E o o lava fo’i i fanau aoga o lo o aooga i Hawaii ma isi setete o Amerika, o lea fo’i ua tuu atu e le malo le avanoa e galulue ai i le polokalame lea e galulue ai fanau aoga i matagaluega a le malo ma kamupani tua i totonu o le isi 8 vaiaso.

O ananafi na tatala aloaia ai le polokalame a le malo mo le tuuaga o aoga a fanau (Summer Youth Employment Program), lea e maua ai e fanau aoga e silia i le 500 le avanoa e galulue ai i totonu o matagaluega ma ofisa tumaoti a le malo, atoa ai ma avanoa faigaluega i totonu o kamupani tumaoti.

E silia i le to’a 10 tama ma teine aoga o lo o aooga i fafo e aofia ai i latou o lo o aooga i lalo o avanoa sikolasipi a le malo, na mafai ona fa’alauiloa i le taeao ananafi ua maua le avanoa e agava’a ai i totonu o lenei polokalame.

Na taua e le Fa’atonusili o le Matagaluega o Tagata Faigaluega a le malo ia Sonny Thompson e fa’apea, o le agaga o le faigamalo ua mafua ai ona aapa i fanau aoga o lo o aooga i fafo ina ia auai i le polokalame, ia maua ai fo’i lo latou avanoa e fa’amasani ai i galuega a le malo ma kamupani tua, ina ia o o atu i le taimi e saili galuega ai ae ua maua lo latou agava’a e fa’atino ai galuega.

E silia i le 800 fanau aoga na fa’au’u mai i aoga maualuluga i le atunu’u i le masina nei e le o i ai ni galuega o galulue ai.

“O le a se gaioiga a le malo o le a fai i fanau aoga nei ua fa’au’u mai i aoga maualuluga, pe afai o i latou nei o le lumana’i o le atunu’u”, o le saunoaga lea a Thompson.

“O le tiute o tatou uma e aofia ai le malo, kamupani ma matua, o le saili o avanoa lelei e maua ai lumana’i mo fanau, aua o i latou nei e fa’alagolago i ai le lumana’i o le atunu’u ma aiga”, o le isi lea saunoaga a Thompson.

Mo fanau aoga o lo o aooga i fafo ua maua le avanoa e malolo mai ai i le atunu’u, o se avanoa lelei lea mo i latou e maua ai le avanoa e auai i le polokalame lenei a le malo, ina ia maua ai lo latou tomai ma le agava’a i le fa’atinoina o galuega, ina ia faa faigofie ai ona saili ni a latou galuega pe afai ae uma a latou aoga.

Na taua e ni isi o fanau aoga o lo o aooga i fafo ua maua le avanoa e galulue ai i le polokalame a le malo, le fiafia ina ua maua le avanoa e auai i le polokalame a le malo mo fanau aoga.

Na taua e ni isi o i latou e fa’apea, o le avanoa ua latou maua o le a fesoasoani tele lea i le tau sailiina o galuega e galulue ai, mo le sailiina o tupe e totogi ai a latou pili aoga a o aooga ai i fafo.

Na fa’afetaia e matua le polokalame ua fa’atula’i e le faigamalo, ua mafai ai ona maua e avanoa le avanoa e fa’amasani ai i auala e fa’atino ai galuega.

“I lo’u talitonuga, e le o le tupe e taua i le polokalame lenei, ae o le avanoa ua maua e fanau e a’oa’o ma fa’amasani ai i tulaga o galuega i totonu o le malo ma kamupani tua”, o le saunoaga lea a le susuga a Levi Unasa, o se tasi o matua o lo o auai lona alo i lenei polokalame.

Sa fautuaina e le susuga Thompson matua ina ia tu’u atu lo latou fa’atuatuaga i le aufaigaluega mo le vaavaaia o fanau, ae aua nei toe tula’i mai le fa’afitauli sa maitauina i le tausaga ua mavae, ina ua tau mulimuli lava ni isi o matua i fale faigaluega o lo o galulue ai a latou fanau.

Saunoa Thompson e fa’apea, o le isi lea vaega o le tupu tupu a’e o fanau, o le tuu o le avanoa ia i latou e auai i fa’agaioiga ma polokalame fa’apenei.