O le taeao nei lea ua fa’amoemoe e faia ai se polokalame tele a le malo i le malae o le Si’uga’ula a le Atuvasa i Utulei, e fa’amanatu ai le avea o le masina lenei o Iulai ma masina e fa’ataua ai tupulaga talavou i le atunu’u.

O le aso foi lenei e fa’amanatuina ai le tutoatasi o le malo o Amerika.

O le polokalame e amata i le solo tele lava a tupulaga talavou, lea e amata mai i le maota o Tauese Sunia Ocean Center i Utulei, ma aga’i atu ai i le malae o le Su’iga’ula e fa’amae’a ai, ma fa’atali ai loa le amataina o le polokalame i se sauniga puupuu, e pei ona fa’amaonia mai e se sui o le Matagaluega o Tupulaga Talavou, Tina ma Tama’ita’i ia Pa’u Roy Ausage.

O le susuga i le ali’i faifeau ia Rev. Fa’atauva’a Talamoni mai le ekalesia EFKAS Pago Pago o le a taitaia le polokalame i se sauniga lotu, pe a mae’a le sisiina o tagavai a le malo tele o Amerika faapea ai ma le tagavai a Amerika Samoa.

“E i le va o le 1,800 - 2,000 le aofa’i o tupulaga talavou ua fa’amoemoe e auai i lenei polokalame, ma ua i ai fo’i isi polokalame faapitoa ua fa’atulaga e fa’ataunuu ai mo le fa’amatagofieina lava o le aso o nai tupulaga talavou”, o le saunoaga lea a Tapumanaia Galu Satele, o le sui fa’atonu o le Matagaluega o Tupulaga Talavou.

O saunoaga autu o le aso e aofia ai le afioga i le Lutena Kovana ia Lemanu Peleti Mauga, o le Fa’atonu o le Matagaluega o Tupulaga Talavou, Tina ma Tama’ita’i ia Jonathan Fanene, faapea ai ma se sui o le Kolisi Tu’ufa’atasi, ona o le aso fo’i lea e fa’atautaia ai le polokalame a le Kolisi Tu’ufa’atasi (CNR - 4H Program), lea ua fa’amoemoe e faia i le lotoa a le aoga maualuga a Samoana.

O ni isi o polokalame o le a faatinoina i lea aso e aofia ai taavale teuteu ma taaloga lea ua faamoemoe e faia i le taeao seia o o atu i le itula e 1:30 i le aoauli, ae o le afiafi i le itula e 6:30 e amata atu ai faafiafiaga ae fa’ai’u ai loa i ‘fireworks’ i le itula e 9:00 i le po ma tapunia ai loa polokalame mo tupulaga talavou.

O tupulaga talavou ua fa’amoemoe e auai i le polokalame e pei ona saunoa Tapumanaia e aofia ai sui o autalavou ua valaaulia e faafiafia, o tupulaga talavou o lo o auai i le polokalame a le Kolisi Tuufaatasi, faapea ai ma tupulaga talavou o lo o galulue i lalo o le polokalame a le malo, lea e galulue ai i matagaluega a le malo ma pisinisi tua.

Talu ai o le aso malolo lenei mo le fu’a a le malo tele o Amerika, o le a tapunia ai ofisa uma a le malo, e leai fo’i se lomiga a le To’asavili i le aso a taeao, aso Toona’i, Iulai 5, 2014.