Ua sauni le afioga i le alii kovana ia Lolo Matalasi Moliga e fa’asalalau sana saunoaga faapitoa i luga o le televise, ina ia fa’amanino ai i le atunuu tulaga e faatatau i suiga o le Fa’aavae, atoa ai ma lona lagolagoina o lea fuafuaga e pei ona taumafai i ai le Fono Faitulafono.

O suiga o le Fa’avae e pei ona sauni e tuuina atu i le palota, o le mataupu e tuu atu ai le malosi i le Fono Faitulafono e liliu ai le faaiuga a le kovana e teena ai se pili na pasia a le Fono Faitulafono (veto override).

I se tusi a Lolo sa tuuina atu i ta’ita’i o le Fono Faitulafono, e le gata sa ia fa’amaonia ai lona sauni e fa’alauiloa i le atunuu lona lagolagoina o lenei fa’amoemoe, ae sa ia talosagaina fo’i ta’ita’i o le Fono Faitulafono, ina ia faapena fo’i ona latou fa’alauiloa i le atunuu lo latou lagolagoina o suiga o le Fa’avae.

E ese mai i le tusi sa tuuina atu e Lolo i le Fono e fa’amaonia ai lona lagolagoina o lenei fa’amoemoe, ae sa ia tuuina atu fo’i se tusi e fa’alauiloa ai totino o le Komiti latou te fa’amaninoina suiga o le Fa’avae i le atunuu ua ia tofia.

O sui o le komiti o lo o taitaifono ai le Loia Sili ia Talauega Eleasalo Ale; afioga i le alii senatoa ia Afoa S. Lutu; le ali’i loia ia Fainuulelei L.P.F. Alailima-Utu; Tapaau Dr. Dan Aga mai le Kolisi Tuufaatasi, ma Edwin Kamauoha o le loia lagolago a le kovana.

I luma o le senate i le taeao ananafi, na talosagaina ai e le afioga i le alii senatoa ia Soliai Tuipine Fuimaono le alii peresetene, ua tatau ona amata galulue le Fono Faitulafono e fai gaioiga uma e fa’amalamalama ai i le atunuu le uiga o suiga o le Fa’avae, ona ua puupuu le taimi o lo o totoe.

“E le tatau ona tatou telegese i le faamaninoina o le mataupu taua lenei, ua leai se taimi o totoe, toe lua masina taunuu i le taimi o le palota, ma ua tatau ona amata galulue le fono e tuu atu faasalalauga i le atunuu”, o le saunoaga lea a Soliai.

Ae na saunoa le alii peresetene o le Senate ia Gaoteote Palaie Tofau e fa’apea, ua maea ona tofia le Komiti e gafa ma le faalauiloaina o suiga o le fa’avae i le atunuu, lea e aofia ai le afioga i le alii senatoa ia Afoa Suesue M. Lutu.

Saunoa Gaoteote e faapea, o galuega a le komiti e aofia ai faatalatalanoaga i luga o le televise, ina ia faamatala auiliili ai i le atunuu uiga moni o suiga o le Fa’aavae.

Na talosaga le afioga i le alii senatoa ia Galea’i M. Tu’ufuli i sui o le komiti ua tofia e le alii kovana, ina ia fa’aaoga le gagana faigofie i le taimi e fetufaa’i ai e fa’atatau i suiga o le fa’avae, ina ia faa faigofie ai i le atunu’u ona malamalama.

Na taua e Galea’i e fa’apea, o le mafua’aga autu na mafua ai ona teena e le atunuu suiga o le Fa’avae i le taimi ua te’a, e le i malamalama tagata i le faamaninoina o le mataupu.

Na faafetaia e Gaoteote le alii kovana, i lona lagolagoina o le faamoemoe o le Fono, ma ia taua ai e fa’apea, o se ulua’i nofoaiga lenei ua latou lagolagoina lenei ituaiga mataupu.