O le taeao ananafi na tula’i i luma o le fa’amasinoga fa’aitumalo se ali’i mai Nu’uuli, ona o tu’uaiga i lona fa’ao’olima lea i se ali’i leoleo e ala i lona tu’i o le mata o le leoleo, a o aga’i atu leoleo e pu’e fa’apagota o ia ona o se mataupu na tula’i mai i Pago Pago o lo o tu’uaia ai o ia i lona fa’ao’olima lea i se tama matua.

I fa’amaumauga a le fa’amasinoga o lo o taua ai e fa’apea, o le fa’alavelave lea na tula’i mai i Pago Pago i le aso 18 Novema 2013, lea na fa’aoolima ai Arona Amituana’i i se tama matua e ala i lona fa’aaogaina o se naifi, ina ua maua atu e le tama matua Amituana’i o lo o lafi i totonu o le isi potu o lona fale, na mafua ai loa ona saini e le fa’amasinoga sana poloaiga e pu’e fa’apagota mai ai le ua molia.

O le tele o taimi e taumafai ai leoleo e saili le ua molia ina ia pu’e fa’apagota, e sola ese ai o ia pe a ia vaaia leoleo.

Ae i le aso 27 Iuni 2014 pe tusa o le itula e 7:45 i le afiafi, na maua ai e se ali’i leoleo se telefoni mai se tasi o molimau, e fa’ailoa mai ai Amituana’i o lo o tu tu ma se fagupia i luma o le fale a lona uncle i Nu’uli, ma aga’i atu ai loa leoleo e to’alua e siaki pe moni lea ripoti.

Na taunu’u leoleo e to’alua na aga’i atu ma la lalafi loa i totonu o le fale o le molimau, e le i umi pe tusa ma le 30 minute ua tuana’i, ae vaaia loa e leoleo le aga’i sa’o atu o Amituana’i i fale o le molimau lea o lo o la lalafi ai, ma tu tu ai i luma o le faitoto’a o le fale, e le i toe fa’atali leoleo ae na la tatala lemu le faitoto’a ma la tulioso atu loa ma pu’e fa’apagota Amituana’i.

A o taumafai ali’i leoleo e taofi i lalo Amituana’i, na mafai e le ua molia ona togi atu lana tu’i ma tau ai i le mata o le isi ali’i leoleo ma fula ai, ona fa’aauau ai lava lea ona ia tafiti solo ina ia mafai ona sola ese, a o taumafai pea leoleo e faataatia o ia i lalo ae se’i loka ona lima.

Na fesoasoani le uncle a le ua molia i ali’i leoleo e tau taofiofi lima o Amituana’i ina ia mafai ona loka, ma i’u ai loa ina mafai.

Ina ua taunu’u i le ofisa o leoleo i Tafuna, na fa’ailoa ai e Amituana’i i leoleo, e i ai ana fana o lo o i ai i le fale, fa’apea ai ma se vaega tupe tele o lo o nana i totonu o le fale.

Sa ia tago fo’i ma ki lana telefoni feavea’i ae fa’amatamata ia ali’i leoleo e to’alua i ona ata o lo o pu’e a o uu ana fana.

Ua molia nei Amituana’i e le malo i le moliaga mama o le fa’atupu vevesi i nofoaga faitele, e fa’atali ai moliaga fa’aopoopo lea ua sauni le malo e faila fa’asaga ia te ia i se taimi o le vaiaso nei, ma o lo o taofia pea o ia i le toese i Tafuna, se’i vagana ua ia totogi le $2,000 i le mataupu lea ona fa’atoa mafai lea ona tatala o ia i tua mai le toese i Tafuna.

MATAUPU NA TULA’I MAI I PAGO PAGO

E $25,000 le tupe lea ua fa’atulaga e le fa’amasinoga e totogi, ona fa’atoa mafai lea ona tatala Amituana’i mai tua o le toese i Tafuna, ona o le mataupu na tula’i mai i Pago Pago lea ua tu’uaia ai o ia i solitulafono e fa.

O ia solitulafono e aofia ai moliaga mamafa e lua o le talepe fale i le tulaga lua ma le fa’ao’olima i le tulaga lua, faapea ai ma moliaga mama e lua o le fa’aoolima i le tulaga tolu ma le fa’atupu vevesi i nofoaga faitele.

O le te’a o le itula e 10:00 i le taeao o le aso 18 Novema 2013, na logo ai e se tama matua mai Pago Pago le ofisa o leoleo mo se fesoasoani, ona o se tagata sa ia maua atu o lo o lafi i totonu o lona fale, lea na fa’aaoga se tamai naifi e fa’ao’olima ai ia te ia.

Na taua e le tama na a’afia e fa’apea, i le taimi o le taeao e pei ona ia taua, sa alu ai e momoli le taumafataga a si ona to’alua o lo o gasegase i le fale, lea fo’i o lo o i ai se tina talavou o lo o tausi ma’i ai i lona to’alua.

Na taunu’u le tama na a’afia ma ia maitauina le isi potu o le fale ua loka, ona ia tatala lea o le potu i le ki ma ulufale ai i totonu, ma ia maua atu ai Amituana’i o lo o lafi i tua o le solo taele, ma ia oso mai ai ma se tama’i naifi ia te ia, ae sa ia tali atu i ai e ala i lona taumafai e tu’i ma kiki le ua molia.

Na umi se taimi o fai tauiviga a le ua molia ma le tama matua i totonu o le fale, ma i’u ina titina ai loa e le ua molia le tama matua toe tui lona lima i le naifi ma manu’a ai, ona tu ai loa lea i luga o le ua molia ma sola i fafo o le fale e ala i lona oso i le fa’amalama, ma taei uma ai fa’amalama e 9, ma manu’a ai lona tauau.

E tele vaega o le tino a le tama matua na a’afia ma manu’a ina ua fa’ao’olima i ai le ua molia, e pei o ona foliga, o ona tauau, vae ma lima, faapea ai maosia i lona ua ma lona papatua sa tiga.

Na taua e le tina talavou lea na tausi ma’i i le faletua o le tama matua na a’afia i leoleo e fa’apea, na te’i ina ua tu’itu’i atu Amituana’i i le faitoto’a o le fale i le taeao ma valaau atu ia te ia e tatala le faitoto’a, ae ina ua musu le tina talavou lea e tatala le faitoto’a, na kiki ai loa e le ua molia ma malepe i le isi itu o le faitoto’a, ma maua ai loa lona avanoa e ulufale ai i totonu, ma ia fa’ao’olima ai i le tina talavou sa tausi ma’i, ae ina ua ia vaaia le ta’avale a le tama na a’afia ua paka i luma o le fale, sa oso ai loa ma lafi i totonu o le potu.

E 12 masina na loka ai Amituana’i i le toese i Tafuna, ina ua ta’usala o ia i le moliaga o le fa’ao’olima, e mafua mai i le fa’alavelave lea na ia fa’ao’olima ai i lona to’alua a o ma’itaga.

O isi poloaiga o lana nofovaavaaia e 5 tausaga, o le fa’asa lea ona ia toe taumafai e fa’afeso’ota’i lona to’alua, ae tusa ai i faamaumauga a le fa’amasinoga, o lona toe taumafai e fa’afeso’ota’i le tina talavou lea sa tausi ma’i i le fale na tula’i mai ai le fa’alavelave i Pago Pago, o lona to’alua fo’i lea, ua atagia mai ai lona le usitaia o poloaiga o lana nofova’ava’aia.

Feso’ota’i mai i le tusitala ia ausage@samoanews.com