[E fa’atalofa atu i le mamalu o le aufaitau i lenei vaiaso, malo le onosa’i, malo fo’i le soifua laulelei, ae alo maia, o le toe faaauauina lenei o le tatou tala fa’asolo, lea na gata mai i le vaiaso na te’a nei ina ua ote atu le olomatua o Fofoga ia Mekala e aua ne’i ona toe fa’atalanoaina ia Veli le to’alua o lana tama teine o Tania.]

Na te’i le fafine o Mekala i le ‘ote a le tina o Tania lea ua fai atu ia te ia, ae leai lava sana mea o fai, o lea la te talatalanoa ma le tamaloa o Veli i tua i le umukuka. E lei gagana le fafine i se upu sei vagana ai lona tu le mu i luga ma solomuli ese loa mai le umukuka lea e fai ai le fa’alifu a si tamaloa o Veli. “Vaai oe Veli, aua eke fiafia e fa’akalagoa fafige gofokage o le guu, ga o lou pugou lava o oe ia e fai lau feau o lo o fai ma koso le sipi ma le magu leaga o le ea ...” o le ote atu lea a le olomatua i le tamaloa o Veli, ae ua atili ai ona ta tope gaioiga a Veli i le valuina o le popo o le fa’alifu e aunoa ma sona fia fa’alogo atu i le ‘ote atu a le tina o lona to’alua.

Na avea le leotele o le ‘ote a le olomatua o Fofoga ma ta’u le igoa o le fafine o Mekala ma itu na lagona mai ai e le aiga lea e nofotane ai Mekala, ona taumafai loa lea e saili le au o le paipa, ma maua ane ai, o Mekala sa talanoa ma Veli i tua o le umukuka a le aiga o lo o faiava ai Veli. “O le a lava le mea eke avaavau ai isi kamaloa o lega e kigaiga i le faiga o kakou feau,” o le tala lea a Tania ma savali atu ua saofa’i i luga o le matatuai lea sa valu ai le popo a Veli, ae o le olomatua i le taimi lea, ua na o le tu ma uu ona pui manava ma ona foliga saua o lo o fa’aali atu ia Veli.

“Aga ou le sau gei e le moki le ‘ili a le ko’alua lea sa fai i kua i i, ae po o kala lava o ai ga kope kope ai la guku ...” o le toe oso atu lea a le olomatua e tali atu ai i le fesili fia iloa a lana tama teine o Tania, ma o iina lea fa’atoa iloa ai e Tania le auga o le paipa ua mafua ai ona ote le olomatua i le afiafi, ina ua maua atu le fafine o Mekala o lo o talanoa na o laua ma Veli i tua o le umukuka. E tau fai atu le tala a si tamaloa o Veli e tau fa’amalamalama ai le mea sa’o sa tupu, ae te’i i le fa’asaga ese o le olomatua ma toe savali aga’i i le fale ma le gutu e le mapu i le ote ma lau le auleaga o si tamaloa o Veli atoa ai ma le mamao o Savaii e sau ai.

“Sole Veli, aisea ua sau ai fua Mekala i le kakou umukuka ma kalagoa aku ia ke oe, e i ai se mea o kupu i le lua va ou ke le o iloaiga, vaai o lea ua vevesi lo’u kiga kalu ai le kiga o loga loko i legei mea ua kupu”, o le fesili tofotofo atu lea a Tania i lona to’alua o Veli, ao le tamaloa i le taimi lea, e pei lava e talanoa atu i le papatua o le pato, e le o kea mai lava i le talanoa atu a Tania, ae na o le punou lava ma tatau le peepee o le fa’alifu ma lona manatu, e vela loa lana saka ona alu ese loa lea ma le fale ua tiga lona mafaufau i le tele atu o nei mau tala ia te ia. E fetaui lava le sii mai i fafo o le fa’alifu fa’i a Veli ua vela ae tutu atu loa fo’i ma Mekala ma le tina o lona to’alua e fai su’ega tala o le afiafi.