Vaega: 22

Fa’atalofa atu i le mamalu o le atunu’u i lenei taeao fou, taeao toto’a, taeao manino i le alofa ma le agalelei o lo tatou Matai oi le lagi. E ao ai ona o tatou fa’apea ifo, “Le Ali’i e, e silisili lava Oe i mea uma matou te manatu i ai, e leoleoina o matou tagata mai mala ma faigata o le soifuaga nei, ona o matou fa’afo’i atu ai lea o le vi’iga ma le fa’afeatai i Lau Afio e le aunoa, Amene.”

Ae alo maia, o le a toe fa’aauau atu la tatou tala mo lenei aso, ae ia manuia lou alo atu i feau ma galuega o le a feagai ai ma oe i lenei aso. Na muta mai la tatou tala, ina ua fa’asolosolo nei mafaufauga o Petelo i lana manamea o Losalina, a’o le taimi lea, ua ta’oto’oto le lo’omatua ma le toeaina i totonu o le la ta’inamu ma talatalanoa ai e uiga i le la fanau o Petelo ma Samuelu.

Ua to’a le tai, e moni ai le upu, a sala tai, ae ia tonu uta, o a fo’i fa’afitauli o le olaga nei, e mafai lava ona fo’ia, e ala i le agaga malamalama ma le alofa o le tasi i le isi. O a fo’i mea e tutupu i totonu o aiga, o i’ina o le tanu ai le alofa moni o matua i fanau, e ala lea i le fetufa’ai i mea e lelei ai aiga, ma maua ai le nonofo fealofani.

Ua fa’apena le tulaga ua i ai nei le aiga o Paulo ma Eseta i lea afiafi, ua fetufa’ai nei fa’atasi ma si a la tama o lo’o tua i ai i mea uma o le aiga. Ua suiga malie mea uma i lea afiafi, ae ua talatalanoa nei po’o ai o le a alu e toe au mai Samuelu, lea ua maua le tala ua alu i le uso o Paulo. Na fai lava si popole o le toeaina ma le lo’omatua, ona o le mamao o le nu’u o lo’o Faifeau ai Sila, ae pe ua taunu’u manuia Samuelu pe leai.

E le o iloa e Paulo ma Eseta, le popole o le loto o Petelo i si ona uso, e ui lava i uiga faigata o Samuelu, ae e lagona lava e Petelo lona alofa, ona e leai lava se isi ona uso, ua na o le to’atasi lava. O le mea fo’i lea, o le a lava le ulavale ma le fa’amisa o Samuelu lea ua toeititi uma i ai povi ma pua’a ma mea fafaga o lo’o tigaina ai, ae ua talia lava e Petelo, fa’atasi ai ma ana talotaloga, talosia ia i ai se aso e sui ai uiga ia o Samuelu.

Ua toe manatua nei e Petelo le tala a lona tama lea na fai ane i a te ia a’o le i taunu’u i lo latou fale, lea na fa’apea ane ai lona tama i a te ia, ai ua sola fa’asulusulu Samuelu, ona o le fefe i a te ia. Ua avea lea ma ala ua mamafa ai lava i le mafaufau o Petelo le tala a lona tama e uiga i a Samuelu. Ua lagona le alofa, ua lagona le fia va’ai, ua lagona fo’i le manatu, e fia mafuta pea i si ona uso. O le ala lea na fai ane ai loa i ona matua, e sili pe a alu ia e toe au mai Samuelu.

A’o le i faia le tala lea a Petelo, ae ua ta mau i le loto o le toeina o Paulo, o le a alu i le pasi usu o le taeao e toe au si ona atali’i. Ua maua nei le tonu o le a nofo Petelo e fa’amuli atu ma lona tina, ae alu le toeaina e toe au mai Samuelu, ma ua fa’apea lava ona fai.

A’o faia le tonu a le Paulo, Eseta ma le la tama o Petelo, o le taimi lea, ua talatalanoa fiafia Samuelu ma uso o lona tama. E le o iloa mai e Samuelu, tulaga faiga na o’o i ai ona matua ae maise o lona uso o Petelo. O lea lava ua fiafia lona loto ina ua feiloa’i ma le uso o lona tama, ae maise o lana fanau, ae ua galo ai i a te ia le tulaga na o’o i ai ona matua, ae maise o lona tina, i lea afiafi.

Na ona taunu’u lava o le toeaina o Seve i le fale o le Faifeau alu atu loa ma le tala, “Talofa lau Susuga i le Fa’afeagaiga, fa’amalulu atu i lenei afiafi, ae ua ou o’o mai e momoli mai lou atali’i.” Ua pupula alalo ane nei i ai le Faifeau ua le mautonu po’o ai lona atali’i, aua o lea o lo’o fai mea’aoga a lana fanau e to’atolu. “Seve, o ai, o lea e i totonu o le fale la’u fanau, o ai lea e te fai mai ai?” Na toe tali Seve, “O lou atali’i o Samuelu, o lea na ma o mai i le pasi.”

Ua tu fa’atopetope a’e nei i luga le Faifeau ma savali mai loa e fa’afeiloa’i i a Samuelu, ua fa’ate’ia ma ua le mautonu, pe aisea ua alu atu ai Samuelu, a’e ua pogisa. Ua popole nei i lona uso o Paulo, pe i ai se mea ua tupu fua i le alu atu o Samuelu i lea taimi.

E faia pea…