VILIAMU SENIO

Ua talia e le fa’amasinoga maualuga le talosaga a le ali’i pagota o Viliamu Senio tauala atu i lana loia fautua o Joel Shiver, mo se poloaiga a le fa’amasinoga e fa’ataga ai ona tatala o ia i tua e alu e faigaluega ma toe fo’i i totonu i le toese mo le tuliina o lana fa’asalaga fa’a falepuipui.

O ananafi na talia ai e le ali’i fa’amasino sili lagolago ia Lyle L. Richmond ma lona soatau ia Muasau Tasina Tofili le talosaga a Senio, ina ua lagolago e le loia a le malo ia Tony Graf le talosaga a le itu tete’e, atoa ai ma le pasia e Senio o le suega sa faia i lona tino e saili ai po o ia fa’aaoga fualaau fa’asaina o le mariuana.

Na fa’ailoa e Senio i le fa’amasinoga, o ia ua maua le avanoa e faigaluega ai i se fale Inisinia i Taputimu, amata mai i le 7:30 ae mavana i le 4:00 i le afiafi.

I le tali ai e le fa’amasinoga o le talosaga a le ua molia, na poloaina ai loa le tatala o ia i tua mai le toese i Tafuna i le itula e 6:30 i le taeao, ae tatau ona toe fo’i i totonu i le itula e 5:00 i le afiafi, mai le aso Gafua e oo atu i le aso Faraile.

E 12 masina le umi o le fa’asalaga faa falepuipui a Senio o lo o tuli i le toese i le taimi nei, ina ua ta’usala o ia e le faamasinoga i le moliaga mamafa o le faaoolima i le tulaga lua, e mafua mai i le faalavelave lea na ia osofaia ai lona uso i se agaese i le masina o Tesema 2013.

FATU ALAPATI

E 12 masina lea ua nofovaavaaia ai le ali’i o Fatu Alapati o Iliili, ina ua ta’usala e le fa’amasinoga faaitumalo o ia i le moliaga o le faaoolima i le tulaga tolu, e mafua mai i le faalavelave lea na ia faaoolima ai i se ali’i na la vevesi i le tuaoi o le fanua.

Na faatoese Alapati i le faamasinoga e tusa ai o lana solitulafono sa faia, ma ia talosagaina ai se isi avanoa mo ia. Sa ia faatoese foi i le alii na aafia, ma ia taua ai le mae’a lea ona toe teuteu le vevesi na tula’i mai i le latou tuaoi.

Na fesili le ali’i fa’amasino ia Elvis P. Patea ia Alapati po o i ai se mataupu o lo o faagasolo i le faamasinoga maualuga faasaga i le fanua lea na mafua mai ai le vevesi, na tali le ua molia e leai, o le vevesi na tula’i mai ina ua la’u atu e le aiga o le ali’i na a’afia a latou lapisi ma fa’aputu i luga tonu o le tuaoi ma aafia atu ai ma le isi itu o le latou fanua, ma ua afaina atu ai ma ni isi o laau toto a lo latou aiga.

Na fautuaina e le faamasinoga Alapati, a toe tulai mai se isi faaletonu faapea i fanua po o tuaoi o aiga, faafesootai le Sa’o o le aiga, afai e le maua ai se filemu, saili se fesoasoani mai leoleo, ae le o le faaaoga o lona malosi e foia ai faafitauli.

O se tasi o tuutuuga o le nofovaavaaia a Alapati, o lona totogi lea o le salatupe e $50 ma ia fa’atoese i le ali’i na a’afia i lenei mataupu.

MALAKI FITIAO

O le ali’i sa malaga mai i se pemita e 30 aso le umi lea na ta’usala ina ua ‘ona ma laulau vavale i luma o se falesa i Pava’ia’i i le leva o le po, ua nofovaavaaia mo le 12 masina i lalo o tuutuuga a le fa’amasinoga, e aofia ai lona tuua o le teritori ae toe fo’i atu i le atunu’u na malaga mai ai.

Na faatoese le alii o Malaki Fitiao i le solitulafono o le faatupu vevesi i nofoaga faitele na ta’usala ai o ia e le faamasinoga, peitai na faailoa i ai e le faamasinoga e faapea, o ia o se tagata sa malaga asiasi mai i le teritori, sa tatau fo’i ona ia usita’i ma fa’aaloalo i tulafono a le malo, ae o lona soli o le tulafono, ua atagia mai ai lona le manatu mamafa i tulafono a le malo o Amerika Samoa.

O Fitiao, 28 tausaga le matua, faatoa mae’a le aoga o lona pemita e 30 aso na malaga mai ai i le faaiug ao le masina lenei o Iulai.

O le isi tuutuuga o lana nofovaavaaia, ia totogi le salatupe e $75, aua nei ona toe solia se tulafono, aua foi ona toe taumafai e ulufale faamalosi ai i Amerika Samoa, sei vagana ua mae’a le tausaga lea ua faatonu o ia na te tuua ai le atunuu ona faatoa mafai lea ona toe ulufale mai i le teritori.