega fa’atino i le Kuata Lua o le Tausaga Tupe lenei 2014.

I se vaega o lea ripoti, o lo o taua ai le amata fa’agasolo o gaioiga mo le fa’amautuina o siitaga mo totogi o faiaoga, fuafua lea i fa’ailoga ua mafai ona latou ausia.

Mo faiaoga uma ua maua fa’ailoga o le ‘Bachelor of Arts degree’ o le a latou maua le totogi e $23,000 i le tausaga, ma i latou ua maua fa’ailoga o le ‘Master of Arts degree’ o le a latou maua le totogi e $27,000 i le tausaga, e pei ona taua i le ripoti.

O lo o taua fo’i i le ripoti e fa’apea, o le fuafuaga e pei ona fa’atinoina nei e le Matagaluega o Aoga, ina ia mafai ai ona fa’ataunu’u le manulauti ua mae’a ona fa’ataoto e le Ofisa o le ali’i Kovana, ina ia talafeagai totogi e maua e faiaoga a le malo ma fa’ailoga ua latou ausia e tusa ai o le latou tautua faa faiaoga.

E silia i le to’a 240 faiaoga ua mae’a ona tu’uina atu pepa mo le fa’amautuina o si’itaga o latou totogi i le Matagaluega o Tagata Faigaluega a le malo.

Ua le gata i lea, ua amata fo’i ona fa’agasolo isi pepa mo le fa’amautuina o totogi o le silia i le to’a 170 faiaoga o lea fa’atoa maua a latou fa’ailoga e pei o ‘Bachelors ma Masters’, atoa ai ma le tu’uina atu o le alagatupe e fa’atupe ai siitaga o a latou totogi.

E ese mai ai i le siitia o totogi mo faiaoga, ua mae’a fo’i ona faia siitaga i totogi o isi vaega o le Matagaluega o Aoga sa i lalo o le ta’i $10,000 i le tausaga o latou totogi, e pei o ave pasi; tagata faigaluega i le School Lunch, atoa ai ma isi o lo o galulue i totonu o le Ofisa autu.

O le aso fa’apitoa mo faiaoga i le tausaga na te’a nei 2013, na fa’alauiloa aloaia ai e le afioga i le ali’i Kovana ia Lolo Matalasi Moliga sona fa’anaumauga o lo o i ai, ina ia sii totogi o tagata faigaluega uma o le malo e i lalo o le $10,000 i le tausaga.