[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea te’i ai Kati ina ua sulugia atu o ia e le loli a le Ami ao tau sauni lana osofaiga e aga’i i totonu o le falema’i lea e togafiti ai Mena.]

Na popole Kati ina ua sulugia o ia i moli o le loli a le Ami lea ua aga’i atu, ina ne’i maua ai o ia, peita’i na faigata e ali’i fitafita sa i luga o le loli ona la iloa atu le itu lea o lo o lafi mai ai Kati, ma faigata ai ona mateia le tupua lea ua taumafai le tama e fa’atula’i. Na toe sa’o le manava a Kati ina ua pasi ese atu le loli lea na ui ane i ona tua, ona toe faatulaga foi lea o lana osofaiga e aga’i atu i totonu o le falema’i. Na pei o le emo o le mata faiga o teuga fou a le tama ina ia faigofie ai ona maua sona avanoa e ulufale ai i totonu o le falema’i, ina ia faafoliga ai o ia o se tagata e galue i kamupani Inisiua, o lo o taumafai e faatulaga talanoaga ma Mena ina ia mafai ona totogi uma e le Inisiua lana pili i totonu o le falema’i, pe afai e i ai se isi o lona aiga e mafai ona fesoota’i i ai le ofisa mo le faamautuina o gaioiga uma e manaomia.

Na te’i le teine tali telefoni o lo o tiute i luma o le laulau ina ua ulufale atu se tagata ma ona laei mamalu, ma ofo alofa atu ia te ia ma fa’aali atu fo’i pepa e fa’amaonia ai o ia ma le mafuaaga o lona ulufale atu. Na malamalama le tama’ita’i i tulaga uma o lo o talanoa atu ai le tagata, ona ia fai lea i ai e onosa’i atu i le nofoa o lo o i luma ae sei fesootai i le ali’i foma’i o lo o vaaia Mena mo se avanoa mo ia. E lei umi ae toe savali mai le tama’ita’i tali telefoni ma fa’ailoa i le ali’i lea, e onosa’i o lea ua sau le foma’i la te talanoa. E lei umi ae vaaia e Kati se ali’i foma’i tino laititi ua savali mai ma ta’u atu lona igoa ia te ia, ona ia fa’ailoa fo’i lea i ai o lona igoa, o lona ID faapea ai ma le pepa e faamaonia ai lana galuega.

I le tuana’i ai o se la talanoaga e 5 minute le umi, na malie ai loa le foma’i o le a alu e fa’ailoa ia Mena o lo o taoto i luga o lona moega le autu o lana savali po o le a sana tali, e lei umi ae toe savali mai le foma’i ma fa’ailoa ia Kati, ua oo i lona avanoa la te talanoa ai ma le tama’ita’i ma’i, na fa’afetai Kati ma savali loa i totonu o le potu, ma ia vaaia ai Mena o lo o taoto mai i luga o lona moega, ma e lei faigata ia Mena ona ia iloa o Kati lea ua alu atu, aua ua umi le la mafutaga ma ua ia iloaina lelei fo’i ona foliga aemaise ai o ana teuga nei sa masani ona ia vaaia, peitai e lei manao Kati e vave faailoa ia Mena ni uiga e fa’ailoa atu ai lona alofa ma lona misia o ia, ae na amata loa ona ia talatalanoa i le autu o lona oo atu aemaise ai o lana galuega i le Ofisa Inisiua o lo o galue ai, i le taumafai lea e fesoasoani i tagata mama’i pei o oe i auala e mafai ai ona matou totogiina lau pili i le falema’i a le Militeli, ona o se tasi lenei o nofoaga e pito sili ona taugata togafitiga e faia ai. Ao faia le talanoaga a Kati ma Mena, sa iloa lelei e Kati o lo ola masini pu’eata i totonu o le potu.