O le tama’ita’i mai Vailoatai lea na ta’usala e le fa’amasinoga i le mataupu lea na ia taumafai e osofa’i se leoleo i se agaese, atoa ai ma lona folafola o lona tipiina o le ulu o le leoleo (tulou), ua fa’atonu e le fa’amasinoga maualuga e alu e fa’atoese i le leoleo na a’afia.

O Autesamoa Hari na ulua’i tu’uaia e le malo i le moliaga o le fa’ao’olima i le tulaga lua, ae i lalo o se maliliega na latou sainia ma le malo ma talia fo’i e le fa’amasinoga maualuga, sa ia tali ioe ai i le moliaga mama o le fa’ao’olima i le tulaga tolu lea na toe suia e le malo.

O le masina o Me na te’a nei na talia ai e le fa’amasinoga maualuga le tali ioe a Hari, ma faia ai loa le poloaiga ina ia tatala o ia i tua mo le lua vaiaso e fa’atali ai le lauina o lona fa’asalaga i le aso Faraile na te’a nei.

Na taua e Hari i lana fa’atoesega e fa’apea, ua ia lagona le sese o lana gaioiga sa faia, ma ua ia aoaoina fo’i se lesona taua mo lona olaga i le lumana’i, ma o aso uma ia na taofia ai o ia i le toese, ua ia iloa o ni aso ma’imau uma nei mo lona olaga.

Na fesili le ali’i fa’amasino sili ia Michael Kruse ia Hari po o le a le umi na loka ai o ia i le falepuipui, na tali le ua molia, “e 7 masina”.

Na ta’utino le ua molia, e le toe fia o o i totonu o le toese i lona olaga atoa, ma ia talosagaina ai loa le fa’amasinoga ina ia fa’aauau pea le tatala o ia i tua sei mafuta ma si ona tina, ae aua nei toe tuuina atu o ia i totonu o le falepuipui.

O le moliaga o le fa’ao’olima i le tulaga tolu lea na ta’usala ai Hari, e mafai ona fa’asala ai o ia i le toese i Tafuna mo le umi e tausaga atoa, pe fa’asala fo’i i se salatupe e le silia i le $1,000, po o le fa’asala fo’i i fa’asalaga uma ia e lua.

Na finau le loia a le ua molia ina ia nofovaavaaia Hari i lalo o ni poloaiga malolosi a le fa’amasinoga, e fesoasoani ai i lona olaga talavou.

O ni isi o poloaiga na fautua le ali’i loia o Douglas Fiaui i le fa’amasinoga e tatau ona usita’i i ai Hari, o le fa’asa lea ona ia toe soli se tulafono, fa’asa fo’i ona ia toe faia ni gaioiga tau fa’amatau e fa’afefe pe fa’amata’u ai ni isi o le atunu’u lautele.

Na vave ona fa’aui lavea le ali’i fa’amasino sili ia Kruse fa’apea atu ia Fiaui, “e le tatau fo’i ona fa’afefe pe fa’amata’u e le ua molia ni leoleo, e pei o lana gaioiga sa faia i le leoleo o Off. B. Saifoloi, o le alu o le leoleo e fa’afilemu le vevesi ae alu i ai ma le agaese”.

“Hari, o tuutuuga uma nei a le fa’amasinoga e ao ona e usita’i i ai, afai e te soli se tu’utu’uga, o le a toe taofia oe i le falepuipui mo le tausaga atoa”, o le fautuaga lea a Kruse ia Hari i le taimi na lau ai lona fa’asalaga, ina ua talia e le fa’amasinoga fa’afinauga a itu e lua ina ia nofovaavaaia.

E tasi le tausaga ma le salatupe e $1,000 na manatu le fa’amasinoga e fa’asala ai Hari, peita’i o le a fa’amalumalu lona tuliina o le fa’asalaga fa’a falepuipui atoa ai ma le totogiina o le salatupe, ae o le a nofovaavaaia o ia mo le tausaga atoa i lalo o poloaiga a le fa’amasinoga.

O ni isi o ia poloaiga e aofia ai lona alu e fa’atoese i le leoleo o Off. B. Saifoloi, aua nei ona toe soliina se tulafono, aua fo’i ne’i ona toe umia ni a’upega pe taumafai fo’i e fa’afefe ni isi o le atunu’u e aofia ai ma leoleo.

Ua fautuaina o ia ina ia auai i ni aoaoga e fesoasoani ai i le tulaga o le ita, ma ia alu e vaai le ofisa nofovaavaaia i masina taitasi.

Ua manatu fo’i le fa’amasinoga, ua lava masina e 7 lea na taofia ai Hari i le toese ao faatalitali le lauina o lona fa’asalaga, e avea ma ana fa’asalaga i lenei mataupu.