Ua fa’aalia e ni isi o tagata faigaluega a le kamupani tu’uapa o le StarKist Samoa lo latou popole i lo latou saogalemu, ona o ripoti e fa’atatau i le ono a’afia lea o i latou i siama o le fa’ama’i leaga o le ‘leptospirosis’, lea e mafua mai i feau vai a meaola e aofia ai pua’a ma isumu o lo o tafe aga’i atu i le sami.

Na taua e Fareti Malota o se ali’i ua silia i le 15 tausaga o galue i le kamupani e fa’apea, afai o se tulaga e ono a’afia ai le soifua maloloina ma le ola saogalemu o latou uma o lo o galulue i le kamupani, ua tatau ona fai se gaioiga a le malo ina ia mafai ai ona puipuia i latou uma.

“O ripoti i ni su’esu’ega sa faia e se foma’i mai fafo na ou fa’alogo ai i le ripoti, lea ua mafua ai ona ou manatu e fa’aali so’u manatu e fa’atatau i lenei mataupu, ona o se mataupu e taua tele mo le saogalemu o tagata faigaluega uma i le kamupani e aofia ai a’u”, o le saunoaga lea a Malota i le Samoa News.

O lea manatu na lagolagoina e le tina o Lilly Onosa’i ma ni isi o tina se to’alua e galulue fo’i i le kamupani e le i finagalo e fa’ailoa o la suafa.

Na taua e Onosa’i e fa’apea, e tatau ona ave le fa’amamafa a le Soifua Maloloina i le toe suesueina o lenei mataupu, ina ia mautinoa e mafai ona puipuia tagata faigaluega a le kamupani fa’apea ai ma isi o le atunuu o lo o taua i le ripoti e ono a’afia fo’i, ina ia aua ai nei pisia le atunuu aemaise lava fanau laiti i lenei siama leaga.

Na taua e le ali’i foma’i ia Dr. Saipale Fuimaono o le Soifua Maloloina e fa’apea, o ni nai vaiaso e lei mamao atu na fa’alauiloa ai e se tama’ita’i foma’i su’esu’e sana ripoti i le atunu’u, e fa’atatau i tulaga o gasegase matautia e pei o le ‘leptospirosis’.

O le ‘lepto’ e pei ona silafia ai e le to’atele o tagata, o se fa’ama’i e mafua mai i feauvai o meaola e pei o isumu ma puaa, lea e mafai ona maua i luga o le palapala, ae a oo i le taimi e timuga ai, e mafai ona tafea atu i le sami ma a’afia ai fo’i tagata latou te fa’aaogaina le sami e pei o le taeele ai.

I se vaega la o lea ripoti sa taua ai e fa’apea, o le siama o lo o nofo i totonu o totoga o meaola nei, e mafai ona latou aumaia i fafo e ala i a latou feau vai (tulou), ma o iina lea e ono a’afia ai tagata soifua.

Saunoa Dr. Fuimaono e fa’apea, e tusa ai o le ripoti sa fa’alauiloa mai e le tama’ita’i foma’i o Dr. Lau Colleen, e le gata e a’afia ai tagata latou te fa’aaogaina le sami e aofia ai fo’i ma tagata o lo o galulue i kamupani i’a ona o le si’osi’omaga o lo o latou galulue ai, ae mafai fo’i ona a’afia ai ma i latou o lo o galulue i fa’atoaga.

O le vaaia o le tele o ituaiga fa’ama’i eseese i le atunu’u i le taimi nei, na taua ai e le susuga a Malota le tatau lea i le malo ona mataalia i ituaiga gasegase eseese nei, ina ia mautinoa e le gata e malupuipuia mai ai tagata faigaluega a le kamupani, aemaise fo’i o nai fanau laiti ma tagatanuu uma o le atunu’u.