Vaega: 4

Fa’afeiloa’i atu i le atunu’u i lou alafa’i mai i fanuga lelei i lenei taeao fou, i le alofa ma le agalelei o lo tatou Matai oi le lagi, e ao ai ona o tatou fa’apea ifo, “Le Ali’i e, e silisili lava Oe i mea uma matou te manatu i ai, foa’i mai lou filemu mo i matou i lenei aso, a’o le vi’iga matou te fa’afo’i atu i a te Oe Tama e o’o i le fa’avavau, Amene.”

Alo maia, o le a toe fa’aauau atu la tatou tala fa’asolo, “Lupe o le filifili, ae ia manuia le alo faiva o le atunu’u i feau ma galuega o le a feagai ai i lenei aso. Tatou te fa’alogo pea i le tala e fa’apea, o le ui’i, e leitioa fo’i ona fa’apea ona uiga, leaga o le ui’i i le fanau. Ae peita’i, e le tutusa uma ui’i, o le isi ui’i, na te faia mea e lelei ai aiga, na te fa’atupu le filemu i totonu o aiga. A’o isi ui’i, ua fai ma sasa i totonu o aiga, atonu o le mafua’aga lea ua fa’apea ai uiga o Samuelu.

Ua le tautala le toeaina o Paulo i lea taimi, ae ua na o le tilotilo ane i si ona to’alua e pele i lona loto ma lona mafaufau, ma fa’apea ona mafaufauga, o le lo’omatua lenei se, ua pei o uiga o se fe’e, o le isi taimi ua va’ai atu ua pa’epa’e aulelei mai, a’o isi taimi ua uliuli fa’asolo atoa, ia soia ia, o aso lava nei o le olaga ua o tatou ola ai.

“Paulo, va’ai oe le tama, e tutusa lava ta’ua i le tulaga lea o lo’o i ai Samuelu, ua ou iloa fo’i, o lo’o lagona e Petelo le fa’anoanoa i uiga o Samuelu. Ae va’ai oe, ta taumafai ia maua pea e le ta fanau le nonofo fealofani, o le a le finagalo o le Atua i a i ta’ua, ae ia maua le nonofo fealofani o le ta fanau. O Petelo e le o se Agelu, e i ai fo’i ona fa’alogona tiga, ma e i ai lava le taimi ta te va’ai ai i se mea mata’utia e tupu mai, pe afai o le a ta le talanoa ma tu’u atu se upu lelei i le ta fanau.”

Ua lagona e le toeaina o Paulo, e sa’o lelei le manatu ua folasia e le lo’omatua i lea taimi. Ua fa’asolosolo ona mafaufauga i le tele o le ‘ese’esega o lona atali’i matua ma lona atali’i la’ititi, ae ua ta mau pea i le loto o Paulo, e sau se taimi a’o se aso, e suiga malie ai mea uma e pei ona feagai nei ma i la’ua.

O le isi itu, atonu e va’ai atu Samuelu i lona uso matua o Petelo, o se tama e le gaoia, o se tama e le fa’amisa, e le fia malosi, e filemu lava uiga o Petelo. Atonu la, e fa’alogo pea i ai taliga o Samuelu e tau tatala ai tagata o le nu’u, i le tele o le ‘ese’esega o ia ma lona uso matua o Petelo, ona avea lea ma ala ua tiga ai lona loto ma alu ai loa ua fai uiga leaga ia, lea e fai e ia, ae pologa ma tiga ai ona matua o Paulo ma Eseta.

Ae se i o tatou va’ava’ai pea po’o fea o le a taunu’u i ai la tatou tala. E moni lava ua maua e Samuelu le poto ma le atamai, ae ua sili atu ona le manuia ona uiga fa’aali. O lea e le gata ina tiga ma pologa ai ona matua, ae ua avea ma fa’asoesa i le loto ma le mafaufau o lona uso matua o Petelo. Na i’u lava ina lafo e Petelo upu e fa’apea, “Samuelu, a ou tagolima i a te oe, ta’ilo lava i le mea e te o’o i ai, ua sau lava le le lava onosa’i i au amio, ua e fa’alogo mai i a te a’u, e tasi lava la’u fasiga o oe, ona tu’u loa lea o oe i le ono futu.”

Ina ua fa’alogologo i ai Paulo ma Eseta i upu na lafo e Petelo i lona uso o Samuelu, na lagona ai le popole o le toeaina ma le lo’omatua. Ua o la iloa lelei lava, o Petelo e le tautala, e fai lava ana feau, aua o lea ua tu’u le a’oga a Paulo, ae nofo e tausi ona matua.

O lea la e feagai nei Petelo ma mea fafaga, o le fa’ato’aga, o fa’alavelave uma o le aiga, o le lima taumatau lea a Paulo ma Eseta, ona ua matutua lava. Ae ua avea Samuelu ma fa’atiga loto i a Petelo, ona o ona uiga ia e maua ai nei. Na i’u lava ina fai le folafolaga a Petelo i a Samuelu, a’o fa’alogologo i ai o la matua.

E faia pea…