I se fa’aaliga sa tu’uina atu e le afioga i le Komesina o Leoleo ia Willaim E. Haleck i Leoleo uma o le Matagaluega i le aso 17 Iuni, 2014, ua ia fa’atonuina ai le tatau loa ona aloaia i le taimi lava na tauaao ai e Leoleo lea fa’aaliga, gaioiga fa’aleoleo e faia mo so o se tasi e taofia ma tu’uaia i solitulafono eseese.

O ni isi o ia gaioiga e aofia ai le lolomi o ata o alofi lima (finger print) atoa ai ma le pu’e o le ata o le tagata ua taofia ma molia.

Na taua e Haleck e fa’apea, o le mataupu lenei na tula’i ina ua ia maitauina e le o faia e Leoleo gaioiga e tatau ona faia i tagata e taofia ma tuuaia i solitulafono eseese, e pei o le lolomi o ata o alofi lima faapea ai ma le pu’eina o lona ata.

“Ou te le malamalama i le mafua’aga ua le mulimulita’i ai leoleo i ta’iala nei i so o se taimi latou te taofia ai se tasi ona o tu’uaiga i lona soli o le tulafono, ae o gaioiga masani lava nei e tatau ona fa’atinoina”, o se vaega lea o le tusi a le alii komesina.

“O gaioiga nei o lo o faia e vaega fa’amalosi tulafono i so o se vaega o le Iunaite Setete o Amerika, ma ou te talitonu e tatau fo’i ona faia e le tatou matagaluega”, o le isi lea saunoaga a le alii komesina.

Ona o ia mafua’aga, ua poloaina ai loa e le alii komesina le amata loa ona aloaia gaioiga fa’aleoleo e pei ona ia fa’atonuina, mo so o se tasi e taofia ma tuuaia i solitulafono mamafa faapea ai ma solitulafono mamafa.

O vaega e fa (4) ua fa’amamafa e le alii kovana e tatau ona faia e leoleo; (1) Ripoti o le Solitulafono; (2) Fa’amaumauga mo le tagata ua taofia; (3) Lolomi ata o alofi lima; (4) Pu’e le ata o le tagata ua molia.

Ua fa’atonuina fo’i Ta’ita’i o Sifi ta’ita’i ina ia latou mautinoa o lo o fa’atino e leoleo gaioiga e fa (4) e pei ona ia fa’atonuina.

Ina ia faigofie ai le fa’atinoina o lenei fuafuaga, ua manatu ai le alii kovana o le a tuuina atu i le nofoaga o le toese i Tafuna le isi masini e lolomi ai ata o alofi lima ma pu’e ai ata o le tagata ua molia, e fa’atali ai le taimi e mafai ai ona tofu uma Lala o le Ofisa o Leoleo ma masini fa’apea e fa’atino ai lea manaoga taua o le galuega.

So o se tasi fo’i e taofia e leoleo ma le fa’amoemoe e fa’aauau pea ona taofia i le toese po o le toe tatala fo’i i tua, e tatau i le leoleo sa ia taofia lea tagata ona mautinoa ua pu’e le ata o le tagata lea ma lolomi ata o ona alofi lima.

“O le leoleo na te taofia fa’apagota se tagata, o ia fo’i lena e tatau ona gafa ma le pu’eina o le ata atoa ai ma le lolomiina o ata o alofi lima o lea tagata, fa’atasi ai ma le fesoasoani ma Leoleo o le toese ua i ai le tomai i le fa’atinoina o lea galuega, ae a i ai se leoleo e mana’omia le toe fa’afou o lona mafaufau i auala e fa’atino ai le lolomiina o ata o alofi lima, feso’ota’i i le Ta’ita’i mo le fa’atulagaina o le taimi e fa’atinoina ai e Sgt. Jackie Lagai mai le Vaega o Fa’amaumauga o ni aoaoga fa’apitoa”, o se vaega lea o le saunoaga a le alii komesina.

Sa fautuaina fo’i e le komesina leoleo uma ina ia mautinoa e tofu i latou ma kopi o ripoti uma e fai, ae o isi kopi e tuuina atu i le Ta’ita’i o le Uati, ina ia mafai ai ona maopoopo fa’amaumauga pe a mana’omia.

O le ata atoa e pei ona taua e Haleck i lenei poloaiga, ia mafai ai ona maua e le Matagaluega o Leoleo faila mo i latou sa molia, ina ia mafai ai ona maua fa’amaumauga i le taimi e sailia ai i latou e fa’atinoina isi solitulafono i le atunuu.