O le vaiaso nei na taunu’u ai i le Fono Faitulafono se tulafono taufaaofi mai le afioga i le alii kovana ia Lolo Matalasi Moliga, e talosagaina ai le Fono Faitulafono ina ia faia se suiga i le tulafono o lo o faataga ai tagata mai fafo e nonofo i Amerika Samoa, ina ia mafai ai ona fa’aleleia pepa nofomau o le faitau afe o tagata mai fafo sa nonofo fa’asolitulafono i totonu o le teritori.

O lo o taua i se vaega o le tusi a Lolo i ta’ita’i o le Fono Faitulafono e fa’apea, e 2,474 le aofa’i o tagata mai fafo sa mafai ona lesitalaina i le polokalame lea na faatautaia e le malo (Amnesty Program), faaopoopo ai ma le to’a 1,637 o i latou o lo o lelei pea a latou pepa nofomau ae o lo o faatali le taimi e valaau ai a latou fono i luma o le Komiti Fa’afoe a le Ofisa o Femalagaaiga.

Na taua e Lolo e fa’apea, e tele naua masina na galulue ai le malo mo le tau tuu faatasia o le polokalame lenei, ina ia mafai ai ona faaleleia pepa nofomau o tagata mai fafo ua tele tausaga o aumau i totonu o le teritori faasolitulafono.

Ma o ni isi o mafuaaga ua ala ai ona taua lenei mataupu, ona o taumafaiga lava sa faia ina ia toe iloilo le tulafono na faatulafono mai i se vaitaimi o le 1980.

Talu ai la o lenei manaoga taua, ua talosagaina ai e Lolo le Fono Faitulafono mo se tulafono taufaaofi e toe faia ai suiga i le Vaega 41.0301 ina ia mafai ai ona faaopoopo le aofa’i o tagata e mafai ona tuu atu i ai le avanoa e nonofo mau ai i le teritori.

O le talosaga e pei ona taua e le alii kovana, e na o le fa’atasi lava ona faia le suiga lenei, ina ia faigofie ai i le Ofisa o Femalagaaiga ona faaleleia pepa nofomau a i latou nei, ma mafai ai ona alala i latou i le teritori e tusa ai ma ala o tulafono tau femalagaaiga.

“O i latou e pei ona matou talanoa atu ai, o i latou o lo o tautua i le atunuu i soo se vaega, ae ona o tulaga faaletonu ua tula’i mai i o latou aiga, ua mafua ai ona feagai i latou ma nei faaletonu”, o se vaega lea o le tusi a le alii ko vana.

Saunoa foi le alii kovana e faapea, o lo o galo ona taua i latou nei o ni totino o le atunuu, ina ia mafai ai ona auai i latou i so o se fuafuaga faataoto a le malo, e aofia ai ma le faitauina o i latou pe a o o i le taimi e faatulaga ai fesoasoani mai le feterale.

O le agaga o le faigamalo, e na o le faatasi lava ona tupu lenei suiga, ma ua faamoemoe o le tausaga faaletupe fou 2015 ua faamoemoe e aloaia ai lenei suiga, pe afai ae talia e le Fono Faitulafono.

Ina ua faatoa maea le faatinoina o le polokalame lenei i le masina o Aperila na te’a nei, e silia i le to’a 2,000 na taua ua mae’a ona lesitala i le polokalame.

Mai le aofaiga e to’a 2,466 o tagata ‘overstayer’ ua mae’a ona lesitalaina o latou suafa, e pito to’atele ai lava tagata mai Samoa i le aofaiga e to’a 1,643, soso’o ai loa ma tagata mai Filipaina i le aofa’i e to’a 335, pito loa i ai ma tagata mai Tonga i le aofa’i e to’a 315.

E tusa ai ma faamaumauga sa tuuina mai e le Ofisa o le Loia Sili e tusa ai o le fa’aiuga o lenei polokalame, o lo o taua ai le tulaga lea, o le to’a 2,065 o i latou nei o tagata matutua, ae o le isi to’a 397 o tamaiti laiti e o o atu i le ta’i 17 tausaga le matutua, ma le isi to’afa e le i mafai ona fa’ailoa faamaumauga e fa’atatau i a latou aso fanau.

O lo o taua fo’i i faamaumauga nei e faapea, o i latou sa lesitalaina i le polokalame e o mai i atunuu Asia; Amerika; Siamani faapea ai ma atumotu o le Pasefika.

O isi atumotu o le Pasefika sa lesitalaina o latou tagata e aofia ai Fiti i le aofaiga e 58; Tuvalu ma Vanuatu e ta’i 4; Niu Sila e 6; Solomona e to’a 3 ma Ausetalia e to’a 2.

E lima (5) vaega sa vaevaeina i ai le polokalame mo le lesitalaina o suafa o i latou nei, e pei ona taua i le ripoti ua taulimaina e le Samoa News.

Mai vaega lima (5) e pei ona vaevaeina i ai le lesitalaina o le polokalame, e pito to’atele atu ai lava tagata e leai ni pepa nofomau mai le Falelima i Sisifo, i le aofaiga e 1,377; soso’o ai Itumalo ogatotonu (Central District) i le aofa’i e 795, pito i ai le Falelima i Sasa’e i le aofa’i e 201; o luga o va’a e to’a 56 na lesitala mai ai; ma le itumalo o Manu’a e to’a 37 na maua mai ai.

O afioaga pito to’atele tagata na lesitala mai ai e aofia ai Nuuuli i le aofa’i e 311; soso’o ai Tafuna e to’a 205; Pago Pago e 196; Pavaiai e 155; Faleniu e 153; Iliili e 130, ma Leone e 119.